ਮੁੰਬਈ ਪੁਲਸ ਨੇ ਬਾਡੀਗਾਰਡਾਂ ਸਮੇਤ ਵਾਧੂ ਜਵਾਨ ਕੀਤੇ ਤਾਇਨਾਤ, ਰੈਪਿਡੋ ਨੇ ਮੁਲਜ਼ਮ ਨਾਲ ਆਪਣੇ ਸਬੰਧਾਂ ਬਾਰੇ ਦਿੱਤਾ ਸਪੱਸ਼ਟੀਕਰਨ
ਗੁਰਪ੍ਰੀਤ ਸਿੰਘ :- ਅਦਾਕਾਰ ਟਾਈਗਰ ਸ਼ਰਾਫ ਤੇ ਫਾਇਰਿੰਗ ਦੀ ਘਟਨਾ ਤੋਂ ਬਾਅਦ ਉਨ੍ਹਾਂ ਦੀ ਸੁਰੱਖਿਆ ਦੇ ਪ੍ਰਬੰਧ ਸਖ਼ਤ ਕਰ ਦਿੱਤੇ ਗਏ ਹਨ। ਮੁੰਬਈ ਪੁਲਸ ਦੀ ਪ੍ਰੋਟੈਕਸ਼ਨ ਬ੍ਰਾਂਚ ਨੇ ਉਨ੍ਹਾਂ ਦੀ ਸੁਰੱਖਿਆ ਲਈ ਬਾਡੀਗਾਰਡ ਤਾਇਨਾਤ ਕੀਤੇ ਹਨ। ਇਸ ਦੇ ਨਾਲ ਹੀ ਸਥਾਨਕ ਥਾਣੇ ਵੱਲੋਂ ਇੱਕ ਪੁਲਸ ਅਧਿਕਾਰੀ ਅਤੇ ਵਾਧੂ ਮੁਲਾਜ਼ਮ ਵੀ ਲਗਾਏ ਗਏ ਹਨ।
ਸੋਨੀਪਤ ਵਿੱਚ ਦੋ ਹੋਰ ਨੌਜਵਾਨਾਂ ਨੂੰ ਹਿਰਾਸਤ ’ਚ ਲੈਣ ਦੀ ਖ਼ਬਰ
ਮੀਡੀਆ ਰਿਪੋਰਟਾਂ ਮੁਤਾਬਕ, ਹਰਿਆਣਾ ਦੇ ਸੋਨੀਪਤ ਵਾਸੀ ਰੇਹਾਨ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਪੁਲਸ ਨੇ ਉਸ ਦੇ ਦੋ ਦੋਸਤਾਂ ਸਮੀਰ ਅਤੇ ਬੋਨੀ ਨੂੰ ਵੀ ਹਿਰਾਸਤ ਵਿੱਚ ਲਿਆ ਹੈ। ਸਮੀਰ ਪਹਿਲਾਂ ਰੇਹਾਨ ਦਾ ਗੁਆਂਢੀ ਰਹਿ ਚੁੱਕਾ ਹੈ। ਹਾਲਾਂਕਿ, ਸੋਨੀਪਤ ਪੁਲਸ ਨੇ ਇਸ ਸਬੰਧੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ। ਰੇਹਾਨ ਦੀ ਮਾਂ ਸ਼ਮਸ਼ੀਦਾ ਨੇ ਦਾਅਵਾ ਕੀਤਾ ਹੈ ਕਿ ਪੁਲਸ ਦੋਵਾਂ ਨੂੰ ਆਪਣੇ ਨਾਲ ਲੈ ਗਈ।
ਕੋਟਾ ਰੇਲਵੇ ਸਟੇਸ਼ਨ ਤੋਂ ਤਿੰਨ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ
ਰਿਪੋਰਟਾਂ ਅਨੁਸਾਰ, ਇਸ ਮਾਮਲੇ ਵਿੱਚ ਤਿੰਨ ਮੁਲਜ਼ਮਾਂ ਨੂੰ ਰਾਜਸਥਾਨ ਦੇ ਕੋਟਾ ਰੇਲਵੇ ਸਟੇਸ਼ਨ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਦਾਅਵਾ ਹੈ ਕਿ ਉਹ ਨੇਪਾਲ ਜਾਣ ਦੀ ਤਿਆਰੀ ਵਿੱਚ ਸਨ। ਇਨ੍ਹਾਂ ਵਿੱਚ 22 ਸਾਲਾ ਰਿਤਿਕ ਬਿਹਾਰ ਦੇ ਬੇਗੂਸਰਾਏ ਦਾ ਰਹਿਣ ਵਾਲਾ ਹੈ, ਜੋ ਮੁੰਬਈ ਦੇ ਅੰਧੇਰੀ ਪੱਛਮੀ ਇਲਾਕੇ ਵਿੱਚ ਰਹਿੰਦਾ ਸੀ ਅਤੇ ਰੈਪਿਡੋ ਲਈ ਬਾਈਕ ਚਲਾਉਂਦਾ ਸੀ। ਦੂਜਾ ਮੁਲਜ਼ਮ 18 ਸਾਲਾ ਰੇਹਾਨ ਸੋਨੀਪਤ ਦੀ ਈਦਗਾਹ ਕਾਲੋਨੀ ਨਾਲ ਸਬੰਧਤ ਹੈ, ਜਦਕਿ ਤੀਜਾ ਮੁਲਜ਼ਮ 17 ਸਾਲ ਦਾ ਨਾਬਾਲਗ ਦੱਸਿਆ ਗਿਆ ਹੈ।
ਰੈਪਿਡੋ ਨੇ ਆਪਣੇ ਪਲੇਟਫਾਰਮ ਬਾਰੇ ਦਿੱਤੀ ਸਫ਼ਾਈ
ਫਾਇਰਿੰਗ ਮਾਮਲੇ ਵਿੱਚ ਰਿਤਿਕ ਦਾ ਨਾਂ ਸਾਹਮਣੇ ਆਉਣ ਤੋਂ ਬਾਅਦ ਰੈਪਿਡੋ ਨੇ ਸਪੱਸ਼ਟ ਕੀਤਾ ਕਿ ਉਹ 14 ਅਕਤੂਬਰ ਤੋਂ ਕੰਪਨੀ ਦੇ ਪਲੇਟਫਾਰਮ ’ਤੇ ਸਰਗਰਮ ਨਹੀਂ ਸੀ। ਕੰਪਨੀ ਮੁਤਾਬਕ, ਘਟਨਾ ਵਾਲੇ ਦਿਨ ਉਸ ਨੇ ਰੈਪਿਡੋ ਦੀ ਸੇਵਾ ਡਰਾਈਵਰ ਵਜੋਂ ਨਹੀਂ, ਸਗੋਂ ਗਾਹਕ ਵਜੋਂ ਵਰਤੀ ਸੀ।
ਕੰਪਨੀ ਨੇ ਕਿਹਾ ਕਿ ਉਹ ਟਾਈਗਰ ਸ਼ਰਾਫ ਅਤੇ ਉਨ੍ਹਾਂ ਦੀ ਟੀਮ ਨਾਲ ਵਾਪਰੀ ਘਟਨਾ ਤੋਂ ਚਿੰਤਤ ਹੈ ਅਤੇ ਜਾਂਚ ਏਜੰਸੀਆਂ ਨੂੰ ਲੋੜੀਂਦੀ ਜਾਣਕਾਰੀ ਦੇ ਚੁੱਕੀ ਹੈ। ਰੈਪਿਡੋ ਨੇ ਇਹ ਵੀ ਕਿਹਾ ਕਿ ਗਿਗ ਇਕਾਨਮੀ ਨਾਲ ਜੁੜੇ ਲੋਕ ਇੱਕੋ ਸਮੇਂ ਕਈ ਪਲੇਟਫਾਰਮਾਂ ’ਤੇ ਰਜਿਸਟਰਡ ਹੋ ਸਕਦੇ ਹਨ। ਫਿਲਹਾਲ, ਫਾਇਰਿੰਗ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਮੁਲਜ਼ਮਾਂ ਵਿਰੁੱਧ ਦੋਸ਼ਾਂ ਬਾਰੇ ਅੰਤਿਮ ਫ਼ੈਸਲਾ ਅਦਾਲਤੀ ਕਾਰਵਾਈ ਤੋਂ ਬਾਅਦ ਹੀ ਹੋਵੇਗਾ।
