ਨਵੀਂ ਦਿੱਲੀ :- ਯੂਕਰੇਨ ਦੇ ਚੋਰਨੋਮੋਰਸਕ ਬੰਦਰਗਾਹ ‘ਤੇ ਖੜ੍ਹੇ ਇੱਕ ਮਾਲਵਾਹਕ ਜਹਾਜ਼ ਵਿੱਚ ਸਵਾਰ 13 ਭਾਰਤੀ ਮਲਾਹ ਜੰਗੀ ਹਾਲਾਤਾਂ ਵਿਚਕਾਰ ਫਸੇ ਹੋਏ ਹਨ। ਬੰਦਰਗਾਹ ਦੇ ਆਲੇ-ਦੁਆਲੇ ਲਗਾਤਾਰ ਡਰੋਨ ਅਤੇ ਮਿਜ਼ਾਈਲ ਹਮਲੇ ਹੋਣ ਕਾਰਨ ਉਨ੍ਹਾਂ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਵਧ ਗਈ ਹੈ। ਭਾਰਤੀ ਮਲਾਹਾਂ ਦੀ ਸੰਸਥਾ ਫਾਰਵਰਡ ਸੀਮੈਨਜ਼ ਯੂਨੀਅਨ ਆਫ਼ ਇੰਡੀਆ (FSUI) ਨੇ ਇਸ ਮਾਮਲੇ ਵਿੱਚ ਤੁਰੰਤ ਦਖ਼ਲ ਦੀ ਮੰਗ ਕੀਤੀ ਹੈ।
15 ਮੈਂਬਰੀ ਜਹਾਜ਼ੀ ਅਮਲੇ ਵਿੱਚ 13 ਭਾਰਤੀ
ਜਾਣਕਾਰੀ ਅਨੁਸਾਰ ਐਮਵੀ ਅਮੀਰ-1 (MV AMIR1) ਨਾਮਕ ਮਾਲਵਾਹਕ ਜਹਾਜ਼ ‘ਤੇ ਕੁੱਲ 15 ਕਰੂ ਮੈਂਬਰ ਸਵਾਰ ਹਨ, ਜਿਨ੍ਹਾਂ ਵਿੱਚੋਂ 13 ਭਾਰਤੀ ਹਨ। ਜਹਾਜ਼ ਕਾਫ਼ੀ ਸਮੇਂ ਤੋਂ ਯੂਕਰੇਨ ਦੇ ਚੋਰਨੋਮੋਰਸਕ ਬੰਦਰਗਾਹ ‘ਤੇ ਖੜ੍ਹਾ ਹੈ, ਜਦਕਿ ਆਲੇ-ਦੁਆਲੇ ਦਾ ਇਲਾਕਾ ਲਗਾਤਾਰ ਹਮਲਿਆਂ ਦੀ ਲਪੇਟ ਵਿੱਚ ਹੈ।
ਹਰ ਵੇਲੇ ਬਣਿਆ ਰਹਿੰਦਾ ਹੈ ਜਾਨ ਦਾ ਖ਼ਤਰਾ
ਮਲਾਹਾਂ ਦੀ ਯੂਨੀਅਨ ਦਾ ਕਹਿਣਾ ਹੈ ਕਿ ਜਹਾਜ਼ ‘ਤੇ ਮੌਜੂਦ ਕਰੂ ਬਹੁਤ ਹੀ ਖ਼ਤਰਨਾਕ ਹਾਲਾਤਾਂ ਵਿੱਚ ਰਹਿਣ ਲਈ ਮਜਬੂਰ ਹੈ। ਹਮਲਿਆਂ ਕਾਰਨ ਕਿਸੇ ਵੀ ਵੇਲੇ ਜਾਨੀ ਨੁਕਸਾਨ ਹੋਣ ਦਾ ਖ਼ਤਰਾ ਬਣਿਆ ਹੋਇਆ ਹੈ ਅਤੇ ਕਰੂ ਮੈਂਬਰ ਲਗਾਤਾਰ ਡਰ ਦੇ ਸਾਏ ਹੇਠ ਆਪਣਾ ਸਮਾਂ ਬਿਤਾ ਰਹੇ ਹਨ।
ਭਾਰਤ ਸਰਕਾਰ ਸਮੇਤ ਸਬੰਧਤ ਧਿਰਾਂ ਨੂੰ ਕੀਤੀ ਦਖ਼ਲ ਦੀ ਅਪੀਲ
ਫਾਰਵਰਡ ਸੀਮੈਨਜ਼ ਯੂਨੀਅਨ ਆਫ਼ ਇੰਡੀਆ ਨੇ ਭਾਰਤ ਸਰਕਾਰ, ਜਹਾਜ਼ ਦੇ ਮਾਲਕਾਂ, ਜਹਾਜ਼ ਦੇ ਫਲੈਗ ਸਟੇਟ ਅਤੇ ਹੋਰ ਸਬੰਧਤ ਅਧਿਕਾਰੀਆਂ ਨੂੰ ਤੁਰੰਤ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਹੈ। ਯੂਨੀਅਨ ਨੇ ਮੰਗ ਕੀਤੀ ਹੈ ਕਿ ਫਸੇ ਹੋਏ ਮਲਾਹਾਂ ਨੂੰ ਜਲਦੀ ਤੋਂ ਜਲਦੀ ਸੁਰੱਖਿਅਤ ਥਾਂ ‘ਤੇ ਪਹੁੰਚਾਇਆ ਜਾਵੇ।
ਵੀਡੀਓ ਨੇ ਵਧਾਈ ਚਿੰਤਾ
ਯੂਨੀਅਨ ਵੱਲੋਂ ਇੱਕ ਵੀਡੀਓ ਵੀ ਜਾਰੀ ਕੀਤੀ ਗਈ ਹੈ, ਜੋ ਦਾਅਵਾ ਕੀਤਾ ਗਿਆ ਹੈ ਕਿ ਜਹਾਜ਼ ਤੋਂ ਹੀ ਬਣਾਈ ਗਈ ਹੈ। ਇਸ ਵਿੱਚ ਬੰਦਰਗਾਹ ਨੇੜੇ ਧੂੰਏਂ ਦੇ ਵੱਡੇ ਗੁਬਾਰ ਉੱਠਦੇ ਨਜ਼ਰ ਆ ਰਹੇ ਹਨ, ਜਿਸ ਨਾਲ ਖੇਤਰ ਦੀ ਗੰਭੀਰ ਸੁਰੱਖਿਆ ਸਥਿਤੀ ਦਾ ਅੰਦਾਜ਼ਾ ਲੱਗਦਾ ਹੈ।
ਵਿਦੇਸ਼ ਮੰਤਰਾਲੇ ਜਾਂ ਕੰਪਨੀ ਵੱਲੋਂ ਕੋਈ ਅਧਿਕਾਰਤ ਬਿਆਨ ਨਹੀਂ
ਖ਼ਬਰ ਲਿਖੇ ਜਾਣ ਤੱਕ ਭਾਰਤ ਦੇ ਵਿਦੇਸ਼ ਮੰਤਰਾਲੇ ਜਾਂ ਜਹਾਜ਼ ਚਲਾਉਣ ਵਾਲੀ ਕੰਪਨੀ ਵੱਲੋਂ ਇਸ ਮਾਮਲੇ ਸਬੰਧੀ ਕੋਈ ਅਧਿਕਾਰਤ ਪ੍ਰਤੀਕਿਰਿਆ ਜਾਰੀ ਨਹੀਂ ਕੀਤੀ ਗਈ।
ਕਾਲੇ ਸਾਗਰ ਵਿੱਚ ਵਪਾਰਕ ਜਹਾਜ਼ਾਂ ਲਈ ਵਧਿਆ ਖ਼ਤਰਾ
ਰੂਸ-ਯੂਕਰੇਨ ਜੰਗ ਦੌਰਾਨ ਕਾਲੇ ਸਾਗਰ ਵਿੱਚ ਆਵਾਜਾਈ ਕਰਨ ਵਾਲੇ ਵਪਾਰਕ ਜਹਾਜ਼ਾਂ ਲਈ ਖ਼ਤਰਾ ਲਗਾਤਾਰ ਵਧ ਰਿਹਾ ਹੈ। ਹਾਲ ਹੀ ਵਿੱਚ ਇੱਕ ਹੋਰ ਵਪਾਰਕ ਜਹਾਜ਼ ‘ਤੇ ਹੋਏ ਹਮਲੇ ਵਿੱਚ ਇੱਕ ਭਾਰਤੀ ਮਲਾਹ ਦੀ ਮੌਤ ਤੋਂ ਬਾਅਦ ਭਾਰਤ ਨੇ ਯੂਕਰੇਨ ਦੇ ਰਾਜਦੂਤ ਕੋਲ ਸਖ਼ਤ ਇਤਰਾਜ਼ ਦਰਜ ਕਰਵਾਇਆ ਸੀ। ਇਸ ਘਟਨਾ ਤੋਂ ਬਾਅਦ ਜੰਗੀ ਖੇਤਰ ਵਿੱਚ ਫਸੇ ਭਾਰਤੀ ਮਲਾਹਾਂ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਹੋਰ ਵੀ ਗੰਭੀਰ ਹੋ ਗਈ ਹੈ।
