ਨਵੀਂ ਦਿੱਲੀ :- ਆਈਚੀ ਨਾਗੋਯਾ ਵਿੱਚ ਚੱਲ ਰਹੀਆਂ ਏਸ਼ੀਅਨ ਗੇਮਜ਼ 2026 ਵਿੱਚ ਭਾਰਤ ਦੇ ਤਗਮਿਆਂ ਦੀ ਗਿਣਤੀ 8 ਹੋ ਗਈ ਹੈ। ਸ਼ੂਟਿੰਗ ਦੇ ਮਹਿਲਾ ਸਕੀਟ ਟੀਮ ਮੁਕਾਬਲੇ ਵਿੱਚ ਰਾਈਜ਼ਾ ਢਿੱਲੋਂ, ਮਹੇਸ਼ਵਰੀ ਚੌਹਾਨ ਅਤੇ ਪਰੀਨਾਜ਼ ਧਾਲੀਵਾਲ ਨੇ ਭਾਰਤ ਲਈ ਕਾਂਸੀ ਦਾ ਤਗਮਾ ਜਿੱਤਿਆ। ਇਸ ਤਰ੍ਹਾਂ ਭਾਰਤ ਦੇ ਹੁਣ ਤੱਕ ਮਿਲੇ 8 ਤਗਮਿਆਂ ਵਿੱਚੋਂ 6 ਤਗਮੇ ਸ਼ੂਟਿੰਗ ਦੇ ਮੁਕਾਬਲਿਆਂ ਵਿੱਚ ਆਏ ਹਨ।
ਭਾਰਤੀ ਤਿਕੜੀ ਨੇ 331 ਅੰਕ ਕੀਤੇ ਹਾਸਲ
ਭਾਰਤੀ ਮਹਿਲਾ ਸਕੀਟ ਟੀਮ ਨੇ ਕੁੱਲ 331 ਅੰਕ ਹਾਸਲ ਕਰਕੇ ਤੀਜਾ ਸਥਾਨ ਹਾਸਲ ਕੀਤਾ। ਪਰੀਨਾਜ਼ ਧਾਲੀਵਾਲ ਅਤੇ ਰਾਈਜ਼ਾ ਢਿੱਲੋਂ ਨੇ 111-111 ਅੰਕ ਬਣਾਏ, ਜਦਕਿ ਮਹੇਸ਼ਵਰੀ ਚੌਹਾਨ ਦੇ ਖਾਤੇ ਵਿੱਚ 109 ਅੰਕ ਰਹੇ। ਤਿੰਨਾਂ ਦੇ ਸਾਂਝੇ ਪ੍ਰਦਰਸ਼ਨ ਨੇ ਭਾਰਤ ਨੂੰ ਤਗਮਾ ਦਿਵਾਇਆ।
ਚੀਨ ਨੂੰ ਸੋਨ, ਕਜ਼ਾਖਸਤਾਨ ਨੂੰ ਚਾਂਦੀ
ਮੁਕਾਬਲੇ ਵਿੱਚ ਚੀਨ ਦੀ ਟੀਮ ਨੇ 357 ਅੰਕਾਂ ਨਾਲ ਪਹਿਲਾ ਸਥਾਨ ਹਾਸਲ ਕਰਦਿਆਂ ਸੋਨ ਤਗਮਾ ਜਿੱਤਿਆ। ਕਜ਼ਾਖਸਤਾਨ ਦੀ ਟੀਮ 337 ਅੰਕਾਂ ਨਾਲ ਦੂਜੇ ਸਥਾਨ ’ਤੇ ਰਹੀ ਅਤੇ ਉਸ ਨੂੰ ਚਾਂਦੀ ਦਾ ਤਗਮਾ ਮਿਲਿਆ। ਭਾਰਤੀ ਟੀਮ 331 ਅੰਕਾਂ ਨਾਲ ਤੀਜੇ ਸਥਾਨ ’ਤੇ ਰਹੀ।
ਰਾਈਜ਼ਾ ਤੇ ਪਰੀਨਾਜ਼ ਇੰਡੀਵਿਜੁਅਲ ਫਾਈਨਲ ’ਚ
ਟੀਮ ਮੁਕਾਬਲੇ ਦੇ ਨਾਲ ਮਹਿਲਾ ਸਕੀਟ ਦੇ ਵਿਅਕਤੀਗਤ ਮੁਕਾਬਲੇ ਵਿੱਚ ਵੀ ਭਾਰਤੀ ਸ਼ੂਟਰਾਂ ਨੇ ਆਪਣੀ ਜਗ੍ਹਾ ਬਣਾਈ ਹੈ। ਪਰੀਨਾਜ਼ ਧਾਲੀਵਾਲ ਨੇ 8ਵੇਂ ਸਥਾਨ ’ਤੇ ਰਹਿੰਦਿਆਂ ਫਾਈਨਲ ਲਈ ਕੁਆਲੀਫਾਈ ਕੀਤਾ, ਜਦਕਿ ਰਾਈਜ਼ਾ ਢਿੱਲੋਂ 9ਵੇਂ ਸਥਾਨ ’ਤੇ ਰਹਿਣ ਦੇ ਬਾਵਜੂਦ ਫਾਈਨਲ ਵਿੱਚ ਪਹੁੰਚ ਗਈ।
ਇਸ ਦੀ ਵਜ੍ਹਾ ਮੁਕਾਬਲੇ ਦਾ ਉਹ ਨਿਯਮ ਹੈ, ਜਿਸ ਤਹਿਤ ਇੱਕ ਦੇਸ਼ ਦੇ ਵੱਧ ਤੋਂ ਵੱਧ ਦੋ ਸ਼ੂਟਰ ਹੀ ਟਾਪ-8 ਵਿੱਚ ਜਗ੍ਹਾ ਬਣਾ ਸਕਦੇ ਹਨ। ਚੀਨ ਦੇ ਤਿੰਨ ਸ਼ੂਟਰ ਟਾਪ-8 ਵਿੱਚ ਆਉਣ ਕਾਰਨ ਰਾਈਜ਼ਾ ਢਿੱਲੋਂ ਨੂੰ ਫਾਈਨਲ ਵਿੱਚ ਜਗ੍ਹਾ ਮਿਲੀ।
ਸ਼ੂਟਿੰਗ ਨੇ ਭਾਰਤ ਦੀ ਤਗਮਾ ਮੁਹਿੰਮ ਨੂੰ ਦਿੱਤੀ ਮਜ਼ਬੂਤੀ
ਏਸ਼ੀਅਨ ਗੇਮਜ਼ ਵਿੱਚ ਭਾਰਤ ਨੂੰ ਸ਼ੂਟਿੰਗ ਰਾਹੀਂ ਹੁਣ ਤੱਕ 6 ਤਗਮੇ ਮਿਲ ਚੁੱਕੇ ਹਨ। ਇਸ ਤੋਂ ਪਹਿਲਾਂ 10 ਮੀਟਰ ਏਅਰ ਰਾਈਫਲ ਦੇ ਮਹਿਲਾ ਅਤੇ ਪੁਰਸ਼ ਟੀਮ ਤੇ ਵਿਅਕਤੀਗਤ ਮੁਕਾਬਲਿਆਂ ਵਿੱਚ ਭਾਰਤੀ ਨਿਸ਼ਾਨੇਬਾਜ਼ਾਂ ਨੇ ਚਾਂਦੀ ਦੇ ਤਗਮੇ ਜਿੱਤੇ ਸਨ। ਇਸੇ ਮੁਕਾਬਲੇ ਦੇ ਵਿਅਕਤੀਗਤ ਵਰਗ ਵਿੱਚ ਭਾਰਤ ਦੇ ਖਾਤੇ ਵਿੱਚ ਕਾਂਸੀ ਦਾ ਤਗਮਾ ਵੀ ਆਇਆ ਸੀ।
