ਸੰਗਰੂਰ :- ਸੰਗਰੂਰ ਦੇ ਸਿਵਲ ਹਸਪਤਾਲ ਵਿੱਚ ਮਰੀਜ਼ਾਂ ਨੂੰ ਮਿਲ ਰਹੀਆਂ ਸਹੂਲਤਾਂ ਅਤੇ ਹਸਪਤਾਲ ਦੇ ਪ੍ਰਬੰਧਾਂ ਨੂੰ ਲੈ ਕੇ ਕਈ ਸਵਾਲ ਖੜ੍ਹੇ ਹੋ ਰਹੇ ਹਨ। ਹਸਪਤਾਲ ਦੇ ਦੌਰੇ ਦੌਰਾਨ ਓ.ਪੀ.ਡੀ. ਦੇ ਬਾਹਰ ਵੱਡੀ ਗਿਣਤੀ ਵਿੱਚ ਮਰੀਜ਼ ਗਰਮੀ ਵਿੱਚ ਆਪਣੀ ਵਾਰੀ ਦੀ ਉਡੀਕ ਕਰਦੇ ਨਜ਼ਰ ਆਏ। ਦੂਜੇ ਪਾਸੇ ਵਾਰਡਾਂ ਵਿੱਚ ਪੱਖਿਆਂ ਦੀ ਸਮੱਸਿਆ ਕਾਰਨ ਕੁਝ ਮਰੀਜ਼ਾਂ ਵੱਲੋਂ ਘਰਾਂ ਤੋਂ ਪੱਖੇ ਲਿਆ ਕੇ ਵਰਤਣ ਦੀ ਗੱਲ ਸਾਹਮਣੇ ਆਈ। ਇਸ ਤੋਂ ਇਲਾਵਾ ਫਾਇਰ ਸੁਰੱਖਿਆ ਪ੍ਰਬੰਧ, ਆਕਸੀਜਨ ਯੂਨਿਟ, ਸਫ਼ਾਈ ਅਤੇ ਆਵਾਰਾ ਕੁੱਤਿਆਂ ਦੀ ਮੌਜੂਦਗੀ ਵੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ।
ਸਵੇਰੇ ਪਰਚੀ ਲੈ ਕੇ ਦੁਪਹਿਰ ਤੱਕ ਉਡੀਕਦੇ ਰਹੇ ਮਰੀਜ਼
ਓ.ਪੀ.ਡੀ. ਦੇ ਬਾਹਰ ਕਾਫ਼ੀ ਗਿਣਤੀ ਵਿੱਚ ਮਰੀਜ਼ ਡਾਕਟਰ ਨੂੰ ਦਿਖਾਉਣ ਲਈ ਆਪਣੀ ਵਾਰੀ ਦੀ ਉਡੀਕ ਕਰਦੇ ਮਿਲੇ। ਕੁਝ ਮਰੀਜ਼ਾਂ ਨੇ ਦੱਸਿਆ ਕਿ ਉਹ ਸਵੇਰੇ ਕਰੀਬ 9 ਵਜੇ ਪਰਚੀ ਲੈ ਕੇ ਬੈਠੇ ਹੋਏ ਸਨ, ਪਰ ਦੁਪਹਿਰ 12 ਵਜੇ ਤੱਕ ਵੀ ਉਨ੍ਹਾਂ ਦੀ ਵਾਰੀ ਨਹੀਂ ਆਈ ਸੀ। ਮਰੀਜ਼ਾਂ ਦਾ ਕਹਿਣਾ ਸੀ ਕਿ ਗਰਮੀ ਦੇ ਬਾਵਜੂਦ ਓ.ਪੀ.ਡੀ. ਦੇ ਬਾਹਰ ਉਡੀਕ ਕਰਨ ਵਾਲਿਆਂ ਲਈ ਲੋੜੀਂਦੇ ਪ੍ਰਬੰਧ ਨਜ਼ਰ ਨਹੀਂ ਆ ਰਹੇ ਸਨ।
ਵਾਰਡਾਂ ‘ਚ ਪੱਖਿਆਂ ਦੀ ਸਮੱਸਿਆ, ਮਰੀਜ਼ ਘਰੋਂ ਲਿਆ ਰਹੇ ਪੱਖੇ
ਹਸਪਤਾਲ ਦੀ ਦੂਜੀ ਮੰਜ਼ਿਲ ’ਤੇ ਸਥਿਤ ਵਾਰਡਾਂ ਵਿੱਚ ਵੀ ਗਰਮੀ ਤੋਂ ਰਾਹਤ ਦੇ ਪ੍ਰਬੰਧਾਂ ਨੂੰ ਲੈ ਕੇ ਸਵਾਲ ਉੱਠੇ। ਮਰੀਜ਼ਾਂ ਮੁਤਾਬਕ ਕੁਝ ਪੱਖੇ ਠੀਕ ਤਰ੍ਹਾਂ ਕੰਮ ਨਹੀਂ ਕਰ ਰਹੇ, ਜਿਸ ਕਾਰਨ ਉਨ੍ਹਾਂ ਨੂੰ ਆਪਣੇ ਘਰਾਂ ਤੋਂ ਪੱਖੇ ਲਿਆਉਣੇ ਪੈ ਰਹੇ ਹਨ। ਮਰੀਜ਼ਾਂ ਨੇ ਦੱਸਿਆ ਕਿ ਹਸਪਤਾਲ ਵਿੱਚ ਪੱਖਾ ਲੈਣ ਲਈ ਕਰੀਬ 1500 ਰੁਪਏ ਖਰਚਣੇ ਪੈਂਦੇ ਹਨ, ਜੋ ਹਰ ਮਰੀਜ਼ ਲਈ ਸੰਭਵ ਨਹੀਂ ਹੈ।
ਓਪਰੇਸ਼ਨ ਥੀਏਟਰ ਦੇ ਬੈੱਡ ਦੀ ਹਾਲਤ ਵੀ ਬਣੀ ਚਰਚਾ ਦਾ ਵਿਸ਼ਾ
ਹਸਪਤਾਲ ਦੇ ਓਪਰੇਸ਼ਨ ਥੀਏਟਰ ਵਿੱਚ ਵਰਤੇ ਜਾਣ ਵਾਲੇ ਇੱਕ ਬੈੱਡ ਦੀ ਹਾਲਤ ਵੀ ਠੀਕ ਨਾ ਹੋਣ ਦੀ ਗੱਲ ਸਾਹਮਣੇ ਆਈ। ਹਸਪਤਾਲ ਦੇ ਕਰਮਚਾਰੀਆਂ ਅਨੁਸਾਰ ਇਸ ਸਬੰਧੀ ਪਹਿਲਾਂ ਹੀ ਸ਼ਿਕਾਇਤ ਕੀਤੀ ਜਾ ਚੁੱਕੀ ਹੈ ਅਤੇ ਖ਼ਰਾਬ ਬੈੱਡ ਨੂੰ ਵਰਤੋਂ ਤੋਂ ਬਾਹਰ ਕਰ ਦਿੱਤਾ ਗਿਆ ਹੈ।
ਕੋਰੋਨਾ ਦੌਰਾਨ ਮਿਲੀ ਆਕਸੀਜਨ ਯੂਨਿਟ ਦੇ ਆਲੇ-ਦੁਆਲੇ ਗੰਦਗੀ
ਕੋਰੋਨਾ ਮਹਾਂਮਾਰੀ ਦੌਰਾਨ ਹਸਪਤਾਲ ਨੂੰ ਮਿਲੀ ਆਕਸੀਜਨ ਯੂਨਿਟ ਵੀ ਇਸ ਸਮੇਂ ਚਾਲੂ ਹਾਲਤ ਵਿੱਚ ਨਜ਼ਰ ਨਹੀਂ ਆਈ। ਯੂਨਿਟ ਦੇ ਆਲੇ-ਦੁਆਲੇ ਘਾਹ-ਫੂਸ ਅਤੇ ਗੰਦਗੀ ਜਮ੍ਹਾਂ ਹੋਣ ਦੀ ਸਥਿਤੀ ਵੀ ਸਾਹਮਣੇ ਆਈ। ਇਸ ਦੇ ਨਾਲ ਹੀ ਹਸਪਤਾਲ ਦੇ ਆਲੇ-ਦੁਆਲੇ ਕੁਝ ਥਾਵਾਂ ’ਤੇ ਪਾਣੀ ਖੜ੍ਹਾ ਹੋਣ ਦੀ ਗੱਲ ਵੀ ਸਾਹਮਣੇ ਆਈ।
ਦੋ ਸਾਲਾਂ ਤੋਂ ਕੰਮ ਨਹੀਂ ਕਰ ਰਿਹਾ ਫਾਇਰ ਸਿਸਟਮ : ਐੱਸ.ਐੱਮ.ਓ.
ਹਸਪਤਾਲ ਦੀ ਅੱਗ ਤੋਂ ਸੁਰੱਖਿਆ ਨਾਲ ਜੁੜੇ ਪ੍ਰਬੰਧਾਂ ਨੂੰ ਲੈ ਕੇ ਵੀ ਗੰਭੀਰ ਸਵਾਲ ਖੜ੍ਹੇ ਹੋਏ ਹਨ। ਸਿਵਲ ਹਸਪਤਾਲ ਦੇ ਐੱਸ.ਐੱਮ.ਓ. ਵਿਨੋਦ ਕੁਮਾਰ ਨੇ ਖ਼ੁਦ ਮੰਨਿਆ ਕਿ ਹਸਪਤਾਲ ਦਾ ਫਾਇਰ ਸਿਸਟਮ ਪਿਛਲੇ ਕਰੀਬ ਦੋ ਸਾਲਾਂ ਤੋਂ ਕੰਮ ਨਹੀਂ ਕਰ ਰਿਹਾ। ਹਸਪਤਾਲ ਵਰਗੀ ਸੰਵੇਦਨਸ਼ੀਲ ਥਾਂ ’ਤੇ ਅੱਗ ਤੋਂ ਬਚਾਅ ਦੇ ਪ੍ਰਬੰਧਾਂ ਦੀ ਖ਼ਰਾਬ ਹਾਲਤ ਨੂੰ ਲੈ ਕੇ ਚਿੰਤਾ ਜਤਾਈ ਜਾ ਰਹੀ ਹੈ।
ਇਤਿਹਾਸਕ ਇਮਾਰਤ ਦੇ ਰੰਗ-ਰੋਗਨ ‘ਤੇ ਵੀ ਉੱਠੇ ਸਵਾਲ
ਸਿਵਲ ਹਸਪਤਾਲ ਦੀ ਪੁਰਾਣੀ ਇਤਿਹਾਸਕ ਇਮਾਰਤ ’ਤੇ ਕਰਵਾਏ ਗਏ ਰੰਗ-ਰੋਗਨ ਨੂੰ ਲੈ ਕੇ ਵੀ ਸਵਾਲ ਉੱਠੇ ਹਨ। ਇਮਾਰਤ ਦੇ ਪੁਰਾਤਤਵ ਵਿਭਾਗ ਦੇ ਅਧੀਨ ਹੋਣ ਦੀ ਗੱਲ ਸਾਹਮਣੇ ਆ ਰਹੀ ਹੈ। ਇਸ ਸਬੰਧੀ ਐੱਸ.ਐੱਮ.ਓ. ਵਿਨੋਦ ਕੁਮਾਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਬਾਰੇ ਜਾਣਕਾਰੀ ਨਹੀਂ ਹੈ ਅਤੇ ਉੱਪਰਲੇ ਵਿਭਾਗ ਵੱਲੋਂ ਮਿਲੇ ਹੁਕਮਾਂ ਅਨੁਸਾਰ ਕੰਮ ਕੀਤਾ ਗਿਆ ਹੈ।
ਹਸਪਤਾਲ ਅੰਦਰ ਘੁੰਮਦੇ ਮਿਲੇ ਆਵਾਰਾ ਕੁੱਤੇ
ਹਸਪਤਾਲ ਦੇ ਅੰਦਰ ਅਤੇ ਆਲੇ-ਦੁਆਲੇ ਆਵਾਰਾ ਕੁੱਤਿਆਂ ਦੀ ਮੌਜੂਦਗੀ ਵੀ ਦੇਖਣ ਨੂੰ ਮਿਲੀ। ਮਰੀਜ਼ਾਂ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੀ ਆਵਾਜਾਈ ਵਾਲੀ ਥਾਂ ’ਤੇ ਕੁੱਤਿਆਂ ਦੇ ਘੁੰਮਣ ਕਾਰਨ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਪੈਦਾ ਹੋ ਰਹੀ ਹੈ। ਸੰਗਰੂਰ ਵਿੱਚ ਪਹਿਲਾਂ ਵੀ ਆਵਾਰਾ ਕੁੱਤਿਆਂ ਦੇ ਕੱਟਣ ਦੇ ਮਾਮਲੇ ਸਾਹਮਣੇ ਆਉਂਦੇ ਰਹੇ ਹਨ, ਜਿਸ ਕਾਰਨ ਹਸਪਤਾਲ ਵਿੱਚ ਇਸ ਸਮੱਸਿਆ ਦੇ ਹੱਲ ਦੀ ਲੋੜ ਹੋਰ ਵਧ ਜਾਂਦੀ ਹੈ।
ਕੰਟੀਨ ਨੇੜੇ ਐਨਰਜੀ ਡਰਿੰਕ ਦੀਆਂ ਖਾਲੀ ਬੋਤਲਾਂ ਮਿਲਣ ਦਾ ਮਾਮਲਾ
ਦੌਰੇ ਦੌਰਾਨ ਹਸਪਤਾਲ ਦੀ ਕੰਟੀਨ ਦੇ ਨੇੜੇ ਕੁਝ ਲੋਕਾਂ ਨੂੰ ‘ਸਟਿੰਗ’ ਨਾਮ ਦੀ ਐਨਰਜੀ ਡਰਿੰਕ ਪੀਂਦੇ ਦੇਖਿਆ ਗਿਆ। ਮੌਕੇ ’ਤੇ ਇਸ ਦੀਆਂ ਖਾਲੀ ਬੋਤਲਾਂ ਵੀ ਪਈਆਂ ਮਿਲੀਆਂ। ਇਸ ਤੋਂ ਬਾਅਦ ਹਸਪਤਾਲ ਅੰਦਰ ਅਜਿਹੇ ਪੀਣ ਵਾਲੇ ਪਦਾਰਥ ਦੀ ਉਪਲਬਧਤਾ ਨੂੰ ਲੈ ਕੇ ਸਵਾਲ ਉੱਠੇ ਹਨ, ਖ਼ਾਸ ਕਰਕੇ ਜੇਕਰ ਇਸ ਦੀ ਵਿਕਰੀ ਸਬੰਧੀ ਕੋਈ ਸਰਕਾਰੀ ਪਾਬੰਦੀ ਲਾਗੂ ਹੈ।
ਅਲਟਰਾਸਾਊਂਡ ਲਈ ਮਰੀਜ਼ਾਂ ਨੂੰ ਕਰਨਾ ਪੈ ਰਿਹਾ ਬਾਹਰ ਦਾ ਰੁਖ
ਹਸਪਤਾਲ ਵਿੱਚ ਅਲਟਰਾਸਾਊਂਡ ਦੀ ਸਹੂਲਤ ਵੀ ਮਰੀਜ਼ਾਂ ਦੀ ਗਿਣਤੀ ਦੇ ਮੁਕਾਬਲੇ ਘੱਟ ਪੈ ਰਹੀ ਹੈ। ਐੱਸ.ਐੱਮ.ਓ. ਅਨੁਸਾਰ ਹਸਪਤਾਲ ਵਿੱਚ ਦੋ ਅਲਟਰਾਸਾਊਂਡ ਮਸ਼ੀਨਾਂ ਮੌਜੂਦ ਹਨ। ਓ.ਪੀ.ਡੀ. ਵਿੱਚ ਰੋਜ਼ਾਨਾ ਕਰੀਬ 1200 ਮਰੀਜ਼ ਆਉਂਦੇ ਹਨ, ਜਿਨ੍ਹਾਂ ਵਿੱਚੋਂ ਲਗਭਗ 200 ਨੂੰ ਅਲਟਰਾਸਾਊਂਡ ਦੀ ਲੋੜ ਪੈਂਦੀ ਹੈ। ਇਸ ਦੇ ਮੁਕਾਬਲੇ ਇੱਕ ਮਸ਼ੀਨ ਦੀ ਰੋਜ਼ਾਨਾ ਸਮਰੱਥਾ ਕਰੀਬ 30 ਮਰੀਜ਼ਾਂ ਦੀ ਦੱਸੀ ਗਈ ਹੈ। ਮਰੀਜ਼ਾਂ ਦੀ ਗਿਣਤੀ ਅਤੇ ਜਾਂਚ ਦੀ ਸਮਰੱਥਾ ਵਿੱਚ ਇਸ ਫ਼ਰਕ ਕਾਰਨ ਕਈ ਲੋਕਾਂ ਨੂੰ ਪ੍ਰਾਈਵੇਟ ਜਾਂਚ ਕੇਂਦਰਾਂ ਵੱਲ ਜਾਣਾ ਪੈਂਦਾ ਹੈ।
ਸਰਕਾਰੀ ਸਿਹਤ ਸੇਵਾਵਾਂ ਦੇ ਦਾਅਵਿਆਂ ਵਿਚਕਾਰ ਪ੍ਰਬੰਧਾਂ ‘ਤੇ ਸਵਾਲ
ਸਿਵਲ ਹਸਪਤਾਲ ਵਿੱਚ ਸਾਹਮਣੇ ਆਈਆਂ ਇਨ੍ਹਾਂ ਸਥਿਤੀਆਂ ਨੇ ਸਰਕਾਰੀ ਸਿਹਤ ਸੰਸਥਾਵਾਂ ਵਿੱਚ ਮਰੀਜ਼ਾਂ ਲਈ ਉਪਲਬਧ ਸਹੂਲਤਾਂ ਅਤੇ ਪ੍ਰਬੰਧਾਂ ਦੀ ਕਾਰਗੁਜ਼ਾਰੀ ’ਤੇ ਸਵਾਲ ਖੜ੍ਹੇ ਕੀਤੇ ਹਨ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਫਾਇਰ ਸਿਸਟਮ, ਗਰਮੀ ਤੋਂ ਰਾਹਤ, ਸਫ਼ਾਈ, ਆਵਾਰਾ ਕੁੱਤਿਆਂ ਅਤੇ ਅਲਟਰਾਸਾਊਂਡ ਵਰਗੀਆਂ ਸਮੱਸਿਆਵਾਂ ਨੂੰ ਦੂਰ ਕਰਨ ਲਈ ਸਿਹਤ ਵਿਭਾਗ ਵੱਲੋਂ ਕਦੋਂ ਤੱਕ ਠੋਸ ਕਦਮ ਚੁੱਕੇ ਜਾਂਦੇ ਹਨ।
