ਰੂਸ :- ਰੂਸ-ਯੂਕ੍ਰੇਨ ਜੰਗ ਦੇ ਲਗਾਤਾਰ ਖਿੱਚਦੇ ਜਾਣ ਦਰਮਿਆਨ ਇੱਕ ਅਹਿਮ ਕੂਟਨੀਤਕ ਬਦਲਾਅ ਸਾਹਮਣੇ ਆਇਆ ਹੈ। ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਪਹਿਲੀ ਵਾਰ ਜਨਤਕ ਤੌਰ ’ਤੇ ਇਹ ਸੰਕੇਤ ਦਿੱਤਾ ਹੈ ਕਿ ਉਹ ਯੂਕ੍ਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨਾਲ ਕਿਸੇ ਤੀਜੇ ਦੇਸ਼ ਵਿੱਚ ਮੁਲਾਕਾਤ ਕਰਨ ਲਈ ਤਿਆਰ ਹਨ। ਹਾਲਾਂਕਿ ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਇਹ ਬੈਠਕ ਸਿਰਫ਼ ਅੰਤਿਮ ਸ਼ਾਂਤੀ ਸਮਝੌਤੇ ਨੂੰ ਅਮਲੀ ਜਾਮਾ ਪਹਿਨਾਉਣ ਲਈ ਹੋਵੇਗੀ, ਨਾ ਕਿ ਮੁੱਢਲੀਆਂ ਗੱਲਬਾਤਾਂ ਲਈ।
‘ਸਮਝੌਤਾ ਪਹਿਲਾਂ, ਮੁਲਾਕਾਤ ਬਾਅਦ ਵਿੱਚ’
ਮੀਡੀਆ ਨਾਲ ਗੱਲਬਾਤ ਦੌਰਾਨ ਪੁਤਿਨ ਨੇ ਕਿਹਾ ਕਿ ਉਨ੍ਹਾਂ ਨੇ ਕਦੇ ਵੀ ਗੱਲਬਾਤ ਤੋਂ ਇਨਕਾਰ ਨਹੀਂ ਕੀਤਾ। ਉਨ੍ਹਾਂ ਅਨੁਸਾਰ ਜੇਕਰ ਜ਼ੇਲੇਂਸਕੀ ਚਾਹੁੰਦੇ ਹਨ ਤਾਂ ਉਹ ਮਾਸਕੋ ਵੀ ਆ ਸਕਦੇ ਹਨ ਜਾਂ ਫਿਰ ਦੋਵੇਂ ਕਿਸੇ ਹੋਰ ਦੇਸ਼ ਵਿੱਚ ਮਿਲ ਸਕਦੇ ਹਨ। ਪਰ ਰਾਸ਼ਟਰਪਤੀ ਪੱਧਰ ਦੀ ਮੁਲਾਕਾਤ ਤਦੋਂ ਹੀ ਹੋਣੀ ਚਾਹੀਦੀ ਹੈ ਜਦੋਂ ਦੋਵੇਂ ਧਿਰਾਂ ਦੇ ਮਾਹਿਰ ਪਹਿਲਾਂ ਹੀ ਸ਼ਾਂਤੀ ਸਮਝੌਤੇ ਦੇ ਸਾਰੇ ਮੁੱਦੇ ਸੁਲਝਾ ਲੈਣ। ਪੁਤਿਨ ਨੇ ਕਿਹਾ ਕਿ ਸਿਰਫ਼ ਫੋਟੋ ਸੈਸ਼ਨ ਜਾਂ ਲੰਬੀਆਂ ਬੇਨਤੀਜਾ ਬੈਠਕਾਂ ਦਾ ਕੋਈ ਲਾਭ ਨਹੀਂ ਹੁੰਦਾ।
ਮਿੰਸਕ ਸਮਝੌਤਿਆਂ ਦਾ ਹਵਾਲਾ ਦੇ ਕੇ ਜਤਾਈ ਨਾਰਾਜ਼ਗੀ
ਰੂਸੀ ਰਾਸ਼ਟਰਪਤੀ ਨੇ 2014 ਅਤੇ 2015 ਦੇ ਮਿੰਸਕ ਸਮਝੌਤਿਆਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਪਿਛਲੇ ਤਜਰਬਿਆਂ ਵਿੱਚ ਘੰਟਿਆਂ ਚੱਲੀਆਂ ਗੱਲਬਾਤਾਂ ਦੇ ਬਾਵਜੂਦ ਢੁੱਕਵਾਂ ਨਤੀਜਾ ਨਹੀਂ ਨਿਕਲਿਆ ਸੀ। ਇਸ ਲਈ ਹੁਣ ਰੂਸ ਚਾਹੁੰਦਾ ਹੈ ਕਿ ਹਰ ਬਿੰਦੂ ਪਹਿਲਾਂ ਹੀ ਸਪੱਸ਼ਟ ਹੋਵੇ ਅਤੇ ਉਸ ਤੋਂ ਬਾਅਦ ਹੀ ਉੱਚ ਪੱਧਰੀ ਮੁਲਾਕਾਤ ਕੀਤੀ ਜਾਵੇ। ਪੁਤਿਨ ਦੇ ਇਸ ਬਿਆਨ ਨੂੰ ਮਾਸਕੋ ਦੇ ਰਵੱਈਏ ਵਿੱਚ ਨਰਮੀ ਵਜੋਂ ਵੀ ਦੇਖਿਆ ਜਾ ਰਿਹਾ ਹੈ।
ਵਿਸ਼ਵ ਭਾਈਚਾਰੇ ਦੀ ਨਜ਼ਰ ਸ਼ਾਂਤੀ ਯਤਨਾਂ ’ਤੇ
ਫਰਵਰੀ 2022 ਵਿੱਚ ਸ਼ੁਰੂ ਹੋਈ ਰੂਸ-ਯੂਕ੍ਰੇਨ ਜੰਗ ਹੁਣ ਪੰਜਵੇਂ ਸਾਲ ਵਿੱਚ ਦਾਖ਼ਲ ਹੋ ਚੁੱਕੀ ਹੈ। ਲੰਬੇ ਸਮੇਂ ਤੋਂ ਚੱਲ ਰਹੇ ਟਕਰਾਅ ਕਾਰਨ ਦੋਵੇਂ ਦੇਸ਼ਾਂ ਨੂੰ ਭਾਰੀ ਜਾਨੀ ਅਤੇ ਆਰਥਿਕ ਨੁਕਸਾਨ ਝੱਲਣਾ ਪਿਆ ਹੈ। ਇਸੇ ਕਾਰਨ ਅੰਤਰਰਾਸ਼ਟਰੀ ਭਾਈਚਾਰਾ ਲਗਾਤਾਰ ਜੰਗਬੰਦੀ ਅਤੇ ਸ਼ਾਂਤੀ ਵਾਰਤਾਂ ਲਈ ਦਬਾਅ ਬਣਾ ਰਿਹਾ ਹੈ। ਪੁਤਿਨ ਦਾ ਇਹ ਤਾਜ਼ਾ ਬਿਆਨ ਅਜਿਹੇ ਸਮੇਂ ਵਿੱਚ ਆਇਆ ਹੈ ਜਦੋਂ ਦੁਨੀਆ ਦੀਆਂ ਵੱਡੀਆਂ ਤਾਕਤਾਂ ਜੰਗ ਖਤਮ ਕਰਨ ਲਈ ਕੂਟਨੀਤਕ ਕੋਸ਼ਿਸ਼ਾਂ ਤੇਜ਼ ਕਰ ਰਹੀਆਂ ਹਨ।
