ਰੂਪਨਗਰ :- ਰੂਪਨਗਰ ਜ਼ਿਲ੍ਹੇ ਦੇ ਮੋਰਿੰਡਾ ਬੱਸ ਅੱਡੇ ਤੋਂ ਪੰਜਾਬ ਰੋਡਵੇਜ਼ ਟਰਾਂਸਪੋਰਟ ਕਾਰਪੋਰੇਸ਼ਨ (PRTC) ਦੀ ਇੱਕ ਬੱਸ ਚੋਰੀ ਹੋਣ ਦਾ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਚੋਰੀ ਤੋਂ ਬਾਅਦ ਬੱਸ ਨੂੰ ਕਟਾਣੀ ਰੋਡ ਨੇੜੇ ਲਾਵਾਰਿਸ ਹਾਲਤ ਵਿੱਚ ਲੱਭ ਲਿਆ ਗਿਆ, ਪਰ ਇਸ ਦੌਰਾਨ ਬੱਸ ਵਿੱਚੋਂ ਡੀਜ਼ਲ ਕੱਢ ਲਿਆ ਗਿਆ ਸੀ ਅਤੇ ਉਸ ਦੇ ਤਾਲੇ ਵੀ ਟੁੱਟੇ ਹੋਏ ਮਿਲੇ।
ਰਾਤ ਨੂੰ ਖੜ੍ਹੀ ਕੀਤੀ ਬੱਸ ਸਵੇਰੇ ਮਿਲੀ ਗਾਇਬ
ਬੱਸ ਚਾਲਕ ਹਰਦੀਪ ਸਿੰਘ ਨੇ ਦੱਸਿਆ ਕਿ ਉਹ ਸ਼ਨਿੱਚਰਵਾਰ ਰਾਤ ਕਰੀਬ 8 ਵਜੇ ਚੰਡੀਗੜ੍ਹ ਡਿਪੂ ਦੀ PRTC ਬੱਸ (ਨੰਬਰ PB-65-AK-4954) ਨੂੰ ਮੋਰਿੰਡਾ ਬੱਸ ਅੱਡੇ ਵਿੱਚ ਖੜ੍ਹੀ ਕਰਕੇ ਘਰ ਚਲੇ ਗਏ ਸਨ। ਜਦੋਂ ਐਤਵਾਰ ਸਵੇਰੇ ਡਿਊਟੀ ਲਈ ਪਹੁੰਚੇ ਤਾਂ ਬੱਸ ਆਪਣੀ ਥਾਂ ਤੋਂ ਗਾਇਬ ਸੀ।
GPS ਨੇ ਖੋਲ੍ਹਿਆ ਚੋਰੀ ਦਾ ਸਮਾਂ
ਚਾਲਕ ਅਨੁਸਾਰ ਬੱਸ ਵਿੱਚ ਲੱਗੇ GPS ਸਿਸਟਮ ਤੋਂ ਪਤਾ ਲੱਗਾ ਕਿ ਰਾਤ ਕਰੀਬ 1 ਵਜੇ ਬੱਸ ਨੂੰ ਬੱਸ ਅੱਡੇ ਵਿੱਚੋਂ ਲਿਜਾਇਆ ਗਿਆ। ਇਸ ਤੋਂ ਬਾਅਦ ਵਿਭਾਗ ਅਤੇ ਪੁਲਿਸ ਨੂੰ ਤੁਰੰਤ ਸੂਚਨਾ ਦਿੱਤੀ ਗਈ।
ਬਰਾਮਦ ਬੱਸ ਵਿੱਚੋਂ ਡੀਜ਼ਲ ਗਾਇਬ, ਤਾਲੇ ਟੁੱਟੇ ਮਿਲੇ
ਜਾਂਚ ਦੌਰਾਨ ਬੱਸ ਕਟਾਣੀ ਰੋਡ ‘ਤੇ ਖੜ੍ਹੀ ਮਿਲ ਗਈ। ਹਾਲਾਂਕਿ ਮੁੱਢਲੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਬੱਸ ਵਿੱਚੋਂ ਡੀਜ਼ਲ ਕੱਢ ਲਿਆ ਗਿਆ ਸੀ ਅਤੇ ਵਾਹਨ ਦੇ ਤਾਲੇ ਵੀ ਤੋੜੇ ਗਏ ਸਨ। ਪੁਲਿਸ ਇਸ ਗੱਲ ਦੀ ਵੀ ਜਾਂਚ ਕਰ ਰਹੀ ਹੈ ਕਿ ਮੁਲਜ਼ਮਾਂ ਦਾ ਮਕਸਦ ਸਿਰਫ਼ ਡੀਜ਼ਲ ਚੋਰੀ ਕਰਨਾ ਸੀ ਜਾਂ ਹੋਰ ਵੀ ਕੋਈ ਮਨਸੂਬਾ ਸੀ।
ਬੱਸ ਅੱਡੇ ਦੇ CCTV ਕੈਮਰੇ ਨਿਕਲੇ ਬੰਦ
ਬੱਸ ਚਾਲਕ ਨੇ ਦੋਸ਼ ਲਾਇਆ ਕਿ ਜਦੋਂ ਚੋਰੀ ਦੀ ਜਾਂਚ ਲਈ ਬੱਸ ਅੱਡੇ ਦੇ ਸੀਸੀਟੀਵੀ ਕੈਮਰੇ ਦੇਖੇ ਗਏ ਤਾਂ ਪਤਾ ਲੱਗਾ ਕਿ ਉਹ ਪਹਿਲਾਂ ਤੋਂ ਹੀ ਖ਼ਰਾਬ ਸਨ। ਉਨ੍ਹਾਂ ਬੱਸ ਅੱਡੇ ਵਿੱਚ ਸੁਰੱਖਿਆ ਪ੍ਰਬੰਧਾਂ ਦੀ ਘਾਟ ‘ਤੇ ਵੀ ਸਵਾਲ ਚੁੱਕੇ।
ਪੁਲਿਸ ਨੇ ਜਾਂਚ ਕੀਤੀ ਸ਼ੁਰੂ
PRTC ਦੇ ਚੀਫ਼ ਇੰਸਪੈਕਟਰ ਨੰਦ ਕਿਸ਼ੋਰ ਨੇ ਦੱਸਿਆ ਕਿ ਘਟਨਾ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਨੂੰ ਸ਼ਿਕਾਇਤ ਦੇ ਦਿੱਤੀ ਗਈ ਸੀ। ਉਨ੍ਹਾਂ ਕਿਹਾ ਕਿ ਭਾਵੇਂ ਬੱਸ ਅੱਡੇ ਦੇ ਸੀਸੀਟੀਵੀ ਕੈਮਰੇ ਬੰਦ ਸਨ, ਫਿਰ ਵੀ ਪੁਲਿਸ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਲੱਗੇ ਹੋਰ ਕੈਮਰਿਆਂ ਦੀ ਫੁਟੇਜ ਇਕੱਠੀ ਕਰ ਰਹੀ ਹੈ ਤਾਂ ਜੋ ਬੱਸ ਚੋਰੀ ਕਰਨ ਵਾਲਿਆਂ ਦੀ ਪਛਾਣ ਕਰਕੇ ਉਨ੍ਹਾਂ ਨੂੰ ਕਾਬੂ ਕੀਤਾ ਜਾ ਸਕੇ। ਮਾਮਲੇ ਦੀ ਜਾਂਚ ਜਾਰੀ ਹੈ।
