ਚੰਡੀਗੜ੍ਹ :- ਸਾਉਣ ਮਹੀਨੇ ਦਾ ਪਹਿਲਾ ਸੋਮਵਾਰ 3 ਅਗਸਤ 2026 ਨੂੰ ਸ਼ਰਧਾ ਅਤੇ ਉਤਸ਼ਾਹ ਨਾਲ ਮਨਾਇਆ ਜਾ ਰਿਹਾ ਹੈ। ਹਿੰਦੂ ਧਰਮ ਵਿੱਚ ਸਾਉਣ ਦੇ ਸੋਮਵਾਰਾਂ ਨੂੰ ਭਗਵਾਨ ਸ਼ਿਵ ਦੀ ਉਪਾਸਨਾ ਲਈ ਬਹੁਤ ਪਵਿੱਤਰ ਮੰਨਿਆ ਜਾਂਦਾ ਹੈ। ਧਾਰਮਿਕ ਮਾਨਤਾਵਾਂ ਅਨੁਸਾਰ ਇਸ ਦਿਨ ਵਰਤ ਰੱਖ ਕੇ ਵਿਧੀ-ਵਿਧਾਨ ਨਾਲ ਸ਼ਿਵ ਪੂਜਾ ਕਰਨ ਅਤੇ ਸ਼ਿਵਲਿੰਗ ਦਾ ਅਭਿਸ਼ੇਕ ਕਰਨ ਨਾਲ ਭਗਤਾਂ ਨੂੰ ਭਗਵਾਨ ਸ਼ਿਵ ਦੀ ਕਿਰਪਾ ਪ੍ਰਾਪਤ ਹੁੰਦੀ ਹੈ। ਮੰਨਿਆ ਜਾਂਦਾ ਹੈ ਕਿ ਸੱਚੀ ਸ਼ਰਧਾ ਨਾਲ ਕੀਤੀ ਪੂਜਾ ਨਾਲ ਮਨੋਕਾਮਨਾਵਾਂ ਪੂਰੀਆਂ ਹੋਣ ਅਤੇ ਪਰਿਵਾਰ ਵਿੱਚ ਸੁਖ-ਸ਼ਾਂਤੀ ਬਣੀ ਰਹਿਣ ਦੀ ਕਾਮਨਾ ਕੀਤੀ ਜਾਂਦੀ ਹੈ।
ਪਹਿਲੇ ਸੋਮਵਾਰ ਦੇ ਸ਼ੁਭ ਮਹੂਰਤ
ਧਾਰਮਿਕ ਪੰਚਾਂਗ ਅਨੁਸਾਰ ਸਾਉਣ ਦੇ ਪਹਿਲੇ ਸੋਮਵਾਰ ਨੂੰ ਪੂਜਾ ਲਈ ਕਈ ਸ਼ੁਭ ਸਮੇਂ ਹਨ।
- ਬ੍ਰਹਮ ਮਹੂਰਤ: ਸਵੇਰੇ 4:19 ਵਜੇ ਤੋਂ 5:01 ਵਜੇ ਤੱਕ
- ਅਭਿਜੀਤ ਮਹੂਰਤ: ਦੁਪਹਿਰ 12:00 ਵਜੇ ਤੋਂ 12:54 ਵਜੇ ਤੱਕ
- ਪ੍ਰਦੋਸ਼ ਕਾਲ: ਸ਼ਾਮ 6:26 ਵਜੇ ਤੋਂ 7:56 ਵਜੇ ਤੱਕ
- ਨਿਸ਼ੀਤਾ ਕਾਲ: ਰਾਤ 11:33 ਵਜੇ ਤੋਂ 12:21 ਵਜੇ ਤੱਕ
ਇਨ੍ਹਾਂ ਸਮਿਆਂ ਦੌਰਾਨ ਭਗਵਾਨ ਸ਼ਿਵ ਦੀ ਪੂਜਾ ਅਤੇ ਅਭਿਸ਼ੇਕ ਕਰਨਾ ਵਿਸ਼ੇਸ਼ ਸ਼ੁਭ ਮੰਨਿਆ ਜਾਂਦਾ ਹੈ।
ਸ਼ਿਵਲਿੰਗ ‘ਤੇ ਕੀ ਅਰਪਿਤ ਕਰਨਾ ਸ਼ੁਭ ਮੰਨਿਆ ਜਾਂਦਾ ਹੈ?
ਸਾਉਣ ਦੇ ਸੋਮਵਾਰ ਮੌਕੇ ਸ਼ਿਵਲਿੰਗ ‘ਤੇ ਸਭ ਤੋਂ ਪਹਿਲਾਂ ਸ਼ੁੱਧ ਜਲ ਅਤੇ ਗੰਗਾਜਲ ਅਰਪਿਤ ਕੀਤਾ ਜਾਂਦਾ ਹੈ। ਇਸ ਤੋਂ ਬਾਅਦ ਬੇਲ ਪੱਤਰ, ਸ਼ਮੀ ਪੱਤੇ, ਭੰਗ, ਧਤੂਰਾ, ਦੁੱਧ, ਸ਼ਹਿਦ ਅਤੇ ਹੋਰ ਪੂਜਾ ਸਮੱਗਰੀ ਚੜ੍ਹਾਈ ਜਾਂਦੀ ਹੈ। ਧਾਰਮਿਕ ਮਾਨਤਾਵਾਂ ਅਨੁਸਾਰ ਅਖੰਡ ਬੇਲ ਪੱਤਰ ਅਰਪਿਤ ਕਰਨਾ ਵਿਸ਼ੇਸ਼ ਫਲਦਾਇਕ ਮੰਨਿਆ ਜਾਂਦਾ ਹੈ।
ਇਸ ਤਰ੍ਹਾਂ ਕਰੋ ਸ਼ਿਵ ਪੂਜਾ
ਪੂਜਾ ਸ਼ੁਰੂ ਕਰਨ ਤੋਂ ਪਹਿਲਾਂ ਪੂਜਾ ਸਥਾਨ ਅਤੇ ਸ਼ਿਵਲਿੰਗ ਦੀ ਸਫ਼ਾਈ ਕਰੋ। ਇਸ ਤੋਂ ਬਾਅਦ ਭਗਵਾਨ ਸ਼ਿਵ ਦਾ ਧਿਆਨ ਕਰਦੇ ਹੋਏ ਵਰਤ ਦਾ ਸੰਕਲਪ ਲਓ। ਸ਼ਿਵਲਿੰਗ ‘ਤੇ ਪਹਿਲਾਂ ਜਲ ਅਤੇ ਗੰਗਾਜਲ ਚੜ੍ਹਾਓ, ਫਿਰ ਪੰਚਾਮ੍ਰਿਤ ਨਾਲ ਅਭਿਸ਼ੇਕ ਕਰੋ। ਅਭਿਸ਼ੇਕ ਤੋਂ ਬਾਅਦ ਦੁਬਾਰਾ ਸ਼ੁੱਧ ਜਲ ਨਾਲ ਇਸ਼ਨਾਨ ਕਰਵਾ ਕੇ ਬੇਲ ਪੱਤਰ, ਭੰਗ, ਧਤੂਰਾ, ਸ਼ਮੀ ਪੱਤੇ, ਫਲ, ਅਕਸ਼ਤ, ਚੰਦਨ ਅਤੇ ਤਿਲ ਅਰਪਿਤ ਕਰੋ।
‘ਓਮ ਨਮਹ ਸ਼ਿਵਾਏ’ ਦਾ ਜਾਪ ਕਰਨ ਦੀ ਮਾਨਤਾ
ਪੂਜਾ ਦੌਰਾਨ ‘ਓਮ ਨਮਹ ਸ਼ਿਵਾਏ’ ਮੰਤਰ ਦਾ ਘੱਟੋ-ਘੱਟ 108 ਵਾਰ ਜਾਪ ਕਰਨਾ ਸ਼ੁਭ ਮੰਨਿਆ ਜਾਂਦਾ ਹੈ। ਇਸ ਉਪਰੰਤ ਮਾਤਾ ਪਾਰਵਤੀ ਅਤੇ ਭਗਵਾਨ ਗਣੇਸ਼ ਦੀ ਵੀ ਪੂਜਾ ਕਰਕੇ ਘਿਓ ਦਾ ਦੀਵਾ ਜਗਾਇਆ ਜਾਂਦਾ ਹੈ ਅਤੇ ਸ਼ਿਵ ਪਰਿਵਾਰ ਦੀ ਆਰਤੀ ਨਾਲ ਪੂਜਾ ਸੰਪੂਰਨ ਕੀਤੀ ਜਾਂਦੀ ਹੈ।
ਨੋਟ: ਇਹ ਜਾਣਕਾਰੀ ਧਾਰਮਿਕ ਮਾਨਤਾਵਾਂ ਅਤੇ ਪ੍ਰਚਲਿਤ ਪਰੰਪਰਾਵਾਂ ਤੇ ਆਧਾਰਿਤ ਹੈ। ਵੱਖ-ਵੱਖ ਖੇਤਰਾਂ ਅਤੇ ਸੰਪਰਦਾਵਾਂ ਵਿੱਚ ਪੂਜਾ ਵਿਧੀ ਵਿੱਚ ਅੰਤਰ ਹੋ ਸਕਦਾ ਹੈ।
