ਨਵੀਂ ਦਿੱਲੀ :- ਭਾਰਤੀ ਹਵਾਈ ਸੈਨਾ ਨੇ ਆਸਟ੍ਰੇਲੀਆ ਵਿੱਚ ਹੋਣ ਵਾਲੇ ਵਿਸ਼ਵ ਪੱਧਰੀ ਬਹੁ-ਰਾਸ਼ਟਰੀ ਹਵਾਈ ਜੰਗੀ ਅਭਿਆਸ ‘ਪਿਚ ਬਲੈਕ-2026’ ਲਈ ਆਪਣਾ ਦਲ ਸਫ਼ਲਤਾਪੂਰਵਕ ਤਾਇਨਾਤ ਕਰ ਦਿੱਤਾ ਹੈ। ਇਹ ਅਭਿਆਸ 20 ਜੁਲਾਈ ਤੋਂ 7 ਅਗਸਤ ਤੱਕ ਆਸਟ੍ਰੇਲੀਆ ਦੇ ਉੱਤਰੀ ਖੇਤਰ ਵਿੱਚ ਕਰਵਾਇਆ ਜਾਵੇਗਾ, ਜਿਸ ਵਿੱਚ ਭਾਰਤ ਸਮੇਤ 20 ਦੇਸ਼ਾਂ ਦੀਆਂ ਹਵਾਈ ਸੈਨਾਵਾਂ ਹਿੱਸਾ ਲੈਣਗੀਆਂ।
ਪਹਿਲੀ ਵਾਰ ਰਾਫੇਲ ਜਹਾਜ਼ ਦਿਖਾਉਣਗੇ ਤਾਕਤ
ਇਸ ਅਭਿਆਸ ਵਿੱਚ ਭਾਰਤ ਪਹਿਲੀ ਵਾਰ ਆਪਣੇ ਅਤਿ-ਆਧੁਨਿਕ ਰਾਫੇਲ ਲੜਾਕੂ ਜਹਾਜ਼ ਉਤਾਰੇਗਾ। ਭਾਰਤੀ ਦਲ ਵਿੱਚ ਚਾਰ ਰਾਫੇਲ ਜਹਾਜ਼, ਦੋ ਸੀ-17 ਗਲੋਬਮਾਸਟਰ-3 ਟਰਾਂਸਪੋਰਟ ਜਹਾਜ਼ ਅਤੇ 120 ਤੋਂ ਵੱਧ ਹਵਾਈ ਸੈਨਾ ਦੇ ਅਧਿਕਾਰੀ ਤੇ ਜਵਾਨ ਸ਼ਾਮਲ ਹਨ। ਇਸ ਤੋਂ ਪਹਿਲਾਂ ਭਾਰਤ ਇਸ ਅਭਿਆਸ ਵਿੱਚ ਸੁਖੋਈ-30 ਐੱਮਕੇਆਈ ਜਹਾਜ਼ਾਂ ਨਾਲ ਹਿੱਸਾ ਲੈਂਦਾ ਰਿਹਾ ਹੈ।
100 ਤੋਂ ਵੱਧ ਜਹਾਜ਼ ਲੈਣਗੇ ਹਿੱਸਾ
ਆਸਟ੍ਰੇਲੀਆ ਦੇ ਡਾਰਵਿਨ, ਟਿੰਡਲ ਅਤੇ ਐਂਬਰਲੀ ਹਵਾਈ ਅੱਡਿਆਂ ਤੋਂ ਸੰਚਾਲਿਤ ਹੋਣ ਵਾਲੇ ਇਸ ਅਭਿਆਸ ਵਿੱਚ ਕਰੀਬ 100 ਜੰਗੀ ਜਹਾਜ਼ ਅਤੇ 2,500 ਤੋਂ ਵੱਧ ਫੌਜੀ ਕਰਮਚਾਰੀ ਸ਼ਾਮਲ ਹੋਣਗੇ। ਅਭਿਆਸ ਦੌਰਾਨ ਵੱਡੇ ਪੱਧਰ ਦੀਆਂ ਜੰਗੀ ਸਥਿਤੀਆਂ ਵਿੱਚ ਸਾਂਝੇ ਆਪਰੇਸ਼ਨਾਂ ਅਤੇ ਰਣਨੀਤਕ ਸਮਰੱਥਾ ਦੀ ਪਰਖ ਕੀਤੀ ਜਾਵੇਗੀ।
ਸਾਂਝੇ ਆਪਰੇਸ਼ਨਾਂ ਅਤੇ ਤਾਲਮੇਲ ‘ਤੇ ਰਹੇਗਾ ਜ਼ੋਰ
ਆਸਟ੍ਰੇਲੀਆ ਸਥਿਤ ਭਾਰਤੀ ਹਾਈ ਕਮਿਸ਼ਨ ਨੇ ਦੱਸਿਆ ਕਿ ਇਸ ਅਭਿਆਸ ਦਾ ਮਕਸਦ ਹਵਾਈ ਜੰਗੀ ਹੁਨਰ ਨੂੰ ਹੋਰ ਨਿਖਾਰਨਾ, ਵੱਖ-ਵੱਖ ਦੇਸ਼ਾਂ ਦੀਆਂ ਹਵਾਈ ਸੈਨਾਵਾਂ ਵਿਚਕਾਰ ਆਪਸੀ ਤਾਲਮੇਲ ਮਜ਼ਬੂਤ ਕਰਨਾ ਅਤੇ ਲੰਬੇ ਸਮੇਂ ਲਈ ਰੱਖਿਆ ਸਹਿਯੋਗ ਨੂੰ ਹੋਰ ਮਜ਼ਬੂਤੀ ਦੇਣਾ ਹੈ।
ਕਈ ਵੱਡੇ ਦੇਸ਼ ਹੋਣਗੇ ਸ਼ਾਮਲ
ਇਸ ਵਾਰ ਦੇ ਅਭਿਆਸ ਵਿੱਚ ਭਾਰਤ, ਅਮਰੀਕਾ, ਜਾਪਾਨ ਅਤੇ ਆਸਟ੍ਰੇਲੀਆ ਤੋਂ ਇਲਾਵਾ ਫਰਾਂਸ, ਜਰਮਨੀ, ਦੱਖਣੀ ਕੋਰੀਆ, ਇੰਡੋਨੇਸ਼ੀਆ, ਸਿੰਗਾਪੁਰ, ਸਪੇਨ, ਫਿਲੀਪੀਨਜ਼ ਸਮੇਤ ਕਈ ਹੋਰ ਦੇਸ਼ ਵੀ ਹਿੱਸਾ ਲੈ ਰਹੇ ਹਨ। ਇਸ ਤੋਂ ਇਲਾਵਾ ਕੈਨੇਡਾ, ਮਲੇਸ਼ੀਆ, ਨਿਊਜ਼ੀਲੈਂਡ, ਸਵੀਡਨ ਅਤੇ ਫਿਨਲੈਂਡ ਦੇ ਫੌਜੀ ਅਧਿਕਾਰੀ ਵੀ ਇਸ ਅਭਿਆਸ ਨਾਲ ਜੁੜੇ ਹੋਏ ਹਨ।
ਖੇਤਰੀ ਸੁਰੱਖਿਆ ਲਈ ਅਹਿਮ ਅਭਿਆਸ
ਆਸਟ੍ਰੇਲੀਆ ਦੇ ਰੱਖਿਆ ਮੰਤਰਾਲੇ ਮੁਤਾਬਕ, ਪਿਚ ਬਲੈਕ-2026 ਦੁਨੀਆ ਦੇ ਸਭ ਤੋਂ ਵੱਡੇ ਹਵਾਈ ਸਿਖਲਾਈ ਖੇਤਰਾਂ ਵਿੱਚੋਂ ਇੱਕ ਵਿੱਚ ਕਰਵਾਇਆ ਜਾ ਰਿਹਾ ਹੈ। ਅਭਿਆਸ ਦੇ ਕਮਾਂਡਰ ਏਅਰ ਕਮੋਡੋਰ ਮੈਥਿਊ ਮੈਕਕੋਰਮੈਕ ਨੇ ਕਿਹਾ ਕਿ ਇਹ ਮੰਚ ਸਾਂਝੀ ਯੋਜਨਾਬੰਦੀ, ਜੰਗੀ ਤਿਆਰੀ ਅਤੇ ਆਪਸੀ ਤਜਰਬਿਆਂ ਦੇ ਅਦਾਨ-ਪ੍ਰਦਾਨ ਲਈ ਬੇਹੱਦ ਮਹੱਤਵਪੂਰਨ ਹੈ, ਜਿਸ ਨਾਲ ਭਾਗੀਦਾਰ ਦੇਸ਼ਾਂ ਦੀ ਰੱਖਿਆ ਸਮਰੱਥਾ ਹੋਰ ਮਜ਼ਬੂਤ ਹੋਵੇਗੀ।
