ਨਵੀਂ ਦਿੱਲੀ :- ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਨਾਲ ਜੁੜੇ ਕਰੋੜਾਂ ਮੈਂਬਰਾਂ ਲਈ ਰਾਹਤ ਭਰੀ ਖ਼ਬਰ ਹੈ। ਕਰੀਬ ਦੋ ਹਫ਼ਤਿਆਂ ਤੱਕ ਬੰਦ ਰਹਿਣ ਤੋਂ ਬਾਅਦ EPFO ਦਾ ਪਾਸਬੁੱਕ ਪੋਰਟਲ ਮੁੜ ਚਾਲੂ ਕਰ ਦਿੱਤਾ ਗਿਆ ਹੈ। ਹੁਣ ਮੈਂਬਰ ਆਪਣੇ ਯੂਨੀਵਰਸਲ ਅਕਾਊਂਟ ਨੰਬਰ (UAN) ਰਾਹੀਂ ਲੌਗਇਨ ਕਰਕੇ ਆਪਣੇ ਪੀਐੱਫ ਖਾਤੇ ਦਾ ਬਕਾਇਆ, ਲੈਣ-ਦੇਣ ਅਤੇ ਵਿਆਜ ਨਾਲ ਸਬੰਧਤ ਜਾਣਕਾਰੀ ਆਨਲਾਈਨ ਦੇਖ ਸਕਦੇ ਹਨ।
ਤਕਨੀਕੀ ਅਪਗ੍ਰੇਡ ਕਾਰਨ ਬੰਦ ਸੀ ਪੋਰਟਲ
EPFO ਨੇ ਆਪਣੇ ਡੇਟਾਬੇਸ ਦੇ ਏਕੀਕਰਨ ਅਤੇ ਸਾਫਟਵੇਅਰ ਅਪਗ੍ਰੇਡ ਦੇ ਕੰਮ ਲਈ ਪਾਸਬੁੱਕ ਸੇਵਾ ਕੁਝ ਸਮੇਂ ਲਈ ਬੰਦ ਰੱਖੀ ਸੀ। ਹੁਣ ਇਹ ਸੇਵਾ ਮੁੜ ਬਹਾਲ ਕਰ ਦਿੱਤੀ ਗਈ ਹੈ। ਹਾਲਾਂਕਿ ਵਿਭਾਗ ਨੇ ਸਪੱਸ਼ਟ ਕੀਤਾ ਹੈ ਕਿ ਪੁਰਾਣੇ ਰਿਕਾਰਡ ਅਤੇ ਲੰਬਿਤ ਐਂਟਰੀਆਂ ਨੂੰ ਪੂਰੀ ਤਰ੍ਹਾਂ ਅਪਡੇਟ ਹੋਣ ਵਿੱਚ ਕੁਝ ਹੋਰ ਸਮਾਂ ਲੱਗ ਸਕਦਾ ਹੈ।
ਹੁਣ ਖਾਤੇ ਦੀ ਜਾਣਕਾਰੀ ਆਸਾਨੀ ਨਾਲ ਹੋਵੇਗੀ ਉਪਲਬਧ
ਪੋਰਟਲ ਮੁੜ ਸ਼ੁਰੂ ਹੋਣ ਨਾਲ ਮੈਂਬਰ ਆਪਣੇ UAN ਦੀ ਮਦਦ ਨਾਲ ਲੌਗਇਨ ਕਰਕੇ ਮੌਜੂਦਾ ਵਿੱਤੀ ਸਾਲ ਦੇ ਸਾਰੇ ਲੈਣ-ਦੇਣ ਦੀ ਜਾਣਕਾਰੀ ਦੇਖ ਸਕਦੇ ਹਨ। EPFO ਅਨੁਸਾਰ ਪਿਛਲੇ ਵਿੱਤੀ ਸਾਲਾਂ ਦਾ ਡਾਟਾ ਵੀ ਪੜਾਅਵਾਰ ਅਪਡੇਟ ਕੀਤਾ ਜਾਵੇਗਾ।
15 ਜੁਲਾਈ ਤੋਂ ਸ਼ੁਰੂ ਹੋ ਸਕਦੀ ਹੈ ਵਿਆਜ ਜਮ੍ਹਾਂ ਕਰਨ ਦੀ ਪ੍ਰਕਿਰਿਆ
EPFO ਨੇ ਵਿੱਤੀ ਸਾਲ 2025-26 ਲਈ 8.25 ਫ਼ੀਸਦੀ ਸਾਲਾਨਾ ਵਿਆਜ ਦਰ ਮਨਜ਼ੂਰ ਕੀਤੀ ਹੈ। ਜਾਣਕਾਰੀ ਅਨੁਸਾਰ, ਮੈਂਬਰਾਂ ਦੇ ਖਾਤਿਆਂ ਵਿੱਚ ਵਿਆਜ ਦੀ ਰਕਮ ਜਮ੍ਹਾਂ ਕਰਨ ਦੀ ਪ੍ਰਕਿਰਿਆ 15 ਜੁਲਾਈ ਤੋਂ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ। ਵਿਆਜ ਜਮ੍ਹਾਂ ਹੋਣ ਤੋਂ ਬਾਅਦ ਮੈਂਬਰ ਇਸ ਦੀ ਐਂਟਰੀ ਆਪਣੀ ਪਾਸਬੁੱਕ ਵਿੱਚ ਦੇਖ ਸਕਣਗੇ। ਹਾਲਾਂਕਿ ਸਾਰੇ ਖਾਤਿਆਂ ਵਿੱਚ ਇਹ ਪ੍ਰਕਿਰਿਆ ਪੂਰੀ ਹੋਣ ਵਿੱਚ ਕੁਝ ਦਿਨ ਲੱਗ ਸਕਦੇ ਹਨ।
UAN ਐਕਟੀਵੇਟ ਕਰਨ ਦਾ ਨਵਾਂ ਤਰੀਕਾ
EPFO ਨੇ UAN ਐਕਟੀਵੇਸ਼ਨ ਦੀ ਪ੍ਰਕਿਰਿਆ ਵਿੱਚ ਵੀ ਬਦਲਾਅ ਕੀਤਾ ਹੈ। ਹੁਣ UAN ਨੂੰ EPFO ਦੀ ਵੈੱਬਸਾਈਟ ਰਾਹੀਂ ਐਕਟੀਵੇਟ ਨਹੀਂ ਕੀਤਾ ਜਾ ਸਕੇਗਾ। ਇਸ ਲਈ ਮੈਂਬਰਾਂ ਨੂੰ UMANG ਐਪ ਦੀ ਵਰਤੋਂ ਕਰਨੀ ਪਵੇਗੀ। ਨਵੀਂ ਪ੍ਰਕਿਰਿਆ ਤਹਿਤ ਆਧਾਰ ਆਧਾਰਿਤ ਫੇਸ ਆਥੈਂਟੀਕੇਸ਼ਨ (Face Authentication Technology) ਰਾਹੀਂ UAN ਸਰਗਰਮ ਕੀਤਾ ਜਾਵੇਗਾ।
ਕੁਝ ਆਨਲਾਈਨ ਸੇਵਾਵਾਂ ਅਜੇ ਵੀ ਪ੍ਰਭਾਵਿਤ
ਤਕਨੀਕੀ ਅਪਗ੍ਰੇਡ ਕਾਰਨ UMANG ਐਪ ‘ਤੇ EPFO ਦੀਆਂ ਕੁਝ ਸੇਵਾਵਾਂ ਹਾਲੇ ਅਸਥਾਈ ਤੌਰ ‘ਤੇ ਪ੍ਰਭਾਵਿਤ ਹਨ। ਵਿਭਾਗ ਨੇ ਕਿਹਾ ਹੈ ਕਿ ਇਨ੍ਹਾਂ ਨੂੰ ਜਲਦ ਹੀ ਪੂਰੀ ਤਰ੍ਹਾਂ ਬਹਾਲ ਕਰ ਦਿੱਤਾ ਜਾਵੇਗਾ।
ਮੈਂਬਰਾਂ ਲਈ EPFO ਦੀ ਅਹਿਮ ਸਲਾਹ
EPFO ਨੇ ਮੈਂਬਰਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਕਿਸੇ ਦਾਅਵੇ ਜਾਂ ਆਨਲਾਈਨ ਬੇਨਤੀ ਦੀ ਪ੍ਰਕਿਰਿਆ ਵਿੱਚ ਸਮਾਂ ਲੱਗ ਰਿਹਾ ਹੈ ਤਾਂ ਵਾਰ-ਵਾਰ ਉਹੀ ਅਰਜ਼ੀ ਦੁਬਾਰਾ ਜਮ੍ਹਾਂ ਨਾ ਕਰਵਾਈ ਜਾਵੇ। ਇਸ ਨਾਲ ਪ੍ਰਕਿਰਿਆ ਹੋਰ ਲੰਬੀ ਹੋ ਸਕਦੀ ਹੈ। ਜੇਕਰ ਪਾਸਬੁੱਕ ਵਿੱਚ ਪੁਰਾਣੀਆਂ ਐਂਟਰੀਆਂ ਦਿਖਾਈ ਨਹੀਂ ਦੇ ਰਹੀਆਂ ਤਾਂ ਘਬਰਾਉਣ ਦੀ ਲੋੜ ਨਹੀਂ, ਕਿਉਂਕਿ ਡਾਟਾ ਨੂੰ ਪੜਾਅਵਾਰ ਅਪਡੇਟ ਕੀਤਾ ਜਾ ਰਿਹਾ ਹੈ।
