ਨਵੀਂ ਦਿੱਲੀ :- ਐਰੋਸਿਟੀ ਸਥਿਤ ਪੰਜ ਤਾਰਾ ਹੋਟਲ ‘ਅੰਦਾਜ਼ ਦਿੱਲੀ’ ਵਿੱਚ ਭੋਜਨ ਸੁਰੱਖਿਆ ਨਾਲ ਜੁੜੀਆਂ ਕਈ ਖਾਮੀਆਂ ਸਾਹਮਣੇ ਆਉਣ ਤੋਂ ਬਾਅਦ ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਅਥਾਰਟੀ ਆਫ਼ ਇੰਡੀਆ (FSSAI) ਨੇ ਹੋਟਲ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਅਧਿਕਾਰੀਆਂ ਵੱਲੋਂ ਕੀਤੇ ਨਿਰੀਖਣ ਦੌਰਾਨ ਕਰੀਬ 87 ਕਿਲੋ ਮਿਆਦ ਪੁੱਗੀਆਂ ਮਠਿਆਈਆਂ ਤੋਂ ਇਲਾਵਾ ਮਿਆਦ ਪੁੱਗੇ ਕੇਕ ਬੇਸ ਅਤੇ ਬਰੈੱਡ ਦੇ ਪੈਕੇਟ ਵੀ ਮਿਲੇ।
ਮੌਕੇ ਤੇ ਹੀ ਨਸ਼ਟ ਕਰਵਾਈਆਂ ਮਿਆਦ ਪੁੱਗੀਆਂ ਮਠਿਆਈਆਂ
ਨਿਰੀਖਣ ਦੌਰਾਨ ਮਿਲੀਆਂ ਮਿਆਦ ਪੁੱਗੀਆਂ ਮਠਿਆਈਆਂ ਨੂੰ ਅਧਿਕਾਰੀਆਂ ਨੇ ਮੌਕੇ ’ਤੇ ਹੀ ਰੱਦ ਕਰ ਦਿੱਤਾ। ਐੱਫ.ਐੱਸ.ਐੱਸ.ਏ.ਆਈ. ਮੁਤਾਬਕ ਭੋਜਨ ਸੁਰੱਖਿਆ ਨਾਲ ਸਬੰਧਤ ਮਾਮਲੇ ਵਿੱਚ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ ਲਈ ਅੱਗੇ ਦੀ ਕਾਰਵਾਈ ਨਿਰੀਖਣ ਅਤੇ ਇਕੱਠੇ ਕੀਤੇ ਗਏ ਨਮੂਨਿਆਂ ਦੇ ਵਿਸ਼ਲੇਸ਼ਣ ਦੇ ਆਧਾਰ ’ਤੇ ਕੀਤੀ ਜਾਵੇਗੀ।
ਜੇ.ਡਬਲਿਊ. ਮੈਰੀਅਟ ਨੂੰ ਵੀ ਨੋਟਿਸ
ਰੈਗੂਲੇਟਰ ਨੇ ਦੱਸਿਆ ਕਿ ਜੂਨੀਪਰ ਹੋਟਲਜ਼ ਪ੍ਰਾਈਵੇਟ ਲਿਮਟਿਡ ਵੱਲੋਂ ਚਲਾਏ ਜਾ ਰਹੇ ਅੰਦਾਜ਼, ਐਰੋਸਿਟੀ ਤੋਂ ਇਲਾਵਾ ਦਿੱਲੀ ਦੇ ਜੇ.ਡਬਲਿਊ. ਮੈਰੀਅਟ ਨੂੰ ਵੀ ਭੋਜਨ ਸੁਰੱਖਿਆ ਨਾਲ ਸਬੰਧਤ ਉਲੰਘਣਾਵਾਂ ਦੇ ਮਾਮਲੇ ਵਿੱਚ ਨੋਟਿਸ ਜਾਰੀ ਕੀਤੇ ਗਏ ਹਨ। ਦੋਵਾਂ ਥਾਵਾਂ ਤੋਂ ਨਿਯਮਾਂ ਅਨੁਸਾਰ ਨਮੂਨੇ ਵੀ ਲਏ ਗਏ ਹਨ।
ਸ਼ਾਕਾਹਾਰੀ ਤੇ ਮਾਸਾਹਾਰੀ ਭੋਜਨ ਦੀ ਤਿਆਰੀ ’ਤੇ ਵੀ ਸਵਾਲ
ਨਿਰੀਖਣ ਦੌਰਾਨ ਸ਼ਾਕਾਹਾਰੀ ਅਤੇ ਮਾਸਾਹਾਰੀ ਭੋਜਨ ਤਿਆਰ ਕਰਨ ਅਤੇ ਸੰਭਾਲਣ ਦੇ ਪ੍ਰਬੰਧਾਂ ਵਿੱਚ ਵੀ ਖਾਮੀਆਂ ਮਿਲੀਆਂ। ਅਧਿਕਾਰੀਆਂ ਮੁਤਾਬਕ ਸ਼ਾਕਾਹਾਰੀ ਅਤੇ ਮਾਸਾਹਾਰੀ ਭੋਜਨ ਲਈ ਵਰਤੇ ਜਾਣ ਵਾਲੇ ਕੱਟਣ ਵਾਲੇ ਬੋਰਡ ਇੱਕੋ ਪਾਣੀ ਦੇ ਭਾਂਡੇ ਵਿੱਚ ਰੱਖੇ ਮਿਲੇ। ਇਸ ਤੋਂ ਇਲਾਵਾ ਕਮਰੇ ਵਿੱਚ ਭੋਜਨ ਪਹੁੰਚਾਉਣ ਵਾਲੀ ਰਸੋਈ ਵਿੱਚ ਸ਼ਾਕਾਹਾਰੀ ਭੋਜਨ ਲਈ ਰਾਖਵੇਂ ਬਰਨਰ ’ਤੇ ਮਾਸਾਹਾਰੀ ਖਾਣਾ ਤਿਆਰ ਕੀਤਾ ਜਾ ਰਿਹਾ ਸੀ।
ਕਾਕਰੋਚ ਤੇ ਮੱਖੀਆਂ ਮਿਲਣ ਨਾਲ ਸਫ਼ਾਈ ਪ੍ਰਬੰਧਾਂ ’ਤੇ ਉੱਠੇ ਸਵਾਲ
ਅਧਿਕਾਰੀਆਂ ਨੂੰ ਫ੍ਰੀਜ਼ਰਾਂ ਦੇ ਨੇੜੇ ਕਾਕਰੋਚ ਵੀ ਮਿਲੇ। ਇਸ ਤੋਂ ਇਲਾਵਾ ਰਸੋਈ ਵਿੱਚ ਮੱਖੀਆਂ ਅਤੇ ਮੱਛਰਾਂ ਦੀ ਮੌਜੂਦਗੀ ਦੇ ਨਾਲ ਮੱਕੜੀ ਦੇ ਜਾਲ ਵੀ ਪਾਏ ਗਏ। ਨਿਰੀਖਣ ਰਿਪੋਰਟ ਵਿੱਚ ਰਸੋਈ ਦੀ ਸਫ਼ਾਈ, ਭੋਜਨ ਤਿਆਰ ਕਰਨ ਵਾਲੇ ਕਰਮਚਾਰੀਆਂ ਦੀ ਨਿੱਜੀ ਸਫ਼ਾਈ ਅਤੇ ਭੋਜਨ ਨੂੰ ਸਹੀ ਢੰਗ ਨਾਲ ਸੰਭਾਲਣ ਸਬੰਧੀ ਵੀ ਕਮੀਆਂ ਦਰਜ ਕੀਤੀਆਂ ਗਈਆਂ ਹਨ।
ਭੋਜਨ ਦੇ ਤਾਪਮਾਨ ਦੀ ਨਿਗਰਾਨੀ ਵੀ ਢੁੱਕਵੀਂ ਨਹੀਂ ਮਿਲੀ
ਨਿਰੀਖਣ ਦੌਰਾਨ ਭੋਜਨ ਦੀ ਸਟੋਰੇਜ ਅਤੇ ਉਸ ਨੂੰ ਨਿਰਧਾਰਤ ਤਾਪਮਾਨ ’ਤੇ ਰੱਖਣ ਦੀ ਪ੍ਰਕਿਰਿਆ ਵਿੱਚ ਵੀ ਖਾਮੀਆਂ ਸਾਹਮਣੇ ਆਈਆਂ। ਅਧਿਕਾਰੀਆਂ ਨੇ ਭੋਜਨ ਵਸਤੂਆਂ ਦੇ ਤਾਪਮਾਨ ਦੀ ਨਿਗਰਾਨੀ ਨੂੰ ਨਾਕਾਫ਼ੀ ਦੱਸਿਆ। ਇਸ ਦੇ ਨਾਲ ਹੀ ਭੋਜਨ ਸਪਲਾਇਰਾਂ ਦੀ ਜਾਂਚ ਅਤੇ ਤਸਦੀਕ ਨਾਲ ਸਬੰਧਤ ਪ੍ਰਕਿਰਿਆਵਾਂ ਵਿੱਚ ਵੀ ਕਮੀਆਂ ਪਾਈਆਂ ਗਈਆਂ।
ਬਰੈੱਡ ਦੀ ਪੈਕਿੰਗ ’ਤੇ ਤਾਰੀਖ ਨਾਲ ਛੇੜਛਾੜ ਦਾ ਸ਼ੱਕ
ਅਧਿਕਾਰੀਆਂ ਨੇ ਕੁਝ ਮਿਆਦ ਪੁੱਗੀਆਂ ਬਰੈੱਡ ਦੀਆਂ ਪੈਕਿੰਗਾਂ ’ਤੇ ਦੁਬਾਰਾ ਤਾਰੀਖ ਲਗਾਏ ਜਾਣ ਦੇ ਸੰਕੇਤ ਵੀ ਦਰਜ ਕੀਤੇ ਹਨ। ਇਸ ਮਾਮਲੇ ਵਿੱਚ ਸਪਲਾਇਰਾਂ ਦੀ ਤਸਦੀਕ ਪ੍ਰਕਿਰਿਆ ਨੂੰ ਵੀ ਨਾਕਾਫ਼ੀ ਪਾਇਆ ਗਿਆ।
ਹੋਟਲ ਨੂੰ ਸੁਧਾਰਾਤਮਕ ਕਦਮ ਚੁੱਕਣ ਦੇ ਨਿਰਦੇਸ਼
ਐੱਫ.ਐੱਸ.ਐੱਸ.ਏ.ਆਈ. ਨੇ ਹੋਟਲ ਪ੍ਰਬੰਧਨ ਨੂੰ ਸਾਹਮਣੇ ਆਈਆਂ ਖਾਮੀਆਂ ਨੂੰ ਤੁਰੰਤ ਦੂਰ ਕਰਨ ਅਤੇ ਇਸ ਸਬੰਧੀ ਸਬੂਤਾਂ ਸਮੇਤ ਪਾਲਣਾ ਰਿਪੋਰਟ ਜਮ੍ਹਾਂ ਕਰਵਾਉਣ ਲਈ ਕਿਹਾ ਹੈ। ਰੈਗੂਲੇਟਰ ਮੁਤਾਬਕ ਅਗਲੀ ਕਾਰਵਾਈ ਹੋਟਲ ਵੱਲੋਂ ਨਿਯਮਾਂ ਦੀ ਪਾਲਣਾ ਅਤੇ ਲਏ ਗਏ ਨਮੂਨਿਆਂ ਦੀ ਜਾਂਚ ਦੇ ਨਤੀਜਿਆਂ ’ਤੇ ਨਿਰਭਰ ਕਰੇਗੀ।
ਭੋਜਨ ਕਾਰੋਬਾਰਾਂ ਖ਼ਿਲਾਫ਼ ਕਾਰਵਾਈ ਤੇਜ਼
ਇਹ ਕਾਰਵਾਈ ਐੱਫ.ਐੱਸ.ਐੱਸ.ਏ.ਆਈ. ਵੱਲੋਂ ਭੋਜਨ ਕਾਰੋਬਾਰਾਂ ਵਿੱਚ ਭੋਜਨ ਸੁਰੱਖਿਆ, ਲੇਬਲਿੰਗ ਅਤੇ ਗੁੰਮਰਾਹਕੁੰਨ ਦਾਅਵਿਆਂ ਨਾਲ ਸਬੰਧਤ ਉਲੰਘਣਾਵਾਂ ਖ਼ਿਲਾਫ਼ ਕੀਤੀ ਜਾ ਰਹੀ ਕਾਰਵਾਈ ਦੇ ਦੌਰਾਨ ਹੋਈ ਹੈ। ਰੈਗੂਲੇਟਰ ਮੁਤਾਬਕ ਹਾਲੀਆ ਮਹੀਨਿਆਂ ਵਿੱਚ ਅਜਿਹੇ ਮਾਮਲਿਆਂ ਨੂੰ ਲੈ ਕੇ ਭੋਜਨ ਅਤੇ ਪੀਣ ਵਾਲੇ ਪਦਾਰਥਾਂ ਨਾਲ ਸਬੰਧਤ ਕੰਪਨੀਆਂ ਨੂੰ 150 ਤੋਂ ਵੱਧ ਨੋਟਿਸ ਜਾਰੀ ਕੀਤੇ ਜਾ ਚੁੱਕੇ ਹਨ।
ਇਸੇ ਮੁਹਿੰਮ ਤਹਿਤ ਕੇ.ਐੱਫ.ਸੀ., ਮੈਕਡੋਨਲਡਜ਼, ਪੀਜ਼ਾ ਹੱਟ, ਡੋਮਿਨੋਜ਼ ਅਤੇ ਕੋਸਟਾ ਕੌਫੀ ਸਮੇਤ ਭੋਜਨ ਸੇਵਾ ਅਦਾਰਿਆਂ ਨੂੰ ਵੀ 30 ਤੋਂ ਵੱਧ ਨੋਟਿਸ ਜਾਰੀ ਕੀਤੇ ਗਏ ਹਨ। ਐੱਫ.ਐੱਸ.ਐੱਸ.ਏ.ਆਈ. ਨੇ ਇਹ ਵੀ ਦੱਸਿਆ ਕਿ ਕਾਰਵਾਈ ਦੇ ਹਿੱਸੇ ਵਜੋਂ ਡੋਮਿਨੋਜ਼ ਦੇ ਪੰਜ ਲਾਇਸੈਂਸ ਮੁਅੱਤਲ ਕੀਤੇ ਗਏ ਹਨ।
