ਮਾਛੀਵਾੜਾ :- ਮਾਛੀਵਾੜਾ ਦੇ ਇੱਕ ਫੂਡ ਕੈਫੇ ਵਿੱਚ ਪਰੋਸੇ ਗਏ ਪੀਜ਼ਾ ਵਿੱਚ ਜ਼ਿੰਦਾ ਸੁੰਡੀਆਂ ਮਿਲਣ ਦਾ ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਸਿਹਤ ਵਿਭਾਗ ਨੇ ਤੁਰੰਤ ਕਾਰਵਾਈ ਕੀਤੀ। ਸ਼ਿਕਾਇਤ ਮਿਲਣ ਉਪਰੰਤ ਵਿਭਾਗ ਦੀ ਟੀਮ ਨੇ ਮੌਕੇ ‘ਤੇ ਪਹੁੰਚ ਕੇ ਜਾਂਚ ਕੀਤੀ, ਜਿੱਥੇ ਖਾਣ-ਪੀਣ ਨਾਲ ਸਬੰਧਤ ਕਈ ਖਾਮੀਆਂ ਸਾਹਮਣੇ ਆਈਆਂ। ਇਸ ਤੋਂ ਬਾਅਦ ਕੈਫੇ ਖ਼ਿਲਾਫ਼ ਚਲਾਨ ਜਾਰੀ ਕੀਤਾ ਗਿਆ।
ਗਾਹਕ ਨੇ ਪੀਜ਼ਾ ‘ਚ ਦੇਖੀ ਜ਼ਿੰਦਾ ਸੁੰਡੀ
ਪਿੰਡ ਹੇਡੋਂ ਬੇਟ ਦੇ ਰਹਿਣ ਵਾਲੇ ਵਿਸ਼ਾਲ ਨੇ ਦੱਸਿਆ ਕਿ ਉਸ ਨੇ ਮਾਛੀਵਾੜਾ ਸਥਿਤ ‘ਹੰਗਰੀ ਪੁਆਇੰਟ’ ਤੋਂ ਪੀਜ਼ਾ ਮੰਗਵਾਇਆ ਸੀ। ਜਦੋਂ ਪੀਜ਼ਾ ਪਰੋਸਿਆ ਗਿਆ ਤਾਂ ਉਸ ਨੇ ਉਸ ‘ਤੇ ਜ਼ਿੰਦਾ ਸੁੰਡੀ ਰੇਂਗਦੀ ਹੋਈ ਦੇਖੀ। ਇਸ ਬਾਰੇ ਕੈਫੇ ਪ੍ਰਬੰਧਕ ਨੂੰ ਜਾਣੂ ਕਰਵਾਇਆ ਗਿਆ, ਜਿਸ ਨੇ ਪੀਜ਼ਾ ਬਦਲਣ ਦੀ ਪੇਸ਼ਕਸ਼ ਕੀਤੀ, ਪਰ ਗਾਹਕ ਨੇ ਇਹ ਪੇਸ਼ਕਸ਼ ਸਵੀਕਾਰ ਕਰਨ ਦੀ ਬਜਾਏ ਮਾਮਲੇ ਦੀ ਸ਼ਿਕਾਇਤ ਸਿਹਤ ਵਿਭਾਗ ਕੋਲ ਕਰ ਦਿੱਤੀ।
ਸਿਹਤ ਵਿਭਾਗ ਨੇ ਕੀਤੀ ਜਾਂਚ, ਮਿਲੀਆਂ ਕਈ ਬੇਨਿਯਮੀਆਂ
ਸ਼ਿਕਾਇਤ ਮਿਲਦੇ ਹੀ ਐੱਸ.ਐੱਮ.ਓ. ਡਾ. ਲਖਵਿੰਦਰ ਸਿੰਘ ਦੇ ਨਿਰਦੇਸ਼ਾਂ ‘ਤੇ ਡਾ. ਦਵਿੰਦਰ ਵਰਮਾ ਦੀ ਅਗਵਾਈ ਹੇਠ ਟੀਮ ਨੇ ਕੈਫੇ ਦਾ ਨਿਰੀਖਣ ਕੀਤਾ। ਜਾਂਚ ਦੌਰਾਨ ਸਫ਼ਾਈ ਅਤੇ ਭੋਜਨ ਸੁਰੱਖਿਆ ਨਾਲ ਸਬੰਧਤ ਕਈ ਖਾਮੀਆਂ ਸਾਹਮਣੇ ਆਈਆਂ। ਅਧਿਕਾਰੀਆਂ ਅਨੁਸਾਰ ਕੈਫੇ ਪ੍ਰਬੰਧਨ ਨੇ ਵੀ ਪੀਜ਼ਾ ਵਿੱਚ ਸੁੰਡੀ ਮਿਲਣ ਦੀ ਗੱਲ ਮੰਨੀ।
ਕੈਫੇ ਨੂੰ ਕੀਤਾ ਗਿਆ ਚਲਾਨ
ਜਾਂਚ ਤੋਂ ਬਾਅਦ ਨਗਰ ਕੌਂਸਲ ਦੇ ਇੰਸਪੈਕਟਰ ਭੁਪਿੰਦਰ ਸਿੰਘ ਨੇ ਕੈਫੇ ਖ਼ਿਲਾਫ਼ ਨਿਯਮਾਂ ਦੀ ਉਲੰਘਣਾ ਕਰਨ ਦੇ ਦੋਸ਼ ਹੇਠ ਚਲਾਨ ਜਾਰੀ ਕੀਤਾ। ਸਿਹਤ ਵਿਭਾਗ ਨੇ ਭੋਜਨ ਤਿਆਰ ਕਰਨ ਅਤੇ ਪਰੋਸਣ ਦੌਰਾਨ ਸਫ਼ਾਈ ਦੇ ਮਾਪਦੰਡਾਂ ਦੀ ਪਾਲਣਾ ਕਰਨ ਦੇ ਨਿਰਦੇਸ਼ ਵੀ ਦਿੱਤੇ ਹਨ।
ਨਾਲ ਲੱਗਦੀ ਕਰਿਆਨੇ ਦੀ ਦੁਕਾਨ ਤੋਂ ਮਿਲਿਆ ਮਿਆਦ ਪੁੱਗਿਆ ਸਮਾਨ
ਇਸੇ ਦੌਰਾਨ ਸਿਹਤ ਵਿਭਾਗ ਨੇ ਕੈਫੇ ਦੇ ਉੱਪਰ ਸਥਿਤ ਇੱਕ ਕਰਿਆਨੇ ਦੀ ਦੁਕਾਨ ਦੀ ਵੀ ਜਾਂਚ ਕੀਤੀ। ਨਿਰੀਖਣ ਦੌਰਾਨ ਵੱਡੀ ਮਾਤਰਾ ਵਿੱਚ ਮਿਆਦ ਪੁੱਗ ਚੁੱਕਾ ਖਾਣ-ਪੀਣ ਦਾ ਸਮਾਨ ਵਿਕਰੀ ਲਈ ਰੱਖਿਆ ਮਿਲਿਆ। ਅਧਿਕਾਰੀਆਂ ਨੇ ਸਮਾਨ ਨੂੰ ਜ਼ਬਤ ਕਰਕੇ ਨਸ਼ਟ ਕਰਵਾਇਆ ਅਤੇ ਦੁਕਾਨ ਮਾਲਕ ਖ਼ਿਲਾਫ਼ ਵੀ ਚਲਾਨ ਜਾਰੀ ਕੀਤਾ।
ਲੋਕਾਂ ਨੂੰ ਦਿੱਤੀ ਸਾਵਧਾਨੀ ਵਰਤਣ ਦੀ ਸਲਾਹ
ਡਾ. ਦਵਿੰਦਰ ਵਰਮਾ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਬਾਹਰੋਂ ਖਾਣ-ਪੀਣ ਵਾਲੀਆਂ ਵਸਤੂਆਂ ਖਰੀਦਦੇ ਸਮੇਂ ਗੁਣਵੱਤਾ ਅਤੇ ਸਫ਼ਾਈ ਦਾ ਧਿਆਨ ਰੱਖਣ। ਉਨ੍ਹਾਂ ਕਿਹਾ ਕਿ ਪੈਕ ਕੀਤੀਆਂ ਵਸਤੂਆਂ ਖਰੀਦਣ ਤੋਂ ਪਹਿਲਾਂ ਉਨ੍ਹਾਂ ਦੀ ਮਿਆਦ ਪੁੱਗਣ ਦੀ ਤਾਰੀਖ ਜ਼ਰੂਰ ਜਾਂਚੀ ਜਾਵੇ ਤਾਂ ਜੋ ਸਿਹਤ ਨਾਲ ਖਿਲਵਾੜ ਤੋਂ ਬਚਿਆ ਜਾ ਸਕੇ।
