ਨਵੀਂ ਦਿੱਲੀ :- ਮਹਿਲਾ ਏਸ਼ੀਆ ਕੱਪ 2026 ਵਿੱਚ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਅੱਜ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰੇਗੀ। ਗਰੁੱਪ ‘ਏ’ ਦੇ ਪਹਿਲੇ ਮੁਕਾਬਲੇ ਵਿੱਚ ਭਾਰਤ ਦਾ ਸਾਹਮਣਾ ਥਾਈਲੈਂਡ ਨਾਲ ਹੋਵੇਗਾ। ਦੁਬਈ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਹੋਣ ਵਾਲਾ ਇਹ ਮੁਕਾਬਲਾ ਰਾਤ 8 ਵਜੇ ਸ਼ੁਰੂ ਹੋਵੇਗਾ। ਭਾਰਤੀ ਟੀਮ ਦੀ ਕਮਾਨ ਹਰਮਨਪ੍ਰੀਤ ਕੌਰ ਦੇ ਹੱਥਾਂ ਵਿੱਚ ਹੋਵੇਗੀ।
ਤਜਰਬੇਕਾਰ ਖਿਡਾਰਨਾਂ ਨਾਲ ਮਜ਼ਬੂਤ ਭਾਰਤੀ ਟੀਮ
ਭਾਰਤੀ ਟੀਮ ਵਿੱਚ ਸਮ੍ਰਿਤੀ ਮੰਧਾਨਾ, ਸ਼ੈਫਾਲੀ ਵਰਮਾ ਅਤੇ ਦੀਪਤੀ ਸ਼ਰਮਾ ਵਰਗੀਆਂ ਤਜਰਬੇਕਾਰ ਖਿਡਾਰਨਾਂ ਸ਼ਾਮਲ ਹਨ। ਹਾਲਾਂਕਿ ਟੀਮ ਨੂੰ ਜੇਮੀਮਾ ਰੌਡਰਿਗਜ਼ ਦੀ ਗੈਰਹਾਜ਼ਰੀ ਦਾ ਸਾਹਮਣਾ ਕਰਨਾ ਪਵੇਗਾ। ਸੱਟ ਕਾਰਨ ਜੇਮੀਮਾ ਇਸ ਟੂਰਨਾਮੈਂਟ ਵਿੱਚ ਨਹੀਂ ਖੇਡ ਸਕੇਗੀ। ਉਨ੍ਹਾਂ ਦੀ ਥਾਂ ਪ੍ਰਤੀਕਾ ਰਾਵਲ ਨੂੰ ਟੀਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।
ਥਾਈਲੈਂਡ ਖ਼ਿਲਾਫ਼ ਭਾਰਤ ਦਾ ਸ਼ਾਨਦਾਰ ਰਿਕਾਰਡ
ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ ਭਾਰਤ ਦਾ ਥਾਈਲੈਂਡ ਖ਼ਿਲਾਫ਼ ਰਿਕਾਰਡ ਕਾਫ਼ੀ ਮਜ਼ਬੂਤ ਰਿਹਾ ਹੈ। ਦੋਵਾਂ ਟੀਮਾਂ ਹੁਣ ਤੱਕ ਤਿੰਨ ਵਾਰ ਆਹਮੋ-ਸਾਹਮਣੇ ਆਈਆਂ ਹਨ ਅਤੇ ਤਿੰਨੋਂ ਮੁਕਾਬਲਿਆਂ ਵਿੱਚ ਭਾਰਤ ਨੇ ਜਿੱਤ ਦਰਜ ਕੀਤੀ ਹੈ। ਭਾਰਤੀ ਟੀਮ ਨੇ 2018 ਅਤੇ 2022 ਵਿੱਚ ਥਾਈਲੈਂਡ ਨੂੰ ਹਰਾਇਆ ਸੀ। ਇਨ੍ਹਾਂ ਤਿੰਨ ਮੁਕਾਬਲਿਆਂ ਵਿੱਚ ਭਾਰਤ ਦੀ ਜਿੱਤ ਕ੍ਰਮਵਾਰ 66, 9 ਅਤੇ 74 ਦੌੜਾਂ ਦੇ ਫ਼ਰਕ ਨਾਲ ਰਹੀ।
ਭਾਰਤ ਦੀ ਸੰਭਾਵਿਤ ਪਲੇਇੰਗ ਇਲੈਵਨ
ਭਾਰਤ ਵੱਲੋਂ ਸਮ੍ਰਿਤੀ ਮੰਧਾਨਾ, ਸ਼ੈਫਾਲੀ ਵਰਮਾ, ਭਾਰਤੀ ਫੁਲਮਾਲੀ, ਹਰਮਨਪ੍ਰੀਤ ਕੌਰ, ਰਿਚਾ ਘੋਸ਼, ਦੀਪਤੀ ਸ਼ਰਮਾ, ਅਰੁੰਧਤੀ ਰੈਡੀ, ਪ੍ਰੇਮਾ ਰਾਵਤ, ਰਾਧਾ ਯਾਦਵ, ਸ਼੍ਰੀ ਚਰਨੀ ਅਤੇ ਰੇਣੁਕਾ ਠਾਕੁਰ ਦੇ ਮੈਦਾਨ ਵਿੱਚ ਉਤਰਨ ਦੀ ਸੰਭਾਵਨਾ ਹੈ।
ਥਾਈਲੈਂਡ ਦੀ ਸੰਭਾਵਿਤ ਪਲੇਇੰਗ ਇਲੈਵਨ
ਥਾਈਲੈਂਡ ਦੀ ਟੀਮ ਵਿੱਚ ਨੰਨਾਪਤ ਕੋਂਚਾਰੋਏਨਕਾਈ, ਨੱਤਕਾਨ ਚਾਂਥਮ, ਨਰੁਮੋਲ ਚਾਈਵਈ, ਫੰਨੀਟਾ ਮਾਇਆ, ਚਨਿਦਾ ਸੁਥਿਰੁਆਂਗ, ਸੁਲੇਪੋਰਨ ਲਾਓਮੀ, ਓਨਿਚਾ ਕਾਮਚੋਮਫੂ, ਥੀਪਾਚਾ ਪੁਥਾਵੋਂਗ, ਸੁਨੀਦਾ ਚਤੁਰੋਂਗ੍ਰੱਤਨਾ, ਅਪੀਸਾਰਾ ਸੁਵਾਨਚੋਨਰਾਥੀ ਅਤੇ ਚਯਾਨਿਸਾ ਪਾਹਾ ਦੇ ਖੇਡਣ ਦੀ ਸੰਭਾਵਨਾ ਹੈ।
ਜਿੱਤ ਨਾਲ ਮੁਹਿੰਮ ਸ਼ੁਰੂ ਕਰਨ ’ਤੇ ਭਾਰਤ ਦੀ ਨਜ਼ਰ
ਭਾਰਤੀ ਟੀਮ ਆਪਣੇ ਏਸ਼ੀਆ ਕੱਪ ਸਫ਼ਰ ਦੀ ਸ਼ੁਰੂਆਤ ਜਿੱਤ ਨਾਲ ਕਰਨ ਦੇ ਇਰਾਦੇ ਨਾਲ ਮੈਦਾਨ ਵਿੱਚ ਉਤਰੇਗੀ। ਦੂਜੇ ਪਾਸੇ ਥਾਈਲੈਂਡ ਦੀ ਟੀਮ ਵੀ ਭਾਰਤ ਵਿਰੁੱਧ ਆਪਣੇ ਪਿਛਲੇ ਰਿਕਾਰਡ ਨੂੰ ਬਦਲਣ ਲਈ ਮੈਦਾਨ ਵਿੱਚ ਪੂਰੀ ਤਿਆਰੀ ਨਾਲ ਉਤਰੇਗੀ। ਦੁਬਈ ਵਿੱਚ ਹੋਣ ਵਾਲੇ ਇਸ ਮੁਕਾਬਲੇ ’ਤੇ ਕ੍ਰਿਕਟ ਪ੍ਰੇਮੀਆਂ ਦੀਆਂ ਨਜ਼ਰਾਂ ਟਿਕੀਆਂ ਰਹਿਣਗੀਆਂ।
