ਲੁਧਿਆਣਾ :- ਬਾਗੇਸ਼ਵਰ ਧਾਮ ਦੇ ਪੰਡਿਤ ਧੀਰੇਂਦਰ ਸ਼ਾਸਤਰੀ ਵੱਲੋਂ ਲੁਧਿਆਣਾ ਦੇ ਚੰਡੀਗੜ੍ਹ ਰੋਡ ਸਥਿਤ ਗਲਾਡਾ ਗਰਾਊਂਡ ਵਿਖੇ 26 ਤੋਂ 30 ਸਤੰਬਰ ਤੱਕ ਕਰਵਾਈ ਜਾ ਰਹੀ ਪੰਜ ਰੋਜ਼ਾ ਸ੍ਰੀ ਹਣੂਮੰਤ ਕਥਾ ਨੂੰ ਲੈ ਕੇ ਪੁਲਸ ਨੇ ਆਵਾਜਾਈ ਪ੍ਰਬੰਧਾਂ ਵਿੱਚ ਬਦਲਾਅ ਕੀਤਾ ਹੈ। ਕਥਾ ਵਿੱਚ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂਆਂ ਦੇ ਪਹੁੰਚਣ ਦੀ ਸੰਭਾਵਨਾ ਦੇ ਮੱਦੇਨਜ਼ਰ ਲੁਧਿਆਣਾ ਪੁਲਸ ਵੱਲੋਂ ਭਾਰੀ ਅਤੇ ਹਲਕੇ ਵਾਹਨਾਂ ਲਈ ਵੱਖ-ਵੱਖ ਰੂਟ ਤੈਅ ਕੀਤੇ ਗਏ ਹਨ। ਇਹ ਪ੍ਰਬੰਧ ਕਥਾ ਦੇ ਸਾਰੇ ਪੰਜ ਦਿਨ ਲਾਗੂ ਰਹਿਣਗੇ। ਹਾਲਾਂਕਿ, ਮੌਕੇ ਦੀ ਟ੍ਰੈਫਿਕ ਸਥਿਤੀ ਮੁਤਾਬਕ ਪੁਲਸ ਵੱਲੋਂ ਇਨ੍ਹਾਂ ਵਿੱਚ ਤਬਦੀਲੀ ਵੀ ਕੀਤੀ ਜਾ ਸਕਦੀ ਹੈ।
ਕੋਹਾੜਾ ਚੌਕ ਤੋਂ ਭਾਰੀ ਵਾਹਨਾਂ ਨੂੰ ਕੀਤਾ ਜਾਵੇਗਾ ਡਾਇਵਰਟ
ਪੁਲਸ ਵੱਲੋਂ ਜਾਰੀ ਯੋਜਨਾ ਅਨੁਸਾਰ ਦੁਪਹਿਰ 1 ਵਜੇ ਤੋਂ ਕੋਹਾੜਾ ਚੌਕ ਤੋਂ ਚੰਡੀਗੜ੍ਹ ਰੋਡ ਵੱਲ ਜਾਣ ਵਾਲੇ ਭਾਰੀ ਵਾਹਨਾਂ ਨੂੰ ਸਾਹਨੇਵਾਲ ਵੱਲ ਮੋੜਿਆ ਜਾਵੇਗਾ। ਇਸ ਦੌਰਾਨ ਕੋਹਾੜਾ ਤੋਂ ਅੱਗੇ ਚੰਡੀਗੜ੍ਹ ਰੋਡ ‘ਤੇ ਭਾਰੀ ਵਾਹਨਾਂ ਦੀ ਆਵਾਜਾਈ ਬੰਦ ਰਹੇਗੀ।
ਜਲੰਧਰ ਬਾਈਪਾਸ ਤੋਂ ਆਉਣ ਵਾਲੇ ਭਾਰੀ ਵਾਹਨਾਂ ਲਈ ਬਦਲਵਾਂ ਰਸਤਾ
ਜਲੰਧਰ ਬਾਈਪਾਸ ਚੌਕ ਤੋਂ ਚੰਡੀਗੜ੍ਹ ਰੋਡ ਵੱਲ ਜਾਣ ਵਾਲੇ ਭਾਰੀ ਵਾਹਨਾਂ ਨੂੰ ਸਮਰਾਲਾ ਚੌਕ ਰਾਹੀਂ ਟਰਾਂਸਪੋਰਟ ਨਗਰ, ਓਸਵਾਲ ਚੌਕ, ਸ਼ੇਰਪੁਰ ਚੌਕ ਅਤੇ ਗਿਆਸਪੁਰਾ ਚੌਕ ਤੋਂ ਹੁੰਦੇ ਹੋਏ ਸਾਹਨੇਵਾਲ ਅਤੇ ਕੋਹਾੜਾ ਵੱਲ ਭੇਜਿਆ ਜਾਵੇਗਾ। ਪੁਲਸ ਨੇ ਭਾਰੀ ਵਾਹਨਾਂ ਦੇ ਚਾਲਕਾਂ ਨੂੰ ਤੈਅ ਕੀਤੇ ਰਸਤੇ ਦੀ ਵਰਤੋਂ ਕਰਨ ਦੀ ਅਪੀਲ ਕੀਤੀ ਹੈ।
ਜਮਾਲਪੁਰ ਚੌਕ ਤੋਂ ਹਲਕੇ ਵਾਹਨਾਂ ਦਾ ਰੂਟ ਵੀ ਬਦਲਿਆ
ਜਮਾਲਪੁਰ ਚੌਕ ਨੂੰ ਵੀ ਟ੍ਰੈਫਿਕ ਡਾਇਵਰਜ਼ਨ ਪੁਆਇੰਟ ਬਣਾਇਆ ਗਿਆ ਹੈ। ਇੱਥੋਂ ਹਲਕੇ ਵਾਹਨਾਂ ਨੂੰ ਮੈਟਰੋ ਰੋਡ ਵੱਲ ਭੇਜਿਆ ਜਾਵੇਗਾ। ਇਸ ਤੋਂ ਇਲਾਵਾ ਚੰਡੀਗੜ੍ਹ ਰੋਡ ਨਾਲ ਜੁੜਨ ਵਾਲੀਆਂ ਹੋਰ ਸੜਕਾਂ ‘ਤੇ ਵੀ ਹਲਕੇ ਵਾਹਨਾਂ ਦੀ ਆਵਾਜਾਈ ਨੂੰ ਤਰਜੀਹ ਦਿੱਤੀ ਜਾਵੇਗੀ।
ਸ਼ਰਧਾਲੂਆਂ ਲਈ ਤਿੰਨ ਥਾਵਾਂ ਤੇ ਪਾਰਕਿੰਗ
ਕਥਾ ਵਿੱਚ ਆਉਣ ਵਾਲੇ ਸ਼ਰਧਾਲੂਆਂ ਦੇ ਵਾਹਨਾਂ ਲਈ ਪ੍ਰਸ਼ਾਸਨ ਅਤੇ ਪੁਲਸ ਵੱਲੋਂ ਵੱਖ-ਵੱਖ ਥਾਵਾਂ ‘ਤੇ ਪਾਰਕਿੰਗ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਆਮ ਸ਼ਰਧਾਲੂ ਆਪਣੇ ਵਾਹਨ ਮੋਹਿਨੀ ਰਿਜ਼ੋਰਟ ਨਾਲ ਲੱਗਦੀ ਪਾਰਕਿੰਗ, ਐਵਰੇਸਟ ਸਕੂਲ ਅਤੇ ਗਲਾਡਾ ਗਰਾਊਂਡ ਵਿੱਚ ਨਿਰਧਾਰਤ ਥਾਵਾਂ ‘ਤੇ ਖੜ੍ਹੇ ਕਰ ਸਕਣਗੇ।
ਵੀ.ਆਈ.ਪੀ. ਵਾਹਨਾਂ ਲਈ ਵੱਖਰੀ ਪਾਰਕਿੰਗ
ਵੀ.ਆਈ.ਪੀ. ਸ਼੍ਰੇਣੀ ਦੇ ਵਾਹਨਾਂ ਲਈ ਕਥਾ ਸਥਾਨ ਦੇ ਨੇੜੇ ਸ੍ਰੀ ਰਾਮ ਦਰਬਾਰ ਮੰਦਰ ਦੇ ਬਾਹਰ ਪਾਰਕਿੰਗ ਦੀ ਵਿਵਸਥਾ ਕੀਤੀ ਗਈ ਹੈ। ਪੁਲਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣੇ ਵਾਹਨ ਸਿਰਫ਼ ਨਿਰਧਾਰਤ ਪਾਰਕਿੰਗ ਸਥਾਨਾਂ ‘ਤੇ ਹੀ ਖੜ੍ਹੇ ਕਰਨ।
ਘਰੋਂ ਨਿਕਲਣ ਤੋਂ ਪਹਿਲਾਂ ਟ੍ਰੈਫਿਕ ਪ੍ਰਬੰਧ ਦੇਖਣ ਦੀ ਅਪੀਲ
ਲੁਧਿਆਣਾ ਪੁਲਸ ਨੇ ਕਥਾ ਦੇ ਪੰਜਾਂ ਦਿਨ ਸ਼ਹਿਰ ਵਿੱਚ ਆਵਾਜਾਈ ਨੂੰ ਸੁਚਾਰੂ ਬਣਾਈ ਰੱਖਣ ਲਈ ਲੋਕਾਂ ਨੂੰ ਨਿਰਧਾਰਤ ਰੂਟਾਂ ਦੀ ਪਾਲਣਾ ਕਰਨ ਲਈ ਕਿਹਾ ਹੈ। ਪੁਲਸ ਮੁਤਾਬਕ ਮੌਕੇ ਦੀ ਸਥਿਤੀ ਅਨੁਸਾਰ ਆਵਾਜਾਈ ਪ੍ਰਬੰਧਾਂ ਵਿੱਚ ਤਬਦੀਲੀ ਕੀਤੀ ਜਾ ਸਕਦੀ ਹੈ। ਇਸ ਲਈ ਚੰਡੀਗੜ੍ਹ ਰੋਡ ਅਤੇ ਆਸ-ਪਾਸ ਦੇ ਇਲਾਕਿਆਂ ਵੱਲ ਜਾਣ ਵਾਲੇ ਲੋਕਾਂ ਨੂੰ ਘਰੋਂ ਨਿਕਲਣ ਤੋਂ ਪਹਿਲਾਂ ਟ੍ਰੈਫਿਕ ਪ੍ਰਬੰਧਾਂ ਦੀ ਜਾਣਕਾਰੀ ਲੈਣ ਦੀ ਸਲਾਹ ਦਿੱਤੀ ਗਈ ਹੈ।
