ਨਵੀਂ ਦਿੱਲੀ :- ਭਾਰਤ ਏ ਅਤੇ ਸ੍ਰੀਲੰਕਾ ਏ ਵਿਚਕਾਰ ਤਿਕੋਣੀ ਇੱਕ ਰੋਜ਼ਾ ਲੜੀ ਦਾ ਖ਼ਿਤਾਬੀ ਮੁਕਾਬਲਾ ਐਤਵਾਰ ਨੂੰ ਦਾਂਬੁਲਾ ਦੇ ਰੰਗੀਰੀ ਅੰਤਰਰਾਸ਼ਟਰੀ ਕ੍ਰਿਕਟ ਸਟੇਡੀਅਮ ਵਿੱਚ ਖੇਡਿਆ ਜਾਵੇਗਾ। ਸਵੇਰੇ 10 ਵਜੇ ਸ਼ੁਰੂ ਹੋਣ ਵਾਲੇ ਇਸ ਫ਼ਾਈਨਲ ਵਿੱਚ ਦੋਵੇਂ ਟੀਮਾਂ ਲੜੀ ਦਾ ਖ਼ਿਤਾਬ ਆਪਣੇ ਨਾਮ ਕਰਨ ਲਈ ਪੂਰੀ ਤਾਕਤ ਨਾਲ ਮੈਦਾਨ ਵਿੱਚ ਉਤਰਣਗੀਆਂ।
ਲੀਗ ਗੇੜ ਦੌਰਾਨ ਭਾਰਤ ਏ ਅਤੇ ਸ੍ਰੀਲੰਕਾ ਏ ਦੀਆਂ ਟੱਕਰਾਂ ਕਾਫ਼ੀ ਰੋਮਾਂਚਕ ਰਹੀਆਂ। ਪਹਿਲੇ ਮੁਕਾਬਲੇ ਵਿੱਚ ਭਾਰਤੀ ਟੀਮ ਨੇ ਸਖ਼ਤ ਮੁਕਾਬਲੇ ਤੋਂ ਬਾਅਦ ਜਿੱਤ ਦਰਜ ਕੀਤੀ ਸੀ, ਜਦਕਿ ਦੂਜੇ ਮੈਚ ਵਿੱਚ ਦੋਵਾਂ ਟੀਮਾਂ ਇੱਕੋ ਸਕੋਰ ‘ਤੇ ਰੁਕ ਗਈਆਂ ਸਨ। ਇਸ ਤੋਂ ਬਾਅਦ ਸੁਪਰ ਓਵਰ ਵਿੱਚ ਸ੍ਰੀਲੰਕਾ ਏ ਨੇ ਬਾਜ਼ੀ ਮਾਰ ਕੇ ਹਿਸਾਬ ਬਰਾਬਰ ਕਰ ਦਿੱਤਾ ਸੀ। ਇਸ ਕਾਰਨ ਫ਼ਾਈਨਲ ਨੂੰ ਲੈ ਕੇ ਕ੍ਰਿਕਟ ਪ੍ਰੇਮੀਆਂ ਵਿੱਚ ਖਾਸ ਉਤਸ਼ਾਹ ਦੇਖਿਆ ਜਾ ਰਿਹਾ ਹੈ।
ਵੈਭਵ ਸੂਰਯਵੰਸ਼ੀ ਤੋਂ ਵੱਡੀ ਪਾਰੀ ਦੀ ਉਮੀਦ
ਭਾਰਤੀ ਟੀਮ ਦੇ ਨੌਜਵਾਨ ਬੱਲੇਬਾਜ਼ ਵੈਭਵ ਸੂਰਯਵੰਸ਼ੀ ‘ਤੇ ਸਭ ਦੀਆਂ ਨਜ਼ਰਾਂ ਟਿਕੀਆਂ ਹੋਈਆਂ ਹਨ। ਅੰਤਰਰਾਸ਼ਟਰੀ ਪੱਧਰ ‘ਤੇ ਆਪਣੀ ਧਮਾਕੇਦਾਰ ਬੱਲੇਬਾਜ਼ੀ ਨਾਲ ਚਰਚਾ ਵਿੱਚ ਆਏ ਇਸ ਖਿਡਾਰੀ ਤੋਂ ਫ਼ਾਈਨਲ ਵਿੱਚ ਵੱਡੀ ਪਾਰੀ ਦੀ ਉਮੀਦ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਮੌਜੂਦਾ ਲੜੀ ਵਿੱਚ ਉਹ ਆਪਣੀ ਸਮਰੱਥਾ ਅਨੁਸਾਰ ਪ੍ਰਦਰਸ਼ਨ ਨਹੀਂ ਕਰ ਸਕਿਆ ਅਤੇ ਹੁਣ ਤੱਕ ਕੋਈ ਅਰਧ ਸੈਂਕੜਾ ਵੀ ਨਹੀਂ ਜੜ ਸਕਿਆ। ਅਜਿਹੇ ਵਿੱਚ ਫ਼ਾਈਨਲ ਉਸ ਲਈ ਆਪਣੀ ਯੋਗਤਾ ਸਾਬਤ ਕਰਨ ਦਾ ਵੱਡਾ ਮੌਕਾ ਹੋਵੇਗਾ।
ਮੌਸਮ ਬਣ ਸਕਦਾ ਹੈ ਨਿਰਣਾਇਕ ਤੱਤ
ਫ਼ਾਈਨਲ ਦੌਰਾਨ ਮੌਸਮ ਵੀ ਅਹਿਮ ਭੂਮਿਕਾ ਨਿਭਾ ਸਕਦਾ ਹੈ। ਮੌਸਮ ਵਿਭਾਗ ਅਨੁਸਾਰ ਦਿਨ ਭਰ ਅਸਮਾਨ ਵਿੱਚ ਬੱਦਲ ਛਾਏ ਰਹਿਣ ਦੀ ਸੰਭਾਵਨਾ ਹੈ ਅਤੇ ਮੀਂਹ ਪੈਣ ਦੇ ਵੀ ਆਸਾਰ ਹਨ। ਇਸ ਕਾਰਨ ਦੋਵਾਂ ਟੀਮਾਂ ਨੂੰ ਆਪਣੀ ਰਣਨੀਤੀ ਬਣਾਉਂਦੇ ਸਮੇਂ ਮੌਸਮੀ ਹਾਲਾਤਾਂ ਨੂੰ ਵੀ ਧਿਆਨ ਵਿੱਚ ਰੱਖਣਾ ਪਵੇਗਾ।
ਭਾਰਤ ਏ ਦੀ ਸੰਭਾਵਿਤ ਟੀਮ
ਵੈਭਵ ਸੂਰਯਵੰਸ਼ੀ, ਪ੍ਰਿਯਾਂਸ਼ ਆਰੀਆ, ਰੁਤੁਰਾਜ ਗਾਇਕਵਾੜ, ਤਿਲਕ ਵਰਮਾ (ਕਪਤਾਨ), ਆਯੂਸ਼ ਬਡੋਨੀ, ਪ੍ਰਭਸਿਮਰਨ ਸਿੰਘ/ਕੁਮਾਰ ਕੁਸ਼ਾਗਰਾ (ਵਿਕਟਕੀਪਰ), ਸੂਰਯਾਂਸ਼ ਸ਼ੈਡਗੇ, ਅਨੁਕੁਲ ਰਾਏ, ਨਿਸ਼ਾਂਤ ਸਿੰਧੂ, ਅੰਸ਼ੁਲ ਕੰਬੋਜ ਅਤੇ ਅਰਸ਼ਦ ਖਾਨ।
ਸ੍ਰੀਲੰਕਾ ਏ ਦੀ ਸੰਭਾਵਿਤ ਟੀਮ
ਨਿਰੋਸ਼ਨ ਡਿਕਵੇਲਾ, ਅਵਿਸ਼ਕਾ ਫਰਨਾਂਡੋ, ਰਵਿੰਦੂ ਫਰਨਾਂਡੋ, ਸਦਿਰਾ ਸਮਰਾਵਿਕਰਮਾ, ਸਾਹਨ ਅਰਾਚਿਗੇ (ਕਪਤਾਨ), ਨੁਵਾਨੀਡੂ ਫਰਨਾਂਡੋ, ਅਹਾਨ ਵਿਕਰਮਸਿੰਘੇ, ਵਨੂਜ਼ਾ ਸਾਹਨ, ਦੁਲਜ ਸਮੁੱਧਿਤਾ, ਵਿਜੇਕਾਂਤ ਵਿਯਾਸਕਾਂਥ ਅਤੇ ਕੁਗਾਥਾ।
ਖ਼ਿਤਾਬ ਲਈ ਸਖ਼ਤ ਟੱਕਰ ਦੇ ਆਸਾਰ
ਦੋਵੇਂ ਟੀਮਾਂ ਲੜੀ ਦੌਰਾਨ ਆਪਣੀ ਕਾਬਲੀਅਤ ਦਾ ਪ੍ਰਦਰਸ਼ਨ ਕਰ ਚੁੱਕੀਆਂ ਹਨ ਅਤੇ ਉਨ੍ਹਾਂ ਵਿਚਾਲੇ ਮੁਕਾਬਲੇ ਵੀ ਕਾਫ਼ੀ ਕਰੀਬ ਰਹੇ ਹਨ। ਅਜਿਹੇ ਵਿੱਚ ਦਾਂਬੁਲਾ ਦਾ ਇਹ ਫ਼ਾਈਨਲ ਵੀ ਰੋਮਾਂਚ ਨਾਲ ਭਰਪੂਰ ਹੋਣ ਦੀ ਉਮੀਦ ਹੈ, ਜਿੱਥੇ ਛੋਟੀਆਂ-ਛੋਟੀਆਂ ਗ਼ਲਤੀਆਂ ਵੀ ਨਤੀਜੇ ‘ਤੇ ਅਸਰ ਪਾ ਸਕਦੀਆਂ ਹਨ।
