ਨਵੀਂ ਦਿੱਲੀ :- ਮੰਗਲਵਾਰ ਨੂੰ ਮੇਘਾਲਿਆ ਕੈਬਨਿਟ ਵਿੱਚ ਵੱਡੇ ਫੇਰਬਦਲ ਤੋਂ ਪਹਿਲਾਂ ਅੱਠ ਮੰਤਰੀਆਂ ਨੇ ਆਪਣੇ ਅਹੁਦਿਆਂ ਤੋਂ ਅਸਤੀਫ਼ਾ ਦੇ ਦਿੱਤਾ। ਅਸਤੀਫ਼ਾ ਦੇਣ ਵਾਲਿਆਂ ਵਿੱਚ ਏਐਲ ਹੇਕ, ਪਾਲ ਲਿੰਗਡੋਹ ਅਤੇ ਅੰਪਾਰੀਨ ਲਿੰਗਡੋਹ ਸਮੇਤ ਕਈ ਅਹਿਮ ਨਾਮ ਸ਼ਾਮਲ ਹਨ।
ਮੁੱਖ ਮੰਤਰੀ ਨੇ ਰਾਜਪਾਲ ਨੂੰ ਸੌਂਪੇ ਅਸਤੀਫ਼ੇ
ਜਾਣਕਾਰੀ ਅਨੁਸਾਰ ਮੁੱਖ ਮੰਤਰੀ ਕੋਨਰਾਡ ਕੇ. ਸੰਗਮਾ ਨੇ ਰਾਜ ਭਵਨ ਵਿਖੇ ਰਾਜਪਾਲ ਸੀਐਚ ਵਿਜੇਸ਼ੰਕਰ ਨਾਲ ਮੁਲਾਕਾਤ ਕੀਤੀ ਅਤੇ ਅੱਠ ਮੰਤਰੀਆਂ ਦੇ ਅਸਤੀਫ਼ੇ ਸੌਂਪੇ। ਕੋਨਰਾਡ ਸੰਗਮਾ ਐਨਪੀਪੀ ਦੀ ਅਗਵਾਈ ਵਾਲੀ ਮੇਘਾਲਿਆ ਡੈਮੋਕ੍ਰੈਟਿਕ ਅਲਾਇਅੰਸ ਸਰਕਾਰ ਦੇ ਮੁਖੀ ਹਨ।
ਸ਼ਾਮ 5 ਵਜੇ ਨਵੇਂ ਮੰਤਰੀ ਲੈਣਗੇ ਸਹੁੰ
ਅਧਿਕਾਰੀਆਂ ਨੇ ਦੱਸਿਆ ਕਿ ਨਵੇਂ ਮੰਤਰੀ ਮੰਗਲਵਾਰ ਸ਼ਾਮ 5 ਵਜੇ ਰਾਜ ਭਵਨ ਵਿੱਚ ਸਹੁੰ ਚੁੱਕਣਗੇ।
ਕਿਹੜੇ ਮੰਤਰੀ ਹਟੇ ਕੈਬਨਿਟ ਤੋਂ
ਅਸਤੀਫ਼ਾ ਦੇਣ ਵਾਲਿਆਂ ਵਿੱਚ ਐਨਪੀਪੀ ਦੇ ਅੰਪਰੀਨ ਲਿੰਗਡੋਹ, ਕਾਮਿੰਗਨ ਯਾਂਬੋਨ, ਰੱਕਮ ਏ. ਸੰਗਮਾ ਅਤੇ ਅਬੂ ਤਾਹਿਰ ਮੰਡਲ, ਯੂਡੀਪੀ ਦੇ ਪਾਲ ਲਿੰਗਡੋਹ ਅਤੇ ਕਿਰਮਨ ਸ਼ਾਇਲਾ, ਐਚਐਸਪੀਡੀਪੀ ਦੇ ਸ਼ਕਲੀਅਰ ਵਾਰਜਰੀ ਅਤੇ ਭਾਜਪਾ ਦੇ ਏਐਲ ਹੇਕ ਸ਼ਾਮਲ ਹਨ। ਉਨ੍ਹਾਂ ਦੇ ਹਟਣ ਨਾਲ ਕੈਬਨਿਟ ਵਿੱਚ ਨਵੇਂ ਚਿਹਰਿਆਂ ਲਈ ਰਾਹ ਖੁੱਲ੍ਹ ਗਿਆ ਹੈ।
ਨਵੇਂ ਚਿਹਰੇ ਬਣ ਸਕਦੇ ਹਨ ਮੰਤਰੀ
ਪਾਰਟੀ ਸੂਤਰਾਂ ਅਨੁਸਾਰ ਐਨਪੀਪੀ ਦੇ ਵਿਧਾਇਕ ਵਲਾਦਮੀਕੀ ਸ਼ਕਲੀਅਰ ਸ਼ਕਲੀਅਰ, ਸੋਸਥੇਨੇਸ ਸੋਹਤੁਨ, ਬ੍ਰੇਨਿੰਗ ਏ. ਸੰਗਮਾ ਅਤੇ ਟਿਮੋਥੀ ਡੀ ਸ਼ੀਰਾ ਨੂੰ ਕੈਬਨਿਟ ਵਿੱਚ ਸ਼ਾਮਲ ਕੀਤਾ ਜਾਣ ਦੀ ਸੰਭਾਵਨਾ ਹੈ। ਯੂਡੀਪੀ ਵੱਲੋਂ ਮੁਖੀ ਮੈਟਬਾਹ ਲਿੰਗਡੋਹ ਅਤੇ ਸਾਬਕਾ ਮੰਤਰੀ ਲਖਮੇਨ ਰਿੰਬੂਈ ਸਹੁੰ ਚੁੱਕ ਸਕਦੇ ਹਨ।
ਹੋਰ ਪਾਰਟੀਆਂ ਦੇ ਵਿਧਾਇਕ ਵੀ ਆ ਸਕਦੇ ਕੈਬਨਿਟ ‘ਚ
ਸੂਤਰਾਂ ਮੁਤਾਬਕ ਐਚਐਸਪੀਡੀਪੀ ਦੇ ਵਿਧਾਇਕ ਮੈਥੋਡੀਅਸ ਡਖਰ, ਸ਼ਕਲੀਅਰ ਵਾਰਜਰੀ ਦੀ ਥਾਂ ਕੈਬਨਿਟ ‘ਚ ਸ਼ਾਮਲ ਹੋਣਗੇ। ਇਸੇ ਤਰ੍ਹਾਂ ਭਾਜਪਾ ਵੱਲੋਂ ਸੈਨਬੋਰ ਸ਼ੁੱਲਈ, ਏਐਲ ਹੇਕ ਦੀ ਥਾਂ ਨਵੇਂ ਮੰਤਰੀ ਵਜੋਂ ਸਹੁੰ ਚੁੱਕਣਗੇ।
