ਬਠਿੰਡਾ :- ਬਠਿੰਡਾ ਦੇ ਗਣੇਸ਼ ਬਸਤੀ ਇਲਾਕੇ ਵਿੱਚ ਇੱਕ ਦਿਲ ਦਹਿਲਾ ਦੇਣ ਵਾਲਾ ਹਾਦਸਾ ਵਾਪਰ ਗਿਆ, ਜਿੱਥੇ ਰੋਡ ਰੋਲਰ ਦੀ ਚਪੇਟ ਵਿੱਚ ਆਉਣ ਨਾਲ ਇੱਕ ਵਿਅਕਤੀ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ, ਜਦਕਿ ਉਸ ਦੀ ਨਾਬਾਲਗ ਧੀ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਈ। ਇਹ ਹਾਦਸਾ ਗਣੇਸ਼ ਬਸਤੀ ਦੀ ਗਲੀ ਨੰਬਰ 9 ਵਿੱਚ ਉਸ ਸਮੇਂ ਵਾਪਰਿਆ ਜਦੋਂ ਵਿਸ਼ਾਲ ਗੁਪਤਾ ਆਪਣੀ 9 ਸਾਲਾ ਧੀ ਮਨੱਤ ਨਾਲ ਸਕੂਟਰ ’ਤੇ ਜਾ ਰਹੇ ਸਨ।
ਘਰ ਦੇ ਬਾਹਰ ਪਈ ਬਜਰੀ ਕਾਰਨ ਬੇਕਾਬੂ ਹੋਇਆ ਸਕੂਟਰ
ਮੁੱਢਲੀ ਜਾਣਕਾਰੀ ਅਨੁਸਾਰ ਗਲੀ ਵਿੱਚ ਇੱਕ ਘਰ ਦੇ ਰੈਂਪ ਨੇੜੇ ਪਈ ਢਿੱਲੀ ਬਜਰੀ ਕਾਰਨ ਸਕੂਟਰ ਦਾ ਸੰਤੁਲਨ ਬਿਗੜ ਗਿਆ। ਇਸ ਦੌਰਾਨ ਪਿਤਾ-ਧੀ ਦੋਵੇਂ ਸੜਕ ’ਤੇ ਡਿੱਗ ਪਏ। ਓਸੇ ਵੇਲੇ ਗਲੀ ਵਿੱਚ ਨਿਰਮਾਣ ਕੰਮ ਕਰ ਰਿਹਾ ਰੋਡ ਰੋਲਰ ਪਿੱਛੇ ਵੱਲ ਆ ਰਿਹਾ ਸੀ, ਜਿਸ ਦਾ ਚਾਲਕ ਸਮੇਂ ਸਿਰ ਵਾਹਨ ਨਹੀਂ ਰੋਕ ਸਕਿਆ ਅਤੇ ਦੋਵੇਂ ਉਸ ਦੀ ਚਪੇਟ ਵਿੱਚ ਆ ਗਏ।
ਸਿਰ ’ਚ ਗੰਭੀਰ ਸੱਟ ਲੱਗਣ ਕਾਰਨ ਵਿਅਕਤੀ ਦੀ ਮੌਕੇ ’ਤੇ ਮੌਤ
ਹਾਦਸੇ ਦੌਰਾਨ ਵਿਸ਼ਾਲ ਗੁਪਤਾ ਦੇ ਸਿਰ ’ਤੇ ਗੰਭੀਰ ਸੱਟ ਲੱਗੀ, ਜਿਸ ਕਾਰਨ ਉਨ੍ਹਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਦੂਜੇ ਪਾਸੇ, ਛੋਟੀ ਬੱਚੀ ਮਨੱਤ ਨੂੰ ਗੰਭੀਰ ਹਾਲਤ ਵਿੱਚ ਇਲਾਜ ਲਈ ਹਸਪਤਾਲ ਪਹੁੰਚਾਇਆ ਗਿਆ।
ਵੱਖ-ਵੱਖ ਹਸਪਤਾਲਾਂ ਵਿੱਚ ਚੱਲ ਰਿਹਾ ਬੱਚੀ ਦਾ ਇਲਾਜ
ਸਥਾਨਕ ਭਲਾਈ ਸੰਸਥਾ ਦੇ ਵਲੰਟੀਅਰ ਮੌਕੇ ’ਤੇ ਐਂਬੂਲੈਂਸ ਸਮੇਤ ਪਹੁੰਚੇ ਅਤੇ ਜ਼ਖ਼ਮੀ ਬੱਚੀ ਨੂੰ ਤੁਰੰਤ ਨਿੱਜੀ ਹਸਪਤਾਲ ਲਿਜਾਇਆ ਗਿਆ। ਹਾਲਤ ਨਾਜ਼ੁਕ ਹੋਣ ਕਾਰਨ ਉਸ ਨੂੰ ਬਾਅਦ ਵਿੱਚ ਸਿਵਲ ਹਸਪਤਾਲ ਭੇਜਿਆ ਗਿਆ, ਜਿੱਥੇ ਮੁੱਢਲਾ ਇਲਾਜ ਕਰਨ ਤੋਂ ਬਾਅਦ ਮੁੜ ਇੱਕ ਨਿੱਜੀ ਹਸਪਤਾਲ ਰੈਫਰ ਕਰ ਦਿੱਤਾ ਗਿਆ।
ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਸ਼ੁਰੂ
ਪੁਲਿਸ ਨੇ ਮ੍ਰਿਤਕ ਦੇਹ ਨੂੰ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ। ਹਾਦਸੇ ਸਬੰਧੀ ਅਗਲੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਰੋਡ ਰੋਲਰ ਚਾਲਕ ਤੋਂ ਵੀ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।
