ਨਵੀਂ ਦਿੱਲੀ :- ਏਸ਼ੀਅਨ ਗੇਮਜ਼ 2026 ਵਿੱਚ ਭਾਰਤ ਦੇ ਤਮਗਿਆਂ ਦੀ ਗਿਣਤੀ ਚਾਰ ਹੋ ਗਈ ਹੈ। ਭਾਰਤੀ ਖਿਡਾਰਨ ਸੁਚਿਕਾ ਤਾਰਿਆਲ ਨੇ ਮਹਿਲਾ ਟ੍ਰੈਡੀਸ਼ਨਲ 60 ਕਿਲੋ ਵਰਗ ਦੇ ਮਿਕਸਡ ਮਾਰਸ਼ਲ ਆਰਟਸ ਮੁਕਾਬਲੇ ਵਿੱਚ ਕਾਂਸੀ ਦਾ ਤਮਗਾ ਆਪਣੇ ਨਾਮ ਕੀਤਾ। ਇਸ ਦੇ ਨਾਲ ਹੀ ਸੁਚਿਕਾ ਏਸ਼ੀਅਨ ਗੇਮਜ਼ ਦੇ ਇਤਿਹਾਸ ਵਿੱਚ ਭਾਰਤ ਲਈ ਮਿਕਸਡ ਮਾਰਸ਼ਲ ਆਰਟਸ ਵਿੱਚ ਤਮਗਾ ਜਿੱਤਣ ਵਾਲੀ ਪਹਿਲੀ ਖਿਡਾਰਨ ਬਣ ਗਈ ਹੈ।
ਸੈਮੀਫਾਈਨਲ ਵਿੱਚ ਸਿੰਗਾਪੁਰ ਦੀ ਖਿਡਾਰਨ ਤੋਂ ਹਾਰ
ਸੁਚਿਕਾ ਨੇ ਇਸ ਤੋਂ ਪਹਿਲਾਂ ਕੁਆਰਟਰ ਫਾਈਨਲ ਵਿੱਚ ਮੰਗੋਲੀਆ ਦੀ ਅਲਤਾਂਚਿਮੇਗ ਬਾਇਗਾਲਮਾ ਨੂੰ 2-0 ਨਾਲ ਹਰਾਇਆ ਸੀ ਅਤੇ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾਈ ਸੀ। ਸੈਮੀਫਾਈਨਲ ਵਿੱਚ ਉਸ ਦਾ ਸਾਹਮਣਾ ਸਿੰਗਾਪੁਰ ਦੀ ਹੂਈ ਹੂਨ ਟੇਓ ਨਾਲ ਹੋਇਆ, ਜਿੱਥੇ ਉਸ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਸੈਮੀਫਾਈਨਲ ਵਿੱਚ ਹਾਰਨ ਵਾਲੇ ਦੋਵੇਂ ਖਿਡਾਰੀਆਂ ਨੂੰ ਕਾਂਸੀ ਦਾ ਤਮਗਾ ਮਿਲਣ ਕਾਰਨ ਸੁਚਿਕਾ ਦਾ ਤਮਗਾ ਪੱਕਾ ਹੋ ਗਿਆ ਸੀ।
ਸ਼ੂਟਿੰਗ ਵਿੱਚ ਭਾਰਤ ਨੇ ਜਿੱਤੇ ਤਿੰਨ ਤਮਗੇ
ਸੁਚਿਕਾ ਦੇ ਕਾਂਸੀ ਤੋਂ ਪਹਿਲਾਂ ਭਾਰਤ ਦੇ ਤਿੰਨੋਂ ਤਮਗੇ ਸ਼ੂਟਿੰਗ ਵਿੱਚ ਆਏ ਸਨ। ਮਹਿਲਾ 10 ਮੀਟਰ ਏਅਰ ਰਾਈਫਲ ਟੀਮ ਮੁਕਾਬਲੇ ਵਿੱਚ ਐਲਾਵੇਨਿਲ ਵਲਾਰਿਵਨ, ਸੋਨਮ ਮਸਕਾਰ ਅਤੇ ਵਿਦਰਸਾ ਵਿਨੋਦ ਦੀ ਟੀਮ ਨੇ ਚਾਂਦੀ ਜਿੱਤੀ। ਇਸ ਤੋਂ ਬਾਅਦ ਐਲਾਵੇਨਿਲ ਨੇ ਇਸੇ ਮੁਕਾਬਲੇ ਦੇ ਵਿਅਕਤੀਗਤ ਵਰਗ ਵਿੱਚ ਵੀ ਚਾਂਦੀ ਦਾ ਤਮਗਾ ਹਾਸਲ ਕੀਤਾ।
ਪੁਰਸ਼ ਟੀਮ ਨੇ ਵੀ ਚਾਂਦੀ ’ਤੇ ਕੀਤਾ ਕਬਜ਼ਾ
ਭਾਰਤੀ ਪੁਰਸ਼ ਟੀਮ ਨੇ 10 ਮੀਟਰ ਏਅਰ ਰਾਈਫਲ ਟੀਮ ਮੁਕਾਬਲੇ ਵਿੱਚ ਚਾਂਦੀ ਦਾ ਤਮਗਾ ਜਿੱਤਿਆ। ਰੁਦਰਾਂਕਸ਼ ਪਾਟਿਲ, ਹਿਮਾਂਸ਼ੂ ਢਿੱਲੋਂ ਅਤੇ ਪਾਰਥ ਮਾਨੇ ਦੀ ਟੀਮ ਨੇ ਕੁੱਲ 1890.1 ਅੰਕ ਹਾਸਲ ਕਰਦਿਆਂ ਦੂਜਾ ਸਥਾਨ ਹਾਸਲ ਕੀਤਾ। ਇਸ ਮੁਕਾਬਲੇ ਵਿੱਚ ਰੁਦਰਾਂਕਸ਼ ਪਾਟਿਲ ਅਤੇ ਹਿਮਾਂਸ਼ੂ ਢਿੱਲੋਂ ਨੇ ਵਿਅਕਤੀਗਤ ਫਾਈਨਲ ਲਈ ਵੀ ਕੁਆਲੀਫਾਈ ਕੀਤਾ ਹੈ।
