ਚੰਡੀਗੜ੍ਹ :- ਪੰਜਾਬ ਵਿਧਾਨ ਸਭਾ ਚੋਣਾਂ-2027 ਨੂੰ ਲੈ ਕੇ ਸਿਆਸੀ ਸਰਗਰਮੀਆਂ ਤੇਜ਼ ਹੋਣ ਲੱਗੀਆਂ ਹਨ। ਇਸੇ ਤਹਿਤ ਸ਼੍ਰੋਮਣੀ ਅਕਾਲੀ ਦਲ (ਪੁਨਰ ਸੁਰਜੀਤ) ਵੱਲੋਂ ਸੰਗਠਨ ਨੂੰ ਹਲਕਾ ਪੱਧਰ ’ਤੇ ਮਜ਼ਬੂਤ ਕਰਨ ਦੀ ਕਵਾਇਦ ਸ਼ੁਰੂ ਕਰ ਦਿੱਤੀ ਗਈ ਹੈ। ਪਾਰਟੀ ਨੇ ਸੂਬੇ ਦੇ 32 ਵਿਧਾਨ ਸਭਾ ਹਲਕਿਆਂ ਲਈ ਕੋ-ਆਰਡੀਨੇਟਰਾਂ ਦੀ ਪਹਿਲੀ ਸੂਚੀ ਜਾਰੀ ਕਰ ਦਿੱਤੀ ਹੈ। ਪਾਰਟੀ ਵੱਲੋਂ ਆਉਣ ਵਾਲੇ ਸਮੇਂ ਵਿੱਚ ਬਾਕੀ ਹਲਕਿਆਂ ਲਈ ਵੀ ਕੋ-ਆਰਡੀਨੇਟਰ ਨਿਯੁਕਤ ਕੀਤੇ ਜਾਣਗੇ।
ਪਾਰਟੀ ਪ੍ਰਧਾਨ ਗਿਆਨੀ ਹਰਪ੍ਰੀਤ ਸਿੰਘ ਨੇ ਸਿਆਸੀ ਮਾਮਲਿਆਂ ਬਾਰੇ ਕਮੇਟੀ ਅਤੇ ਕੋਰ ਕਮੇਟੀ ਦੇ ਮੈਂਬਰਾਂ ਨਾਲ ਵਿਚਾਰ-ਵਟਾਂਦਰੇ ਤੋਂ ਬਾਅਦ ਇਹ ਨਿਯੁਕਤੀਆਂ ਕੀਤੀਆਂ ਹਨ। ਪਾਰਟੀ ਦੀ ਯੋਜਨਾ ਸੂਬੇ ਦੇ ਸਾਰੇ 117 ਵਿਧਾਨ ਸਭਾ ਹਲਕਿਆਂ ਵਿੱਚ ਜਥੇਬੰਦਕ ਜ਼ਿੰਮੇਵਾਰੀਆਂ ਤੈਅ ਕਰਨ ਦੀ ਹੈ।
ਸੀਨੀਅਰਾਂ ਦੇ ਤਜਰਬੇ ਨਾਲ ਨੌਜਵਾਨਾਂ ਨੂੰ ਵੀ ਜ਼ਿੰਮੇਵਾਰੀ
ਗਿਆਨੀ ਹਰਪ੍ਰੀਤ ਸਿੰਘ ਨੇ ਕਿਹਾ ਕਿ ਕੋ-ਆਰਡੀਨੇਟਰਾਂ ਦੀ ਚੋਣ ਕਰਦੇ ਸਮੇਂ ਪਾਰਟੀ ਨੇ ਤਜਰਬੇਕਾਰ ਆਗੂਆਂ ਦੇ ਨਾਲ ਨੌਜਵਾਨ ਆਗੂਆਂ ਨੂੰ ਵੀ ਮੌਕਾ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਨਵੀਂ ਟੀਮ ਰਾਹੀਂ ਸੰਗਠਨ ਨੂੰ ਹੋਰ ਸਰਗਰਮ ਕਰਨ ਅਤੇ ਹਲਕਾ ਪੱਧਰ ’ਤੇ ਪਾਰਟੀ ਦੀਆਂ ਗਤੀਵਿਧੀਆਂ ਨੂੰ ਗਤੀ ਦੇਣ ਦਾ ਯਤਨ ਕੀਤਾ ਜਾਵੇਗਾ।
ਪਾਰਟੀ ਪ੍ਰਧਾਨ ਨੇ ਨਵ-ਨਿਯੁਕਤ ਕੋ-ਆਰਡੀਨੇਟਰਾਂ ਨੂੰ ਆਪਣੇ-ਆਪਣੇ ਹਲਕਿਆਂ ਵਿੱਚ ਵਰਕਰਾਂ ਨਾਲ ਨਿਰੰਤਰ ਸੰਪਰਕ ਬਣਾਉਣ ਅਤੇ ਜਥੇਬੰਦਕ ਕੰਮਕਾਜ ਨੂੰ ਮਜ਼ਬੂਤ ਕਰਨ ਲਈ ਕਿਹਾ ਹੈ।
ਹਲਕਾ ਪੱਧਰ ’ਤੇ ਵਰਕਰਾਂ ਨੂੰ ਸਰਗਰਮ ਕਰਨ ’ਤੇ ਜ਼ੋਰ
ਪਾਰਟੀ ਵੱਲੋਂ ਆਉਣ ਵਾਲੇ ਦਿਨਾਂ ਵਿੱਚ ਵਿਧਾਨ ਸਭਾ ਹਲਕਿਆਂ ਅੰਦਰ ਮੀਟਿੰਗਾਂ ਅਤੇ ਹੋਰ ਜਥੇਬੰਦਕ ਸਰਗਰਮੀਆਂ ਵਧਾਉਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਇਨ੍ਹਾਂ ਕੋਸ਼ਿਸ਼ਾਂ ਰਾਹੀਂ ਜ਼ਮੀਨੀ ਪੱਧਰ ’ਤੇ ਵਰਕਰਾਂ ਨਾਲ ਸੰਪਰਕ ਵਧਾਉਣ, ਪਾਰਟੀ ਦੀਆਂ ਨੀਤੀਆਂ ਲੋਕਾਂ ਤੱਕ ਪਹੁੰਚਾਉਣ ਅਤੇ ਸੰਗਠਨ ਨੂੰ ਮਜ਼ਬੂਤ ਕਰਨ ’ਤੇ ਧਿਆਨ ਦਿੱਤਾ ਜਾਵੇਗਾ।
ਇਨ੍ਹਾਂ ਹਲਕਿਆਂ ਦੀ ਜ਼ਿੰਮੇਵਾਰੀ ਇਨ੍ਹਾਂ ਆਗੂਆਂ ਨੂੰ
ਪਾਰਟੀ ਵੱਲੋਂ ਜਾਰੀ ਪਹਿਲੀ ਸੂਚੀ ਵਿੱਚ 32 ਹਲਕਿਆਂ ਲਈ ਜ਼ਿੰਮੇਵਾਰੀਆਂ ਤੈਅ ਕੀਤੀਆਂ ਗਈਆਂ ਹਨ। ਸੂਚੀ ਇਸ ਤਰ੍ਹਾਂ ਹੈ:
ਮਾਝਾ ਖੇਤਰ
- ਪੱਟੀ — ਆਦੇਸ਼ ਪ੍ਰਤਾਪ ਸਿੰਘ ਕੈਰੋਂ
- ਡੇਰਾ ਬਾਬਾ ਨਾਨਕ — ਸੁੱਚਾ ਸਿੰਘ ਛੋਟੇਪੁਰ
- ਅਜਨਾਲਾ — ਡਾ. ਰਤਨ ਸਿੰਘ ਅਜਨਾਲਾ
- ਅਟਾਰੀ — ਅਜੈਪਾਲ ਸਿੰਘ ਮੀਰਾਂਕੋਟ
- ਬਾਬਾ ਬਕਾਲਾ — ਰਣਜੀਤ ਸਿੰਘ ਛੱਜਲਵੱਡੀ
- ਜ਼ੀਰਾ — ਕਰਨੈਲ ਸਿੰਘ ਪੀਰਮੁਹੰਮਦ
- ਫ਼ਿਰੋਜ਼ਪੁਰ ਦਿਹਾਤੀ — ਡਾ. ਮੋਹਨ ਸਿੰਘ ਲਾਲਕਾ
ਦੋਆਬਾ ਖੇਤਰ
- ਭੁੱਲਥ — ਬੀਬੀ ਜਗੀਰ ਕੌਰ
- ਨਕੋਦਰ — ਗੁਰਪ੍ਰਤਾਪ ਸਿੰਘ ਵਡਾਲਾ
- ਫਿਲੌਰ — ਸਰਵਣ ਸਿੰਘ ਫਿਲੌਰ
- ਆਦਮਪੁਰ — ਜਰਨੈਲ ਸਿੰਘ ਗੜ੍ਹਦੀਵਾਲ
- ਉੜਮੁੜ ਟਾਂਡਾ — ਮਨਜੀਤ ਸਿੰਘ ਦਸੂਹਾ
- ਬਲਾਚੌਰ — ਅਮਿਤ ਸੇਠੀ ਥੋਪੀਆ
- ਜਲੰਧਰ ਕੈਂਟ — ਬੀਬੀ ਹਰਜੀਤ ਕੌਰ ਤਲਵੰਡੀ
- ਨਵਾਂਸ਼ਹਿਰ — ਮਹਿੰਦਰ ਸਿੰਘ ਹੁਸੈਨਪੁਰ
- ਸ਼ਾਮ ਚੁਰਾਸੀ — ਮਦਨ ਮੋਹਨ ਸਿੰਘ
ਮਾਲਵਾ ਖੇਤਰ
- ਲਹਿਰਾਗਾਗਾ — ਪਰਮਿੰਦਰ ਸਿੰਘ ਢੀਂਡਸਾ
- ਸਾਹਨੇਵਾਲ — ਸੰਤਾ ਸਿੰਘ ਉਮੈਦਪੁਰੀ
- ਸੁਨਾਮ — ਭਾਈ ਗੋਬਿੰਦ ਸਿੰਘ ਲੌਂਗੋਵਾਲ
- ਬਰਨਾਲਾ — ਗਗਨਜੀਤ ਸਿੰਘ ਬਰਨਾਲਾ
- ਸੰਗਰੂਰ — ਪ੍ਰਕਾਸ਼ ਚੰਦ ਗਰਗ
- ਸਨੌਰ — ਹਰਿੰਦਰਪਾਲ ਸਿੰਘ ਚੰਦੂਮਾਜਰਾ
- ਬੱਸੀ ਪਠਾਣਾਂ — ਸਾਬਕਾ ਜਸਟਿਸ ਨਿਰਮਲ ਸਿੰਘ
- ਅਮਲੋਹ — ਬਲਤੇਜ ਸਿੰਘ ਮਹਿਦੂਦਾ
- ਫ਼ਰੀਦਕੋਟ — ਅਮਨਿੰਦਰ ਸਿੰਘ ਬੰਨੀ ਬਰਾੜ
- ਘਨੌਰ — ਭੁਪਿੰਦਰ ਸਿੰਘ ਸੇਖੂਪੁਰ
- ਨਾਭਾ — ਰਵਿੰਦਰ ਸਿੰਘ ਸ਼ਾਹਪੁਰ
- ਸਮਾਣਾ — ਚਰਨਜੀਤ ਸਿੰਘ ਮਾਵੀ
- ਪਟਿਆਲਾ ਦਿਹਾਤੀ — ਰਣਧੀਰ ਸਿੰਘ ਰੱਖੜਾ
- ਡੇਰਾਬੱਸੀ — ਬੀਬੀ ਰਾਜਿੰਦਰ ਕੌਰ
- ਬਠਿੰਡਾ ਸ਼ਹਿਰੀ — ਸੁਰਜੀਤ ਸਿੰਘ ਬੋਪਾਰਾਏ
- ਬੁਢਲਾਡਾ — ਮਲਕੀਤ ਸਿੰਘ ਸਮਾਉਂ
ਬਾਕੀ ਹਲਕਿਆਂ ਲਈ ਵੀ ਜਲਦ ਹੋਵੇਗੀ ਨਿਯੁਕਤੀ
ਪਾਰਟੀ ਵੱਲੋਂ ਜਾਰੀ ਕੀਤੀ ਗਈ ਇਹ ਪਹਿਲੀ ਸੂਚੀ ਹੈ। ਇਸ ਤੋਂ ਬਾਅਦ ਸੂਬੇ ਦੇ ਬਾਕੀ ਵਿਧਾਨ ਸਭਾ ਹਲਕਿਆਂ ਵਿੱਚ ਵੀ ਕੋ-ਆਰਡੀਨੇਟਰ ਨਿਯੁਕਤ ਕੀਤੇ ਜਾਣ ਦੀ ਤਿਆਰੀ ਹੈ। ਪਾਰਟੀ ਦੀ ਇਸ ਜਥੇਬੰਦਕ ਕਵਾਇਦ ਨੂੰ 2027 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਜ਼ਮੀਨੀ ਪੱਧਰ ਤੇ ਆਪਣਾ ਆਧਾਰ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਵਜੋਂ ਦੇਖਿਆ ਜਾ ਰਿਹਾ ਹੈ।
