ਨਵੀਂ ਦਿੱਲੀ :- ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ ਦੀ ਸਾਲਾਨਾ ਆਮ ਮੀਟਿੰਗ 18 ਸਤੰਬਰ ਨੂੰ ਮੁੰਬਈ ਸਥਿਤ ਬੀਸੀਸੀਆਈ ਦੇ ਮੁੱਖ ਦਫ਼ਤਰ ਵਿੱਚ ਹੋਣ ਜਾ ਰਹੀ ਹੈ। ਮੀਟਿੰਗ ਦੌਰਾਨ ਆਈਸੀਸੀ ਵਿੱਚ ਭਾਰਤ ਦੇ ਪ੍ਰਤੀਨਿਧੀ ਦੀ ਨਾਮਜ਼ਦਗੀ ਤੋਂ ਇਲਾਵਾ ਘਰੇਲੂ ਕ੍ਰਿਕਟ ਨਾਲ ਜੁੜੇ ਕਈ ਅਹਿਮ ਫ਼ੈਸਲੇ ਲਏ ਜਾਣ ਦੀ ਸੰਭਾਵਨਾ ਹੈ। ਅੰਡੇਮਾਨ ਅਤੇ ਨਿਕੋਬਾਰ ਟਾਪੂ ਕ੍ਰਿਕਟ ਐਸੋਸੀਏਸ਼ਨ ਨੂੰ ਐਸੋਸੀਏਟ ਮੈਂਬਰਸ਼ਿਪ ਦੇਣ ਦਾ ਮਾਮਲਾ ਵੀ ਏਜੰਡੇ ਵਿੱਚ ਸ਼ਾਮਲ ਹੋ ਸਕਦਾ ਹੈ।
ਆਈਸੀਸੀ ’ਚ ਭਾਰਤ ਦੇ ਪ੍ਰਤੀਨਿਧੀ ਦੀ ਨਾਮਜ਼ਦਗੀ
ਬੀਸੀਸੀਆਈ ਵੱਲੋਂ ਆਪਣੀਆਂ ਮੈਂਬਰ ਐਸੋਸੀਏਸ਼ਨਾਂ ਨੂੰ ਭੇਜੇ ਗਏ ਨੋਟਿਸ ਮੁਤਾਬਕ ਆਈਸੀਸੀ ਵਿੱਚ ਭਾਰਤ ਦੀ ਨੁਮਾਇੰਦਗੀ ਕਰਨ ਵਾਲੇ ਪ੍ਰਤੀਨਿਧੀ ਦੀ ਨਾਮਜ਼ਦਗੀ ਏਜੀਐੱਮ ਦੇ ਪ੍ਰਮੁੱਖ ਮੁੱਦਿਆਂ ਵਿੱਚੋਂ ਇੱਕ ਰਹੇਗੀ। ਇਸ ਫ਼ੈਸਲੇ ’ਤੇ ਬੋਰਡ ਦੀ ਆਮ ਸਭਾ ਦੌਰਾਨ ਵਿਚਾਰ ਕੀਤਾ ਜਾਵੇਗਾ।
ਅੰਡੇਮਾਨ ਕ੍ਰਿਕਟ ਐਸੋਸੀਏਸ਼ਨ ਨੂੰ ਮਿਲ ਸਕਦੀ ਹੈ ਐਸੋਸੀਏਟ ਮੈਂਬਰਸ਼ਿਪ
ਏਜੀਐੱਮ ਵਿੱਚ ਅੰਡੇਮਾਨ ਅਤੇ ਨਿਕੋਬਾਰ ਟਾਪੂ ਕ੍ਰਿਕਟ ਐਸੋਸੀਏਸ਼ਨ ਨੂੰ ਬੀਸੀਸੀਆਈ ਦੀ ਐਸੋਸੀਏਟ ਮੈਂਬਰਸ਼ਿਪ ਦੇਣ ਸਬੰਧੀ ਪ੍ਰਸਤਾਵ ਵੀ ਵਿਚਾਰਿਆ ਜਾ ਸਕਦਾ ਹੈ। ਇਹ ਮਾਮਲਾ ਪਹਿਲਾਂ ਬੀਸੀਸੀਆਈ ਦੀ ਸਿਖਰ ਪ੍ਰੀਸ਼ਦ ਵਿੱਚ ਚਰਚਾ ਲਈ ਆ ਚੁੱਕਾ ਹੈ ਅਤੇ ਹੁਣ ਇਸ ਨੂੰ ਅੰਤਿਮ ਵਿਚਾਰ ਲਈ ਆਮ ਸਭਾ ਦੇ ਸਾਹਮਣੇ ਰੱਖੇ ਜਾਣ ਦੀ ਸੰਭਾਵਨਾ ਹੈ।
ਮੈਂਬਰਸ਼ਿਪ ਮਿਲੀ ਤਾਂ ਨਹੀਂ ਹੋਵੇਗਾ ਵੋਟਿੰਗ ਅਧਿਕਾਰ
ਜੇਕਰ ਏਜੀਐੱਮ ਵਿੱਚ ਪ੍ਰਸਤਾਵ ਨੂੰ ਮਨਜ਼ੂਰੀ ਮਿਲ ਜਾਂਦੀ ਹੈ ਤਾਂ ਅੰਡੇਮਾਨ ਅਤੇ ਨਿਕੋਬਾਰ ਟਾਪੂ ਕ੍ਰਿਕਟ ਐਸੋਸੀਏਸ਼ਨ ਨੂੰ ਬੀਸੀਸੀਆਈ ਦੇ ਢਾਂਚੇ ਵਿੱਚ ਰਸਮੀ ਤੌਰ ’ਤੇ ਥਾਂ ਮਿਲ ਜਾਵੇਗੀ। ਹਾਲਾਂਕਿ ਐਸੋਸੀਏਟ ਮੈਂਬਰ ਹੋਣ ਦੇ ਨਾਤੇ ਐਸੋਸੀਏਸ਼ਨ ਨੂੰ ਵੋਟ ਪਾਉਣ ਦਾ ਅਧਿਕਾਰ ਨਹੀਂ ਮਿਲੇਗਾ। ਇਸ ਦੇ ਬਾਵਜੂਦ ਇਹ ਫ਼ੈਸਲਾ ਟਾਪੂ ਖੇਤਰ ਵਿੱਚ ਕ੍ਰਿਕਟ ਨੂੰ ਬੋਰਡ ਦੇ ਪੱਧਰ ’ਤੇ ਮਾਨਤਾ ਦੇਣ ਵੱਲ ਅਹਿਮ ਕਦਮ ਮੰਨਿਆ ਜਾ ਰਿਹਾ ਹੈ।
ਸਥਾਨਕ ਕ੍ਰਿਕਟਰਾਂ ਲਈ ਵਧ ਸਕਣਗੇ ਮੌਕੇ
ਬੀਸੀਸੀਆਈ ਦੇ ਢਾਂਚੇ ਵਿੱਚ ਸ਼ਾਮਲ ਹੋਣ ਨਾਲ ਅੰਡੇਮਾਨ ਅਤੇ ਨਿਕੋਬਾਰ ਦੇ ਕ੍ਰਿਕਟਰਾਂ ਅਤੇ ਸਥਾਨਕ ਕ੍ਰਿਕਟ ਪ੍ਰਬੰਧਕਾਂ ਲਈ ਵਿਕਾਸ ਦੇ ਨਵੇਂ ਰਾਹ ਖੁੱਲ੍ਹ ਸਕਦੇ ਹਨ। ਘਰੇਲੂ ਕ੍ਰਿਕਟ ਮੁਕਾਬਲਿਆਂ, ਸਿਖਲਾਈ ਅਤੇ ਹੋਰ ਵਿਕਾਸ ਪ੍ਰੋਗਰਾਮਾਂ ਨਾਲ ਜੁੜਨ ਦੇ ਮੌਕੇ ਵੀ ਵਧਣ ਦੀ ਉਮੀਦ ਹੈ।
ਆਈਪੀਐੱਲ ਗਵਰਨਿੰਗ ਕੌਂਸਲ ਲਈ ਵੀ ਹੋਵੇਗੀ ਚੋਣ
ਏਜੀਐੱਮ ਦੌਰਾਨ ਇੰਡੀਅਨ ਪ੍ਰੀਮੀਅਰ ਲੀਗ ਦੀ ਗਵਰਨਿੰਗ ਕੌਂਸਲ ਲਈ ਆਮ ਸਭਾ ਵੱਲੋਂ ਦੋ ਪ੍ਰਤੀਨਿਧੀਆਂ ਦੀ ਚੋਣ ਵੀ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਇੰਡੀਅਨ ਕ੍ਰਿਕਟਰਜ਼ ਐਸੋਸੀਏਸ਼ਨ ਵੱਲੋਂ ਇੱਕ ਪ੍ਰਤੀਨਿਧੀ ਨੂੰ ਵੀ ਆਈਪੀਐੱਲ ਗਵਰਨਿੰਗ ਕੌਂਸਲ ਵਿੱਚ ਸ਼ਾਮਲ ਕੀਤਾ ਜਾਵੇਗਾ।
38 ਟੀਮਾਂ ਬੀਸੀਸੀਆਈ ਦੇ ਘਰੇਲੂ ਢਾਂਚੇ ਦਾ ਹਿੱਸਾ
ਇਸ ਵੇਲੇ ਬੀਸੀਸੀਆਈ ਵੱਲੋਂ ਮਨਜ਼ੂਰਸ਼ੁਦਾ ਘਰੇਲੂ ਕ੍ਰਿਕਟ ਮੁਕਾਬਲਿਆਂ ਵਿੱਚ ਕੁੱਲ 38 ਟੀਮਾਂ ਹਿੱਸਾ ਲੈਂਦੀਆਂਲੈਣ ਹਨ। ਅੰਡੇਮਾਨ ਅਤੇ ਨਿਕੋਬਾਰ ਨੂੰ ਐਸੋਸੀਏਟ ਮੈਂਬਰਸ਼ਿਪ ਦੇਣ ਦੀ ਤਜਵੀਜ਼ ਨੂੰ ਵੀ ਉਨ੍ਹਾਂ ਖੇਤਰਾਂ ਨੂੰ ਰਸਮੀ ਕ੍ਰਿਕਟ ਪ੍ਰਣਾਲੀ ਨਾਲ ਜੋੜਨ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ, ਜੋ ਹਾਲੇ ਬੋਰਡ ਦੇ ਮੌਜੂਦਾ ਮੈਂਬਰਸ਼ਿਪ ਢਾਂਚੇ ਵਿੱਚ ਪੂਰੀ ਤਰ੍ਹਾਂ ਸ਼ਾਮਲ ਨਹੀਂ ਹਨ।
