ਨਵੀਂ ਦਿੱਲੀ :- ਦੇਸ਼ ਵਿੱਚ ਹਾਈ-ਸਪੀਡ ਰੇਲ ਨੈੱਟਵਰਕ ਦੇ ਵਿਸਥਾਰ ਨੂੰ ਲੈ ਕੇ ਕੇਂਦਰ ਸਰਕਾਰ ਨੇ ਰਫ਼ਤਾਰ ਵਧਾ ਦਿੱਤੀ ਹੈ। ਮੁੰਬਈ-ਅਹਿਮਦਾਬਾਦ ਬੁਲੇਟ ਟ੍ਰੇਨ ਪ੍ਰੋਜੈਕਟ ਦੇ ਨਾਲ-ਨਾਲ ਹੁਣ ਨਵੀਂ ਦਿੱਲੀ ਨੂੰ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਨਾਲ ਜੋੜਨ ਲਈ ਚਾਰ ਨਵੇਂ ਬੁਲੇਟ ਟ੍ਰੇਨ ਕੋਰੀਡੋਰਾਂ ‘ਤੇ ਕੰਮ ਅੱਗੇ ਵਧਾਇਆ ਜਾ ਰਿਹਾ ਹੈ। ਮੌਜੂਦਾ ਬਜਟ ਵਿੱਚ ਦੇਸ਼ ਭਰ ਲਈ ਸੱਤ ਹਾਈ-ਸਪੀਡ ਰੇਲ ਰੂਟਾਂ ਦੀ ਪਛਾਣ ਕੀਤੀ ਗਈ ਹੈ, ਜਿਨ੍ਹਾਂ ਵਿੱਚੋਂ ਚਾਰ ਸਿੱਧੇ ਤੌਰ ‘ਤੇ ਦਿੱਲੀ ਨਾਲ ਜੁੜੇ ਹੋਏ ਹਨ।
ਦਿੱਲੀ-ਵਾਰਾਣਸੀ-ਸਿਲੀਗੁੜੀ ਰੂਟ ਨੂੰ ਮਿਲ ਰਹੀ ਸਭ ਤੋਂ ਵੱਧ ਤਰਜੀਹ
ਪ੍ਰਸਤਾਵਿਤ ਰੂਟਾਂ ਵਿੱਚ ਦਿੱਲੀ-ਵਾਰਾਣਸੀ-ਸਿਲੀਗੁੜੀ ਕੋਰੀਡੋਰ ਨੂੰ ਸਭ ਤੋਂ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ। ਇਹ ਰੂਟ ਉੱਤਰ ਪ੍ਰਦੇਸ਼ ਅਤੇ ਬਿਹਾਰ ਵਰਗੇ ਵੱਡੀ ਯਾਤਰੀ ਆਵਾਜਾਈ ਵਾਲੇ ਸੂਬਿਆਂ ਨੂੰ ਹਾਈ-ਸਪੀਡ ਰੇਲ ਸੇਵਾ ਨਾਲ ਜੋੜੇਗਾ। ਯੋਜਨਾ ਮੁਤਾਬਕ ਦਿੱਲੀ ਤੋਂ ਪਟਨਾ ਦਾ ਮੌਜੂਦਾ 15 ਤੋਂ 16 ਘੰਟਿਆਂ ਦਾ ਸਫ਼ਰ ਘਟ ਕੇ ਲਗਭਗ 5 ਘੰਟੇ ਰਹਿ ਜਾਵੇਗਾ। ਇਸੇ ਤਰ੍ਹਾਂ ਸਿਲੀਗੁੜੀ ਤੱਕ ਦੀ ਯਾਤਰਾ ਵੀ ਕਰੀਬ ਅੱਧੇ ਸਮੇਂ ਵਿੱਚ ਪੂਰੀ ਹੋ ਸਕੇਗੀ।
ਦਿੱਲੀ-ਅੰਮ੍ਰਿਤਸਰ-ਜੰਮੂ ਕੋਰੀਡੋਰ ਨਾਲ ਉੱਤਰੀ ਭਾਰਤ ਨੂੰ ਮਿਲੇਗੀ ਨਵੀਂ ਰਫ਼ਤਾਰ
ਦਿੱਲੀ ਤੋਂ ਅੰਮ੍ਰਿਤਸਰ ਤੱਕ ਬਣਨ ਵਾਲਾ ਹਾਈ-ਸਪੀਡ ਕੋਰੀਡੋਰ ਹਰਿਆਣਾ, ਚੰਡੀਗੜ੍ਹ ਅਤੇ ਪੰਜਾਬ ਦੇ ਕਈ ਪ੍ਰਮੁੱਖ ਸ਼ਹਿਰਾਂ ਵਿੱਚੋਂ ਲੰਘਣ ਦਾ ਪ੍ਰਸਤਾਵ ਹੈ। ਰੂਟ ‘ਤੇ ਰੋਹਤਕ, ਜੀਂਦ, ਕੈਥਲ, ਚੰਡੀਗੜ੍ਹ, ਮੋਹਾਲੀ, ਲੁਧਿਆਣਾ, ਜਲੰਧਰ ਅਤੇ ਅੰਮ੍ਰਿਤਸਰ ਨੂੰ ਜੋੜਿਆ ਜਾਵੇਗਾ। ਭਵਿੱਖ ਵਿੱਚ ਇਸ ਨੂੰ ਪਠਾਨਕੋਟ, ਜੰਮੂ ਅਤੇ ਕਟੜਾ ਤੱਕ ਵਧਾਉਣ ਦੀ ਵੀ ਯੋਜਨਾ ਹੈ, ਜਿਸ ਨਾਲ ਵੈਸ਼ਨੋ ਦੇਵੀ ਜਾਣ ਵਾਲੇ ਸ਼ਰਧਾਲੂਆਂ ਨੂੰ ਵੱਡੀ ਸਹੂਲਤ ਮਿਲੇਗੀ।
ਇਹ ਕੋਰੀਡੋਰ ਲਗਭਗ 450 ਤੋਂ 500 ਕਿਲੋਮੀਟਰ ਲੰਬਾ ਹੋਵੇਗਾ ਅਤੇ ਇਸ ਵਿੱਚ 10 ਤੋਂ 12 ਸਟੇਸ਼ਨ ਬਣਾਏ ਜਾਣ ਦੀ ਸੰਭਾਵਨਾ ਹੈ। ਪ੍ਰੋਜੈਕਟ ਇਸ ਵੇਲੇ ਸਰਵੇਖਣ ਅਤੇ ਰੂਟ ਤੈਅ ਕਰਨ ਦੇ ਪੜਾਅ ਵਿੱਚ ਹੈ।
ਦਿੱਲੀ-ਲਖਨਊ-ਵਾਰਾਣਸੀ ਰੂਟ ਧਾਰਮਿਕ ਅਤੇ ਉਦਯੋਗਿਕ ਸ਼ਹਿਰਾਂ ਨੂੰ ਜੋੜੇਗਾ
ਇੱਕ ਹੋਰ ਪ੍ਰਸਤਾਵਿਤ ਕੋਰੀਡੋਰ ਦਿੱਲੀ ਤੋਂ ਲਖਨਊ ਅਤੇ ਵਾਰਾਣਸੀ ਤੱਕ ਬਣਾਇਆ ਜਾਵੇਗਾ। ਇਹ ਰੂਟ ਨੋਇਡਾ, ਜੇਵਰ ਹਵਾਈ ਅੱਡਾ, ਮਥੁਰਾ, ਆਗਰਾ, ਫਿਰੋਜ਼ਾਬਾਦ, ਇਟਾਵਾ, ਕੰਨੌਜ, ਲਖਨਊ, ਰਾਏਬਰੇਲੀ, ਪ੍ਰਯਾਗਰਾਜ, ਭਦੋਹੀ ਅਤੇ ਵਾਰਾਣਸੀ ਵਿੱਚੋਂ ਲੰਘੇਗਾ। ਇਸ ਦੇ ਨਾਲ ਲਖਨਊ ਤੋਂ ਅਯੁੱਧਿਆ ਤੱਕ ਵੱਖਰੀ ਹਾਈ-ਸਪੀਡ ਰੇਲ ਲਾਈਨ ਬਣਾਉਣ ਦੀ ਵੀ ਯੋਜਨਾ ਹੈ।
ਇਸ ਕੋਰੀਡੋਰ ਦੀ ਕੁੱਲ ਲੰਬਾਈ ਲਗਭਗ 813 ਤੋਂ 865 ਕਿਲੋਮੀਟਰ ਹੋ ਸਕਦੀ ਹੈ ਅਤੇ ਇਸ ਵਿੱਚ 13 ਤੋਂ 15 ਸਟੇਸ਼ਨ ਪ੍ਰਸਤਾਵਿਤ ਹਨ।
ਦਿੱਲੀ-ਜੈਪੁਰ-ਉਦੈਪੁਰ-ਅਹਿਮਦਾਬਾਦ ਕੋਰੀਡੋਰ ਨਾਲ ਮੁੰਬਈ ਤੱਕ ਬਣੇਗਾ ਹਾਈ-ਸਪੀਡ ਸੰਪਰਕ
ਦਿੱਲੀ ਨੂੰ ਰਾਜਸਥਾਨ ਅਤੇ ਗੁਜਰਾਤ ਨਾਲ ਜੋੜਨ ਲਈ ਦਿੱਲੀ-ਜੈਪੁਰ-ਉਦੈਪੁਰ-ਅਹਿਮਦਾਬਾਦ ਕੋਰੀਡੋਰ ਵੀ ਤਿਆਰ ਕੀਤਾ ਜਾ ਰਿਹਾ ਹੈ। ਇਸ ਰੂਟ ਨੂੰ ਅੱਗੇ ਚੱਲ ਕੇ ਮੁੰਬਈ-ਅਹਿਮਦਾਬਾਦ ਬੁਲੇਟ ਟ੍ਰੇਨ ਪ੍ਰੋਜੈਕਟ ਨਾਲ ਜੋੜਨ ਦੀ ਯੋਜਨਾ ਹੈ, ਜਿਸ ਨਾਲ ਦਿੱਲੀ ਤੋਂ ਮੁੰਬਈ ਤੱਕ ਤੇਜ਼ ਰਫ਼ਤਾਰ ਰੇਲ ਯਾਤਰਾ ਸੰਭਵ ਹੋ ਸਕੇਗੀ।
ਇਸ ਰੂਟ ‘ਤੇ ਦਵਾਰਕਾ, ਬਿਜਵਾਸਨ, ਗੁਰੂਗ੍ਰਾਮ, ਮਾਨੇਸਰ, ਰੇਵਾੜੀ, ਨੀਮਰਾਨਾ, ਜੈਪੁਰ, ਕਿਸ਼ਨਗੜ੍ਹ, ਭੀਲਵਾੜਾ, ਚਿਤੌੜਗੜ੍ਹ, ਉਦੈਪੁਰ, ਡੂੰਗਰਪੁਰ, ਹਿੰਮਤਨਗਰ ਅਤੇ ਅਹਿਮਦਾਬਾਦ ਵਰਗੇ ਸ਼ਹਿਰਾਂ ਨੂੰ ਜੋੜਨ ਦਾ ਪ੍ਰਸਤਾਵ ਹੈ। ਕੋਰੀਡੋਰ ਦੀ ਲੰਬਾਈ ਲਗਭਗ 886 ਕਿਲੋਮੀਟਰ ਹੋਵੇਗੀ ਅਤੇ ਇਸ ਵਿੱਚ 14 ਤੋਂ 15 ਸਟੇਸ਼ਨ ਬਣਾਏ ਜਾਣ ਦੀ ਸੰਭਾਵਨਾ ਹੈ।
ਕਈ ਪ੍ਰੋਜੈਕਟਾਂ ਦੀ ਪ੍ਰਕਿਰਿਆ ਜਾਰੀ
ਸਰਕਾਰੀ ਜਾਣਕਾਰੀ ਮੁਤਾਬਕ ਕੁਝ ਕੋਰੀਡੋਰਾਂ ਲਈ ਵਿਸਤ੍ਰਿਤ ਪ੍ਰੋਜੈਕਟ ਰਿਪੋਰਟ (ਡੀਪੀਆਰ) ਤਿਆਰ ਕੀਤੀ ਜਾ ਚੁੱਕੀ ਹੈ, ਜਦਕਿ ਕੁਝ ਰੂਟ ਅਜੇ ਸਰਵੇਖਣ ਅਤੇ ਤਕਨੀਕੀ ਜਾਂਚ ਦੇ ਪੜਾਅ ਵਿੱਚ ਹਨ। ਅੰਤਿਮ ਵਿੱਤੀ ਅਤੇ ਪ੍ਰਸ਼ਾਸਕੀ ਮਨਜ਼ੂਰੀ ਮਿਲਣ ਤੋਂ ਬਾਅਦ ਹੀ ਇਨ੍ਹਾਂ ਪ੍ਰੋਜੈਕਟਾਂ ਦੇ ਨਿਰਮਾਣ ਕਾਰਜ ਨੂੰ ਰਫ਼ਤਾਰ ਮਿਲੇਗੀ।
