ਗ੍ਰਿਫ਼ਤਾਰ ਮੁਲਜ਼ਮਾਂ ਦੀ ਪਛਾਣ ਮਹਿਕਦੀਪ ਕੌਰ (21) ਅਤੇ ਦਵਿੰਦਰ ਸਿੰਘ (22) ਵਜੋਂ ਹੋਈ ਹੈ। ਦੋਵੇਂ ਗੁਰਦਾਸਪੁਰ ਦੇ ਰਹਿਣ ਵਾਲੇ ਦੱਸੇ ਜਾਂਦੇ ਹਨ। ਰਾਜਸਥਾਨ ਏ.ਟੀ.ਐੱਸ. ਦੇ ਏ.ਡੀ.ਜੀ. ਦਿਨੇਸ਼ ਐੱਮ.ਐੱਨ. ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਦੌਰਾਨ ਦੋਵਾਂ ਦੀ ਇਸ ਧਮਾਕੇ ਵਿੱਚ ਕਥਿਤ ਸ਼ਮੂਲੀਅਤ ਸਾਹਮਣੇ ਆਈ ਹੈ। ਜਾਂਚਕਰਤਾਵਾਂ ਨੂੰ ਸ਼ੱਕ ਹੈ ਕਿ ਮਹਿਕਦੀਪ ਕੌਰ ਨੂੰ ਧਮਾਕਾ ਕਰਨ ਲਈ ਪੈਸੇ ਦਿੱਤੇ ਗਏ ਸਨ। ਮਾਮਲੇ ਦੀ ਜਾਂਚ ਲਈ ਪੁਲਸ ਦੀ ਇਕ ਟੀਮ ਪੰਜਾਬ ਵੀ ਭੇਜੀ ਗਈ ਹੈ।
ਮਦਦ ਕਰਨ ਦੇ ਸ਼ੱਕ ’ਚ ਤਿੰਨ ਹੋਰ ਹਿਰਾਸਤ ’ਚ
ਪੁਲਸ ਨੇ ਦੋਵਾਂ ਮੁਲਜ਼ਮਾਂ ਦੀ ਮਦਦ ਕਰਨ ਦੇ ਸ਼ੱਕ ਹੇਠ ਤਿੰਨ ਹੋਰ ਵਿਅਕਤੀਆਂ ਨੂੰ ਵੀ ਹਿਰਾਸਤ ਵਿੱਚ ਲਿਆ ਹੈ। ਬੀਕਾਨੇਰ ਰੇਂਜ ਦੇ ਆਈ.ਜੀ. ਓਮ ਪ੍ਰਕਾਸ਼ ਅਨੁਸਾਰ, ਇਨ੍ਹਾਂ ਵਿੱਚੋਂ ਇਕ ਨੇ ਕਥਿਤ ਤੌਰ ’ਤੇ ਮੁਲਜ਼ਮਾਂ ਨੂੰ ਠਹਿਰਨ ਲਈ ਥਾਂ ਮੁਹੱਈਆ ਕਰਵਾਈ, ਦੂਜੇ ਨੇ ਮੋਟਰਸਾਈਕਲ ਦਾ ਪ੍ਰਬੰਧ ਕੀਤਾ, ਜਦਕਿ ਤੀਜੇ ਨੇ ਉਨ੍ਹਾਂ ਨੂੰ ਘਟਨਾ ਵਾਲੀ ਥਾਂ ਤੱਕ ਪਹੁੰਚਾਇਆ ਅਤੇ ਰੇਲਵੇ ਪਟੜੀ ਦਿਖਾਈ ਸੀ।
ਦੋਵੇਂ ਗ੍ਰਿਫ਼ਤਾਰ ਮੁਲਜ਼ਮਾਂ ਤੋਂ ਸ੍ਰੀਗੰਗਾਨਗਰ ਪੁਲਸ ਪੁੱਛਗਿੱਛ ਕਰ ਰਹੀ ਹੈ। ਇਸ ਘਟਨਾ ਵਿੱਚ ਹੋਰ ਵਿਅਕਤੀਆਂ ਦੀ ਸ਼ਮੂਲੀਅਤ ਦਾ ਪਤਾ ਲਗਾਉਣ ਲਈ ਵੀ ਜਾਂਚ ਜਾਰੀ ਹੈ।
ਧਮਾਕੇ ਨਾਲ ਪਟੜੀ ਨੂੰ ਹੋਇਆ ਸੀ ਨੁਕਸਾਨ
ਇਹ ਧਮਾਕਾ 3 ਨਵੰਬਰ ਨੂੰ ਹੋਇਆ ਸੀ, ਜਿਸ ਕਾਰਨ ਰੇਲਵੇ ਲਾਈਨ ਦੇ ਦੋ ਕੰਕਰੀਟ ਅਤੇ ਸਟੀਲ ਦੇ ਸਲੀਪਰ ਟੁੱਟ ਗਏ ਸਨ। ਪਟੜੀ ਨੂੰ ਵੀ ਨੁਕਸਾਨ ਪਹੁੰਚਿਆ ਸੀ ਅਤੇ ਮੌਕੇ ’ਤੇ ਕਰੀਬ ਢਾਈ ਫੁੱਟ ਡੂੰਘਾ ਟੋਆ ਬਣ ਗਿਆ ਸੀ। ਧਮਾਕੇ ਤੋਂ ਲਗਭਗ 75 ਮਿੰਟ ਪਹਿਲਾਂ ਇਸੇ ਰਸਤੇ ਤੋਂ ਅਨੂਪਗੜ੍ਹ-ਸੂਰਤਗੜ੍ਹ ਯਾਤਰੀ ਰੇਲਗੱਡੀ ਲੰਘੀ ਸੀ। ਇਸ ਕਾਰਨ ਇਹ ਖ਼ਦਸ਼ਾ ਵੀ ਜਤਾਇਆ ਗਿਆ ਕਿ ਧਮਾਕੇ ਦਾ ਨਿਸ਼ਾਨਾ ਚੱਲਦੀ ਰੇਲਗੱਡੀ ਹੋ ਸਕਦੀ ਸੀ।
ਵੱਡੀ ਸਾਜ਼ਿਸ਼ ਦੇ ਪੱਖ ਤੋਂ ਵੀ ਜਾਂਚ
ਪੁਲਸ ਹਾਲੇ ਤੱਕ ਧਮਾਕੇ ਪਿੱਛੇ ਅਸਲ ਮਕਸਦ ਦਾ ਪਤਾ ਨਹੀਂ ਲਗਾ ਸਕੀ ਹੈ। ਜਾਂਚ ਅਧਿਕਾਰੀਆਂ ਨੂੰ ਸ਼ੱਕ ਹੈ ਕਿ ਮੁਲਜ਼ਮਾਂ ਨੇ ਕਿਸੇ ਹੋਰ ਦੇ ਇਸ਼ਾਰੇ ਤੇ ਇਹ ਕਾਰਵਾਈ ਕੀਤੀ ਹੋ ਸਕਦੀ ਹੈ। ਇਸ ਪਿੱਛੇ ਵੱਡੀ ਸਾਜ਼ਿਸ਼ ਹੋਣ ਦੀ ਸੰਭਾਵਨਾ ਸਮੇਤ ਤੋੜ-ਫੋੜ ਦੇ ਹੋਰ ਪਹਿਲੂਆਂ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।
ਅਧਿਕਾਰੀਆਂ ਅਨੁਸਾਰ ਪੰਜਾਬ ਪੁਲਸ ਨਾਲ ਤਾਲਮੇਲ ਕਰਕੇ ਮੁਲਜ਼ਮਾਂ ਦੇ ਪਿਛਲੇ ਅਪਰਾਧਿਕ ਰਿਕਾਰਡ ਅਤੇ ਕਿਸੇ ਸੰਗਠਨ ਨਾਲ ਸਬੰਧਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਹਾਲੇ ਤੱਕ ਧਮਾਕੇ ਦੇ ਕਾਰਨਾਂ ਬਾਰੇ ਪੁਲਸ ਵੱਲੋਂ ਕੋਈ ਅੰਤਿਮ ਨਤੀਜਾ ਸਾਹਮਣੇ ਨਹੀਂ ਰੱਖਿਆ ਗਿਆ।
