ਨਵੀਂ ਦਿੱਲੀ :- ਮੌਸਮ ਵਿਭਾਗ (PMD) ਨੇ ਚੇਤਾਵਨੀ ਜਾਰੀ ਕਰਦਿਆਂ ਦੱਸਿਆ ਕਿ ਪੰਜਾਬ, ਖੈਬਰ ਪਖਤੂਨਖਵਾ, ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਕਸ਼ਮੀਰ, ਇਸਲਾਮਾਬਾਦ ਅਤੇ ਪੋਠੋਹਾਰ ਸਮੇਤ ਕਈ ਖੇਤਰਾਂ ਵਿੱਚ ਭਾਰੀ ਬਾਰਿਸ਼ ਅਤੇ ਤੂਫ਼ਾਨ ਹੋ ਸਕਦੇ ਹਨ। ਇਸ ਨਾਲ ਅਚਾਨਕ ਹੜ੍ਹ ਅਤੇ ਜ਼ਮੀਨ ਖਿਸਕਣ ਦਾ ਖ਼ਤਰਾ ਵਧ ਗਿਆ ਹੈ।
ਉੱਤਰ-ਪੂਰਬੀ ਬਲੋਚਿਸਤਾਨ, ਦੱਖਣ-ਪੂਰਬੀ ਸਿੰਧ ਅਤੇ ਗਿਲਗਿਤ-ਬਾਲਟਿਸਤਾਨ ਵਿੱਚ ਵੀ ਭਾਰੀ ਬਾਰਿਸ਼ ਹੋਣ ਦੀ ਸੰਭਾਵਨਾ ਹੈ। ਇਸਦੇ ਨਾਲ, ਲਾਹੌਰ, ਗੁਜਰਾਂਵਾਲਾ ਅਤੇ ਸਿਆਲਕੋਟ ਵਰਗੇ ਨੀਵੇਂ ਖੇਤਰ ਹੜ੍ਹ ਲਈ ਸੰਵੇਦਨਸ਼ੀਲ ਹਨ। ਪਹਾੜੀ ਖੇਤਰਾਂ ਵਿੱਚ ਜ਼ਮੀਨ ਖਿਸਕਣ ਅਤੇ ਮਲਬਾ ਡਿੱਗਣ ਨਾਲ ਸੜਕਾਂ ਬੰਦ ਹੋ ਸਕਦੀਆਂ ਹਨ।
ਹੜ੍ਹ ਲਈ ਚੇਤਾਵਨੀ ਜਾਰੀ
ਪੀਐਮਡੀਏ ਨੇ ਓਕਾਰਾ ਅਤੇ ਸਾਹੀਵਾਲ ਜ਼ਿਲ੍ਹਿਆਂ ਵਿੱਚ ਵੀ ਹੜ੍ਹ ਦੀ ਚੇਤਾਵਨੀ ਜਾਰੀ ਕੀਤੀ ਹੈ। ਅਥਾਰਟੀ ਦੇ ਅਨੁਸਾਰ, ਰਾਵੀ ਦਰਿਆ ਦਾ ਪਾਣੀ ਅਗਲੇ 36 ਘੰਟਿਆਂ ਵਿੱਚ ਸਦਾਨੀ ਖੇਤਰ ਨੂੰ ਡੁਬੋ ਸਕਦਾ ਹੈ।
ਸਤਲੁਜ ਦਰਿਆ ਦਾ ਰਿਕਾਰਡ ਪੱਧਰ
ਅਧਿਕਾਰੀਆਂ ਨੇ ਕਸੂਰ ਸ਼ਹਿਰ ਦੀ ਸੁਰੱਖਿਆ ਲਈ ਜਾਣਬੁੱਝ ਕੇ ਆਰਆਰਏ-1 ਬੰਨ੍ਹ ਨੂੰ ਤੋੜਿਆ। ਸਤਲੁਜ ਦਰਿਆ ਦਾ ਪਾਣੀ 1955 ਤੋਂ ਬਾਅਦ ਪਹਿਲੀ ਵਾਰ ਰਿਕਾਰਡ ਪੱਧਰ ’ਤੇ ਪਹੁੰਚਿਆ ਸੀ।
ਲਾਹੌਰ ਅਤੇ ਝੰਗ ‘ਚ ਹੜ੍ਹ ਦਾ ਡਰ
ਸ਼ੁੱਕਰਵਾਰ ਨੂੰ ਹੜ੍ਹ ਦਾ ਪਾਣੀ ਲਾਹੌਰ ਵਿੱਚ ਪਹੁੰਚਿਆ ਅਤੇ ਝੰਗ ਦੇ ਵੱਡੇ ਸ਼ਹਿਰ ਨੂੰ ਡੁੱਬਣ ਦਾ ਡਰ ਸੀ। ਇਹ ਖੇਤਰ ਲਗਭਗ 40 ਸਾਲਾਂ ਵਿੱਚ ਸਭ ਤੋਂ ਭਿਆਨਕ ਹੜ੍ਹ ਦਾ ਸਾਹਮਣਾ ਕਰ ਰਿਹਾ ਹੈ।
ਸਿਆਲਕੋਟ ‘ਚ ਐਮਰਜੈਂਸੀ ਚੇਤਾਵਨੀ
ਰਾਸ਼ਟਰੀ ਆਫ਼ਤ ਪ੍ਰਬੰਧਨ ਅਥਾਰਟੀ ਨੇ ਸਿਆਲਕੋਟ ਜ਼ਿਲ੍ਹੇ ਦੇ ਹੈੱਡ ਮਰਾਲਾ ਵਿਖੇ ਚਨਾਬ ਦਰਿਆ ਲਈ ਹੜ੍ਹ ਦੀ ਚਿਤਾਵਨੀ ਜਾਰੀ ਕੀਤੀ ਹੈ। ਲੋਕਾਂ ਨੂੰ ਐਸਐਮਐਸ ਰਾਹੀਂ ਵੀ ਸੂਚਿਤ ਕੀਤਾ ਜਾ ਰਿਹਾ ਹੈ, ਤਾਂ ਜੋ ਜ਼ਿਆਦਾ ਤੋਂ ਜ਼ਿਆਦਾ ਲੋਕ ਸੁਰੱਖਿਅਤ ਰਹਿ ਸਕਣ।
