10ਵੀਂ ਦੀਆਂ ਪ੍ਰੀਖਿਆਵਾਂ 9 ਮਾਰਚ ਤੱਕ ਚੱਲਣਗੀਆਂ
ਸੀਬੀਐੱਸਈ ਵੱਲੋਂ ਜਾਰੀ ਸਮਾਂ-ਸਾਰਣੀ ਮੁਤਾਬਕ 10ਵੀਂ ਜਮਾਤ ਦੀਆਂ ਬੋਰਡ ਪ੍ਰੀਖਿਆਵਾਂ 16 ਫਰਵਰੀ ਤੋਂ ਸ਼ੁਰੂ ਹੋ ਕੇ 9 ਮਾਰਚ 2027 ਤੱਕ ਚੱਲਣਗੀਆਂ। ਇਸ ਦੌਰਾਨ ਵਿਦਿਆਰਥੀਆਂ ਨੂੰ ਵੱਖ-ਵੱਖ ਵਿਸ਼ਿਆਂ ਦੀਆਂ ਪ੍ਰੀਖਿਆਵਾਂ ਦੇਣੀਆਂ ਪੈਣਗੀਆਂ। ਵਿਦਿਆਰਥੀਆਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਆਪਣੀ ਜਮਾਤ ਅਤੇ ਵਿਸ਼ਿਆਂ ਦੇ ਹਿਸਾਬ ਨਾਲ ਡੇਟਸ਼ੀਟ ਦੀ ਜਾਂਚ ਕਰਨ।
12ਵੀਂ ਦੀਆਂ ਪ੍ਰੀਖਿਆਵਾਂ 9 ਅਪ੍ਰੈਲ ਤੱਕ ਹੋਣਗੀਆਂ
12ਵੀਂ ਜਮਾਤ ਦੇ ਵਿਦਿਆਰਥੀਆਂ ਲਈ ਵੀ ਪ੍ਰੀਖਿਆਵਾਂ ਦੀ ਸ਼ੁਰੂਆਤ 16 ਫਰਵਰੀ 2027 ਤੋਂ ਹੋਵੇਗੀ, ਪਰ ਇਹ ਪ੍ਰੀਖਿਆਵਾਂ 9 ਅਪ੍ਰੈਲ 2027 ਤੱਕ ਜਾਰੀ ਰਹਿਣਗੀਆਂ। ਇਸ ਤਰ੍ਹਾਂ 12ਵੀਂ ਦੀ ਪ੍ਰੀਖਿਆ ਦਾ ਸਮਾਂ 10ਵੀਂ ਦੇ ਮੁਕਾਬਲੇ ਵੱਧ ਹੋਵੇਗਾ।
ਪ੍ਰੈਕਟੀਕਲ ਪ੍ਰੀਖਿਆਵਾਂ ਲਈ ਵੀ ਤਰੀਕਾਂ ਤੈਅ
ਬੋਰਡ ਵੱਲੋਂ ਲਿਖਤੀ ਪ੍ਰੀਖਿਆਵਾਂ ਤੋਂ ਪਹਿਲਾਂ ਪ੍ਰੈਕਟੀਕਲ ਅਤੇ ਅੰਦਰੂਨੀ ਮੁਲਾਂਕਣ ਦੀ ਸਮਾਂ-ਸਾਰਣੀ ਵੀ ਜਾਰੀ ਕੀਤੀ ਜਾ ਚੁੱਕੀ ਹੈ। ਆਮ ਅਕਾਦਮਿਕ ਸੈਸ਼ਨ ਅਨੁਸਾਰ ਚੱਲਣ ਵਾਲੇ ਸਕੂਲਾਂ ਵਿੱਚ ਇਹ ਪ੍ਰੀਖਿਆਵਾਂ 1 ਜਨਵਰੀ ਤੋਂ 13 ਫਰਵਰੀ 2027 ਤੱਕ ਕਰਵਾਈਆਂ ਜਾਣਗੀਆਂ। ਇਸ ਦੇ ਉਲਟ ਸਰਦੀਆਂ ਦੀਆਂ ਛੁੱਟੀਆਂ ਵਾਲੇ ਸਕੂਲਾਂ ਵਿੱਚ ਪ੍ਰੈਕਟੀਕਲ ਪ੍ਰੀਖਿਆਵਾਂ ਪਹਿਲਾਂ ਹੀ 9 ਨਵੰਬਰ ਤੋਂ 19 ਦਸੰਬਰ 2026 ਤੱਕ ਕਰਵਾਈਆਂ ਜਾਣਗੀਆਂ।
ਬੋਰਡ ਨੇ ਸਕੂਲਾਂ ਦੇ ਅਕਾਦਮਿਕ ਕੈਲੰਡਰ ਨੂੰ ਧਿਆਨ ਵਿੱਚ ਰੱਖਦਿਆਂ ਪ੍ਰੈਕਟੀਕਲ ਪ੍ਰੀਖਿਆਵਾਂ ਲਈ ਦੋ ਵੱਖ-ਵੱਖ ਸਮਾਂ-ਸੀਮਾਵਾਂ ਤੈਅ ਕੀਤੀਆਂ ਹਨ।
10ਵੀਂ ਦੇ ਵਿਸ਼ਿਆਂ ਵਿੱਚ ਅੰਕਾਂ ਦੀ ਵੰਡ ਵੱਖਰੀ
10ਵੀਂ ਜਮਾਤ ਦੇ ਜ਼ਿਆਦਾਤਰ ਵਿਸ਼ਿਆਂ ਵਿੱਚ ਕੁੱਲ 100 ਅੰਕ ਰੱਖੇ ਗਏ ਹਨ। ਇਨ੍ਹਾਂ ਵਿੱਚੋਂ 80 ਅੰਕ ਲਿਖਤੀ ਪ੍ਰੀਖਿਆ ਅਤੇ 20 ਅੰਕ ਅੰਦਰੂਨੀ ਮੁਲਾਂਕਣ ਦੇ ਹੋਣਗੇ। ਹਾਲਾਂਕਿ ਪ੍ਰੈਕਟੀਕਲ ਅਤੇ ਪ੍ਰੋਜੈਕਟ ਵਾਲੇ ਵਿਸ਼ਿਆਂ ਲਈ ਅੰਕਾਂ ਦੀ ਵੰਡ ਵੱਖਰੀ ਹੈ।
-
ਕੰਪਿਊਟਰ ਐਪਲੀਕੇਸ਼ਨਜ਼ ਵਿੱਚ 50 ਅੰਕ ਲਿਖਤੀ ਅਤੇ 50 ਅੰਕ ਪ੍ਰੈਕਟੀਕਲ ਲਈ ਹਨ।
-
ਹੋਮ ਸਾਇੰਸ ਵਿੱਚ 70 ਅੰਕ ਲਿਖਤੀ ਅਤੇ 30 ਅੰਕ ਪ੍ਰੈਕਟੀਕਲ ਲਈ ਰੱਖੇ ਗਏ ਹਨ।
-
ਪੇਂਟਿੰਗ ਵਿੱਚ 30 ਅੰਕ ਲਿਖਤੀ, 50 ਅੰਕ ਪ੍ਰੈਕਟੀਕਲ ਅਤੇ 20 ਅੰਕ ਅੰਦਰੂਨੀ ਮੁਲਾਂਕਣ ਲਈ ਹਨ।
-
ਐਲੀਮੈਂਟਸ ਆਫ਼ ਬਿਜ਼ਨਸ ਵਿੱਚ 70 ਅੰਕ ਲਿਖਤੀ ਅਤੇ 30 ਅੰਕ ਪ੍ਰੋਜੈਕਟ ਲਈ ਹਨ।
-
ਗਣਿਤ ਬੇਸਿਕ ਅਤੇ ਗਣਿਤ ਸਟੈਂਡਰਡ ਦੋਵਾਂ ਵਿੱਚ 80 ਅੰਕ ਲਿਖਤੀ ਅਤੇ 20 ਅੰਕ ਅੰਦਰੂਨੀ ਮੁਲਾਂਕਣ ਲਈ ਨਿਰਧਾਰਤ ਹਨ।
12ਵੀਂ ਦੇ ਮੁੱਖ ਵਿਸ਼ਿਆਂ ਵਿੱਚ ਪ੍ਰੈਕਟੀਕਲ ਅਤੇ ਲਿਖਤੀ ਅੰਕਾਂ ਦੀ ਵੰਡ
12ਵੀਂ ਜਮਾਤ ਵਿੱਚ ਵਿਗਿਆਨ ਅਤੇ ਹੋਰ ਵਿਸ਼ਿਆਂ ਲਈ ਮੁਲਾਂਕਣ ਦਾ ਤਰੀਕਾ ਵੱਖਰਾ ਰੱਖਿਆ ਗਿਆ ਹੈ। ਫਿਜ਼ਿਕਸ, ਕੈਮਿਸਟਰੀ ਅਤੇ ਬਾਇਓਲੋਜੀ ਵਿੱਚ 70 ਅੰਕ ਲਿਖਤੀ ਪ੍ਰੀਖਿਆ ਅਤੇ 30 ਅੰਕ ਪ੍ਰੈਕਟੀਕਲ ਲਈ ਹੋਣਗੇ। ਕੰਪਿਊਟਰ ਸਾਇੰਸ, ਭੂਗੋਲ ਅਤੇ ਮਨੋਵਿਗਿਆਨ ਵਿੱਚ ਵੀ 70:30 ਦੇ ਅਨੁਪਾਤ ਨਾਲ ਅੰਕਾਂ ਦੀ ਵੰਡ ਕੀਤੀ ਗਈ ਹੈ।
ਇਸੇ ਤਰ੍ਹਾਂ ਗਣਿਤ ਵਿੱਚ 80 ਅੰਕ ਲਿਖਤੀ ਪ੍ਰੀਖਿਆ ਅਤੇ 20 ਅੰਕ ਅੰਦਰੂਨੀ ਮੁਲਾਂਕਣ ਲਈ ਰੱਖੇ ਗਏ ਹਨ। ਅਰਥਸ਼ਾਸਤਰ, ਬਿਜ਼ਨਸ ਸਟੱਡੀਜ਼ ਅਤੇ ਅਕਾਊਂਟੈਂਸੀ ਵਿੱਚ ਵੀ 80 ਅੰਕ ਲਿਖਤੀ ਪ੍ਰੀਖਿਆ ਅਤੇ 20 ਅੰਕ ਪ੍ਰੋਜੈਕਟ ਵਰਕ ਦੇ ਹੋਣਗੇ। ਕਿੱਤਾਮੁਖੀ ਵਿਸ਼ਿਆਂ ਵਿੱਚ ਅੰਕਾਂ ਦੀ ਵੰਡ ਸਬੰਧਤ ਵਿਸ਼ੇ ਅਤੇ ਉਸ ਦੇ ਮੁਲਾਂਕਣ ਦੇ ਤਰੀਕੇ ਅਨੁਸਾਰ ਤੈਅ ਕੀਤੀ ਗਈ ਹੈ।
ਵਿਦਿਆਰਥੀ ਅਧਿਕਾਰਤ ਵੈੱਬਸਾਈਟ ਤੋਂ ਲੈਣ ਜਾਣਕਾਰੀ
ਸੀਬੀਐੱਸਈ ਨੇ ਵਿਦਿਆਰਥੀਆਂ ਨੂੰ ਆਪਣੇ ਚੁਣੇ ਹੋਏ ਵਿਸ਼ਿਆਂ ਅਨੁਸਾਰ ਅੰਕਾਂ ਦੀ ਵੰਡ ਅਤੇ ਪ੍ਰੀਖਿਆ ਸਬੰਧੀ ਹਦਾਇਤਾਂ ਦੀ ਜਾਣਕਾਰੀ ਲੈਣ ਲਈ ਅਧਿਕਾਰਤ ਵੈੱਬਸਾਈਟ ਦੇਖਣ ਦੀ ਸਲਾਹ ਦਿੱਤੀ ਹੈ। ਸਕੂਲਾਂ ਨੂੰ ਵੀ ਕਿਹਾ ਗਿਆ ਹੈ ਕਿ ਉਹ ਵਿਦਿਆਰਥੀਆਂ ਨੂੰ ਹਰੇਕ ਵਿਸ਼ੇ ਦੇ ਮੁਲਾਂਕਣ ਦੇ ਤਰੀਕੇ ਅਤੇ ਵੱਧ ਤੋਂ ਵੱਧ ਅੰਕਾਂ ਬਾਰੇ ਜਾਣੂ ਕਰਵਾਉਣ।
ਵਿਦਿਆਰਥੀ ਡੇਟਸ਼ੀਟ ਅਤੇ ਹੋਰ ਅਧਿਕਾਰਤ ਜਾਣਕਾਰੀ ਲਈ cbse.gov.in ’ਤੇ ਜਾ ਸਕਦੇ ਹਨ।
