ਇੰਡੋਨੇਸ਼ੀਆ :- ਇੰਡੋਨੇਸ਼ੀਆ ਦੇ ਜਾਵਾ ਸਾਗਰ ਵਿੱਚ ਐਤਵਾਰ ਸਵੇਰੇ ਇੱਕ ਯਾਤਰੀ ਜਹਾਜ਼ ਨਾਲ ਸੰਪਰਕ ਟੁੱਟਣ ਤੋਂ ਬਾਅਦ ਹੜਕੰਪ ਮਚ ਗਿਆ। ‘ਵਰਗੋ ਟ੍ਰਾਂਸਪੋਰਟ 8’ ਨਾਮ ਦਾ ਇਹ ਜਹਾਜ਼ ਪੂਰਬੀ ਜਾਵਾ ਦੇ ਸੁਰਾਬਾਇਆ ਤੋਂ ਦੱਖਣੀ ਕਾਲੀਮੰਤਨ ਸੂਬੇ ਦੀ ਰਾਜਧਾਨੀ ਬੰਜਾਰਮਾਸਿਨ ਵੱਲ ਜਾ ਰਿਹਾ ਸੀ। ਜਹਾਜ਼ ਦਾ ਪਤਾ ਨਾ ਲੱਗਣ ਤੋਂ ਬਾਅਦ ਇੰਡੋਨੇਸ਼ੀਆ ਦੀ ਰਾਸ਼ਟਰੀ ਖੋਜ ਅਤੇ ਬਚਾਅ ਏਜੰਸੀ ਬਸਾਰਨਾਸ ਵੱਲੋਂ ਤਲਾਸ਼ੀ ਮੁਹਿੰਮ ਸ਼ੁਰੂ ਕਰ ਦਿੱਤੀ ਗਈ ਹੈ।
ਬੰਜਾਰਮਾਸਿਨ ਤੋਂ 148 ਕਿਲੋਮੀਟਰ ਦੂਰ ਆਖਰੀ ਸਥਿਤੀ ਮਿਲੀ
ਬੰਜਾਰਮਾਸਿਨ ਸਥਿਤ ਖੋਜ ਅਤੇ ਬਚਾਅ ਦਫ਼ਤਰ ਦੇ ਅਧਿਕਾਰੀਆਂ ਮੁਤਾਬਕ ਜਹਾਜ਼ ਜਾਵਾ ਸਾਗਰ ਵਿੱਚੋਂ ਲੰਘ ਰਿਹਾ ਸੀ, ਜਦੋਂ ਉਸ ਨਾਲ ਸੰਪਰਕ ਟੁੱਟ ਗਿਆ। ਸ਼ੁਰੂਆਤੀ ਜਾਣਕਾਰੀ ਅਨੁਸਾਰ ਜਹਾਜ਼ ਦੀ ਆਖਰੀ ਸਥਿਤੀ ਬੰਜਾਰਮਾਸਿਨ ਬੰਦਰਗਾਹ ਤੋਂ ਲਗਭਗ 148 ਕਿਲੋਮੀਟਰ ਦੂਰ ਦਰਜ ਕੀਤੀ ਗਈ। ਇਸ ਤੋਂ ਬਾਅਦ ਬਚਾਅ ਦਸਤਿਆਂ ਨੂੰ ਸੰਭਾਵਿਤ ਇਲਾਕੇ ਵੱਲ ਰਵਾਨਾ ਕੀਤਾ ਗਿਆ।
240 ਯਾਤਰੀਆਂ ਤੇ ਚਾਲਕ ਦਲ ਦੀ ਜਾਣਕਾਰੀ, ਕਾਰਨ ਦੀ ਜਾਂਚ ਜਾਰੀ
ਜਾਣਕਾਰੀ ਮੁਤਾਬਕ ਜਹਾਜ਼ ਵਿੱਚ ਕੁੱਲ 240 ਯਾਤਰੀ ਅਤੇ ਚਾਲਕ ਦਲ ਦੇ ਮੈਂਬਰ ਸਵਾਰ ਸਨ। ਹਾਲਾਂਕਿ ਅਜੇ ਤੱਕ ਜਹਾਜ਼ ਦੇ ਡੁੱਬਣ ਜਾਂ ਕਿਸੇ ਜਾਨੀ ਨੁਕਸਾਨ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ। ਅਧਿਕਾਰੀ ਖਰਾਬ ਮੌਸਮ ਅਤੇ ਕਿਸੇ ਤਕਨੀਕੀ ਖ਼ਰਾਬੀ ਸਮੇਤ ਹੋਰ ਸੰਭਾਵਿਤ ਕਾਰਨਾਂ ਦੀ ਜਾਂਚ ਕਰ ਰਹੇ ਹਨ। ਬਸਾਰਨਾਸ ਦੀਆਂ ਟੀਮਾਂ ਵੱਲੋਂ ਜਹਾਜ਼ ਦੀ ਭਾਲ ਲਈ ਸਮੁੰਦਰੀ ਇਲਾਕੇ ਵਿੱਚ ਤਲਾਸ਼ੀ ਜਾਰੀ ਹੈ।
