ਅਹਿਮਦਾਬਾਦ :- ਟਮਾਟਰ ਕੈਚੱਪ ਵਰਗਾ ਦਿਖਣ ਵਾਲਾ ਸੌਸ ਟਮਾਟਰਾਂ ਦੀ ਬਜਾਏ ਆਲੂ ਦੇ ਫਲੇਕਸ ਅਤੇ ਮੱਕੀ ਦੇ ਆਟੇ ਤੋਂ ਤਿਆਰ ਕੀਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਅਹਿਮਦਾਬਾਦ ਮਿਉਂਸਪਲ ਕਾਰਪੋਰੇਸ਼ਨ (ਏ.ਐੱਮ.ਸੀ.) ਦੇ ਫੂਡ ਸੇਫਟੀ ਵਿਭਾਗ ਨੇ ਬਹਿਰਾਮਪੁਰਾ ਇਲਾਕੇ ਵਿੱਚ ਸਥਿਤ ਇਸ ਉਤਪਾਦ ਨੂੰ ਬਣਾਉਣ ਵਾਲੀ ਇਕਾਈ ਨੂੰ ਸੀਲ ਕਰ ਦਿੱਤਾ ਹੈ।
ਆਲੂ ਦੇ ਪਾਊਡਰ ਤੋਂ ਬਣਾਇਆ ਜਾ ਰਿਹਾ ਸੀ ਸੌਸ
ਵਿਭਾਗ ਮੁਤਾਬਕ, ‘M J F FOOD’ ਨਾਂ ਦੀ ਇਹ ਇਕਾਈ ‘Tasty Snack Touch Up’ ਦੇ ਨਾਂ ਹੇਠ ਉਤਪਾਦ ਵੇਚਦੀ ਸੀ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਸੌਸ ਬਣਾਉਣ ਲਈ ਆਲੂ ਦੇ ਫਲੇਕਸ, ਮੱਕੀ ਦਾ ਆਟਾ, ਖੰਡ, ਨਮਕ, ਰੰਗ ਅਤੇ ਹੋਰ ਰਸਾਇਣ ਵਰਤੇ ਜਾ ਰਹੇ ਸਨ। ਇਸ ਦੀ ਦਿੱਖ ਅਤੇ ਬਣਤਰ ਟਮਾਟਰ ਕੈਚੱਪ ਵਰਗੀ ਸੀ, ਪਰ ਤਿਆਰ ਕਰਨ ਦੀ ਪ੍ਰਕਿਰਿਆ ਵਿੱਚ ਟਮਾਟਰਾਂ ਦੀ ਵਰਤੋਂ ਨਹੀਂ ਕੀਤੀ ਗਈ ਸੀ।
ਲੇਬਲ ਅਤੇ ਦਸਤਾਵੇਜ਼ਾਂ ਵਿੱਚ ਮਿਲੀਆਂ ਖਾਮੀਆਂ
ਜਾਂਚ ਦੌਰਾਨ ਉਤਪਾਦ ਦੇ ਲੇਬਲ ’ਤੇ ਦਰਜ ਸਮੱਗਰੀ ਅਤੇ ਉਸ ਦੀ ਅਸਲ ਵਰਤੋਂ ਦੀ ਪੁਸ਼ਟੀ ਕਰਨ ਵਾਲੇ ਖਰੀਦ ਬਿੱਲ ਪੇਸ਼ ਨਹੀਂ ਕੀਤੇ ਗਏ। ਇਸ ਤੋਂ ਇਲਾਵਾ, ਇਕਾਈ ਵੱਲੋਂ ਦਿਖਾਈ ਗਈ ਐੱਫ.ਐੱਸ.ਐੱਸ.ਏ.ਆਈ. ਰਜਿਸਟ੍ਰੇਸ਼ਨ ਅਤੇ ਕਾਰੋਬਾਰ ਦੇ ਵੇਰਵਿਆਂ ਵਿੱਚ ਵੀ ਅੰਤਰ ਪਾਇਆ ਗਿਆ। ਵਿਭਾਗ ਇਸ ਗੱਲ ਦੀ ਜਾਂਚ ਕਰ ਰਿਹਾ ਹੈ ਕਿ ਉਤਪਾਦ ਦੀ ਪੈਕਿੰਗ ਅਤੇ ਲੇਬਲਿੰਗ ਨਾਲ ਖਪਤਕਾਰਾਂ ਨੂੰ ਗਲਤਫ਼ਹਿਮੀ ਤਾਂ ਨਹੀਂ ਹੋ ਰਹੀ।
2,000 ਕਿਲੋ ਮਾਲ ਦੀ ਵਿਕਰੀ ’ਤੇ ਰੋਕ
ਕਾਰਵਾਈ ਦੌਰਾਨ ਅਧਿਕਾਰੀਆਂ ਨੇ ਲਗਭਗ 2,000 ਕਿਲੋਗ੍ਰਾਮ ਤਿਆਰ ਉਤਪਾਦ ਅਤੇ ਕੱਚਾ ਮਾਲ ਜ਼ਬਤ ਕਰਕੇ ਇਸ ਦੀ ਵਿਕਰੀ ਤੇ ਵੰਡ ਤੇ ਰੋਕ ਲਗਾ ਦਿੱਤੀ। ਜਾਂਚ ਲਈ ਸੌਸ ਦਾ ਨਮੂਨਾ ਪ੍ਰਯੋਗਸ਼ਾਲਾ ਵਿੱਚ ਭੇਜਣ ਵਾਸਤੇ ਲਿਆ ਗਿਆ ਹੈ। ਵਿਭਾਗ ਅਨੁਸਾਰ, ਜਾਂਚ ਰਿਪੋਰਟ ਅਤੇ ਅਗਲੀ ਪੜਤਾਲ ਦੇ ਆਧਾਰ ’ਤੇ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
