ਨਵੀਂ ਦਿੱਲੀ :- ਹਰ ਮਹੀਨੇ ਦੀ ਪਹਿਲੀ ਤਰੀਕ ਵਾਂਗ ਇਸ ਵਾਰ ਵੀ ਐਲਪੀਜੀ ਗੈਸ ਨਾਲ ਸੰਬੰਧਿਤ ਕਈ ਨਵੇਂ ਨਿਯਮ ਲਾਗੂ ਹੋ ਗਏ ਹਨ। ਗੈਸ ਕੰਪਨੀਆਂ ਅਤੇ ਸਰਕਾਰ ਵੱਲੋਂ ਕੀਤੀਆਂ ਇਨ੍ਹਾਂ ਤਬਦੀਲੀਆਂ ਦਾ ਅਸਰ ਘਰੇਲੂ ਗੈਸ ਸਿਲੰਡਰ ਵਰਤਣ ਵਾਲੇ ਅਤੇ ਪਾਈਪਡ ਨੈਚੁਰਲ ਗੈਸ (ਪੀਐਨਜੀ) ਖਪਤਕਾਰਾਂ ਦੋਵਾਂ ‘ਤੇ ਪਵੇਗਾ। ਨਵੇਂ ਨਿਯਮਾਂ ਵਿੱਚ e-KYC, ਗੈਸ ਬੁਕਿੰਗ, ਸਬਸਿਡੀ, ਡਿਲੀਵਰੀ ਅਤੇ ਨਵੇਂ ਕਨੈਕਸ਼ਨ ਨਾਲ ਜੁੜੇ ਪ੍ਰਬੰਧ ਸ਼ਾਮਲ ਹਨ।
e-KYC ਕਰਵਾਉਣਾ ਹੋਇਆ ਲਾਜ਼ਮੀ
ਐਲਪੀਜੀ ਖਪਤਕਾਰਾਂ ਲਈ ਆਧਾਰ ਨਾਲ ਜੁੜੀ e-KYC ਹੁਣ ਲਾਜ਼ਮੀ ਕਰ ਦਿੱਤੀ ਗਈ ਹੈ। ਜਿਨ੍ਹਾਂ ਗਾਹਕਾਂ ਨੇ ਅਜੇ ਤੱਕ ਇਹ ਪ੍ਰਕਿਰਿਆ ਪੂਰੀ ਨਹੀਂ ਕੀਤੀ, ਉਨ੍ਹਾਂ ਨੂੰ ਜਲਦੀ ਇਹ ਕੰਮ ਕਰਵਾਉਣ ਦੀ ਸਲਾਹ ਦਿੱਤੀ ਗਈ ਹੈ। ਨਿਰਧਾਰਤ ਸਮੇਂ ਅੰਦਰ e-KYC ਨਾ ਹੋਣ ਦੀ ਸੂਰਤ ਵਿੱਚ ਗੈਸ ਸਿਲੰਡਰ ਦੀ ਬੁਕਿੰਗ ਪ੍ਰਭਾਵਿਤ ਹੋ ਸਕਦੀ ਹੈ। ਇਹ ਪ੍ਰਕਿਰਿਆ ਗੈਸ ਏਜੰਸੀ ਜਾਂ ਕੰਪਨੀ ਦੇ ਮੋਬਾਈਲ ਐਪ ਰਾਹੀਂ ਪੂਰੀ ਕੀਤੀ ਜਾ ਸਕਦੀ ਹੈ।
ਨਵਾਂ ਗੈਸ ਕਨੈਕਸ਼ਨ ਹੁਣ ਹੋਰ ਤੇਜ਼ੀ ਨਾਲ ਮਿਲੇਗਾ
ਭਾਰਤ ਪੈਟਰੋਲੀਅਮ ਨੇ ‘ਭਾਰਤ ਲਾਈਟ ਜਿਪ’ ਸੇਵਾ ਸ਼ੁਰੂ ਕੀਤੀ ਹੈ, ਜਿਸ ਨਾਲ ਨਵੇਂ ਐਲਪੀਜੀ ਕਨੈਕਸ਼ਨ ਦੀ ਪ੍ਰਕਿਰਿਆ ਪਹਿਲਾਂ ਨਾਲੋਂ ਤੇਜ਼ ਹੋਵੇਗੀ ਅਤੇ ਸਿਲੰਡਰ ਦੀ ਡਿਲੀਵਰੀ ਵੀ ਘੱਟ ਸਮੇਂ ਵਿੱਚ ਮਿਲੇਗੀ। ਇਸ ਵੇਲੇ ਇਹ ਸੇਵਾ ਮੁੰਬਈ ਵਿੱਚ ਸ਼ੁਰੂ ਕੀਤੀ ਗਈ ਹੈ ਅਤੇ 15 ਅਗਸਤ ਤੱਕ ਇਸ ਨੂੰ 24 ਰਾਜਾਂ ਦੇ 100 ਹੋਰ ਸ਼ਹਿਰਾਂ ਵਿੱਚ ਸ਼ੁਰੂ ਕਰਨ ਦੀ ਯੋਜਨਾ ਹੈ।
ਉੱਥੇ ਹੀ, ਐਚਪੀਸੀਐਲ ਨੇ ਬੈਂਗਲੁਰੂ ਵਿੱਚ ਸਵਿਗੀ ਇੰਸਟਾਮਾਰਟ ਨਾਲ ਮਿਲ ਕੇ 5 ਅਤੇ 10 ਕਿਲੋ ਵਾਲੇ ਛੋਟੇ ਐਲਪੀਜੀ ਸਿਲੰਡਰਾਂ ਦੀ ਘਰ-ਘਰ ਡਿਲੀਵਰੀ ਸ਼ੁਰੂ ਕੀਤੀ ਹੈ, ਜਿਸ ਨਾਲ ਵਿਦਿਆਰਥੀਆਂ, ਛੋਟੇ ਪਰਿਵਾਰਾਂ ਅਤੇ ਫਲੈਟਾਂ ਵਿੱਚ ਰਹਿਣ ਵਾਲੇ ਲੋਕਾਂ ਨੂੰ ਸਹੂਲਤ ਮਿਲੇਗੀ।
ਉੱਜਵਲਾ ਯੋਜਨਾ ਦੀ ਸਬਸਿਡੀ ‘ਚ ਵੀ ਹੋਇਆ ਬਦਲਾਅ
ਪ੍ਰਧਾਨ ਮੰਤਰੀ ਉੱਜਵਲਾ ਯੋਜਨਾ ਤਹਿਤ ਹੁਣ ਯੋਗ ਲਾਭਪਾਤਰੀਆਂ ਨੂੰ ਇੱਕ ਵਿੱਤੀ ਸਾਲ ਦੌਰਾਨ ਸਿਰਫ਼ ਚਾਰ ਐਲਪੀਜੀ ਸਿਲੰਡਰਾਂ ‘ਤੇ ਹੀ ਸਬਸਿਡੀ ਮਿਲੇਗੀ। ਇਸ ਤੋਂ ਬਾਅਦ ਖਰੀਦੇ ਜਾਣ ਵਾਲੇ ਸਾਰੇ ਸਿਲੰਡਰਾਂ ਦੀ ਪੂਰੀ ਕੀਮਤ ਖੁਦ ਅਦਾ ਕਰਨੀ ਪਵੇਗੀ।
ਕਮਰਸ਼ੀਅਲ ਸਿਲੰਡਰ ਸਸਤਾ, ਘਰੇਲੂ ਸਿਲੰਡਰ ਦੀ ਕੀਮਤ ਬਰਕਰਾਰ
1 ਅਗਸਤ ਤੋਂ 19 ਕਿਲੋਗ੍ਰਾਮ ਵਾਲੇ ਕਮਰਸ਼ੀਅਲ ਐਲਪੀਜੀ ਸਿਲੰਡਰ ਦੀ ਕੀਮਤ ਵਿੱਚ ਕਟੌਤੀ ਕੀਤੀ ਗਈ ਹੈ। ਦਿੱਲੀ ਵਿੱਚ ਇਸ ਦੀ ਕੀਮਤ 202 ਰੁਪਏ ਘਟਾਈ ਗਈ ਹੈ। ਇਸ ਦੇ ਉਲਟ 14.2 ਕਿਲੋਗ੍ਰਾਮ ਵਾਲੇ ਘਰੇਲੂ ਗੈਸ ਸਿਲੰਡਰ ਦੀ ਕੀਮਤ ਵਿੱਚ ਕੋਈ ਤਬਦੀਲੀ ਨਹੀਂ ਕੀਤੀ ਗਈ ਅਤੇ ਇਹ ਪਹਿਲਾਂ ਵਾਲੀ ਦਰ ‘ਤੇ ਹੀ ਮਿਲੇਗਾ।
ਪੀਐਨਜੀ ਕਨੈਕਸ਼ਨ ਲੈਣ ‘ਤੇ ਐਲਪੀਜੀ ਵਾਪਸ ਕਰਨਾ ਹੋਵੇਗਾ
ਨਵੇਂ ਨਿਯਮਾਂ ਅਨੁਸਾਰ ਜੇ ਕੋਈ ਗਾਹਕ ਐਲਪੀਜੀ ਦੀ ਥਾਂ ਪਾਈਪਡ ਨੈਚੁਰਲ ਗੈਸ (ਪੀਐਨਜੀ) ਕਨੈਕਸ਼ਨ ਲੈਂਦਾ ਹੈ ਤਾਂ ਉਸ ਨੂੰ 30 ਦਿਨਾਂ ਦੇ ਅੰਦਰ ਆਪਣਾ ਪੁਰਾਣਾ ਐਲਪੀਜੀ ਕਨੈਕਸ਼ਨ ਸਰੈਂਡਰ ਕਰਨਾ ਹੋਵੇਗਾ। ਇਹ ਨਿਯਮ ਇੰਡੇਨ, ਭਾਰਤ ਗੈਸ ਅਤੇ ਐਚਪੀ ਗੈਸ ਦੇ ਸਾਰੇ ਗਾਹਕਾਂ ‘ਤੇ ਲਾਗੂ ਹੋਵੇਗਾ। ਹਾਲਾਂਕਿ, ਜੇ ਬਾਅਦ ਵਿੱਚ ਉਹ ਅਜਿਹੇ ਖੇਤਰ ਵਿੱਚ ਰਹਿਣ ਲੱਗਦਾ ਹੈ ਜਿੱਥੇ ਪੀਐਨਜੀ ਦੀ ਸਹੂਲਤ ਨਹੀਂ ਹੈ ਤਾਂ ਨਿਯਮਾਂ ਅਨੁਸਾਰ ਐਲਪੀਜੀ ਕਨੈਕਸ਼ਨ ਮੁੜ ਚਾਲੂ ਕਰਵਾਇਆ ਜਾ ਸਕੇਗਾ।
ਗੈਸ ਡਿਲੀਵਰੀ ਲਈ ਹੁਣ OTP ਦੱਸਣਾ ਲਾਜ਼ਮੀ
ਗੈਸ ਸਿਲੰਡਰ ਦੀ ਡਿਲੀਵਰੀ ਪ੍ਰਕਿਰਿਆ ਨੂੰ ਹੋਰ ਸੁਰੱਖਿਅਤ ਅਤੇ ਡਿਜ਼ਿਟਲ ਬਣਾਇਆ ਗਿਆ ਹੈ। ਹੁਣ ਸਿਲੰਡਰ ਲੈਂਦੇ ਸਮੇਂ ਗਾਹਕ ਨੂੰ ਆਪਣੇ ਰਜਿਸਟਰਡ ਮੋਬਾਈਲ ਨੰਬਰ ਤੇ ਆਇਆ ਓਟੀਪੀ ਜਾਂ ਡਿਲੀਵਰੀ ਕੋਡ ਦੱਸਣਾ ਲਾਜ਼ਮੀ ਹੋਵੇਗਾ। ਇਸ ਤੋਂ ਬਿਨਾਂ ਡਿਲੀਵਰੀ ਨਹੀਂ ਕੀਤੀ ਜਾਵੇਗੀ।
ਗੈਸ ਬੁਕਿੰਗ ਦੇ ਅੰਤਰਾਲ ਵਿੱਚ ਕੋਈ ਤਬਦੀਲੀ ਨਹੀਂ
ਗੈਸ ਸਿਲੰਡਰ ਦੀ ਬੁਕਿੰਗ ਲਈ ਨਿਰਧਾਰਤ ਸਮੇਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ। ਸ਼ਹਿਰੀ ਖੇਤਰਾਂ ਵਿੱਚ ਅਗਲੀ ਬੁਕਿੰਗ 25 ਦਿਨ ਬਾਅਦ ਅਤੇ ਪੇਂਡੂ ਖੇਤਰਾਂ ਵਿੱਚ 45 ਦਿਨ ਬਾਅਦ ਹੀ ਕਰਵਾਈ ਜਾ ਸਕੇਗੀ। ਇਹ ਨਿਯਮ ਪਹਿਲਾਂ ਵਾਂਗ ਹੀ ਲਾਗੂ ਰਹੇਗਾ।
