ਨਵੀਂ ਦਿੱਲੀ :- ਫੀਫਾ ਵਰਲਡ ਕੱਪ 2026 ਤੋਂ ਪਹਿਲਾਂ ਈਰਾਨੀ ਫੁੱਟਬਾਲ ਟੀਮ ਨਾਲ ਜੁੜਿਆ ਇੱਕ ਵੱਡਾ ਫੈਸਲਾ ਸਾਹਮਣੇ ਆਇਆ ਹੈ। ਅਮਰੀਕਾ ਨਾਲ ਚੱਲ ਰਹੇ ਤਣਾਅਪੂਰਨ ਹਾਲਾਤਾਂ ਦੇ ਮੱਦੇਨਜ਼ਰ ਈਰਾਨ ਦੀ ਟੀਮ ਆਪਣੇ ਮੈਚਾਂ ਦੌਰਾਨ ਮੈਕਸੀਕੋ ਵਿੱਚ ਰਹੇਗੀ ਅਤੇ ਸਿਰਫ਼ ਮੈਚ ਖੇਡਣ ਲਈ ਹੀ ਅਮਰੀਕਾ ਜਾਵੇਗੀ। ਮੈਚ ਖਤਮ ਹੋਣ ਤੋਂ ਬਾਅਦ ਟੀਮ ਤੁਰੰਤ ਵਾਪਸ ਮੈਕਸੀਕੋ ਪਰਤ ਆਵੇਗੀ।
ਮੈਕਸੀਕੋ ਦੇ ਤਿਜੁਆਨਾ ਵਿੱਚ ਬਣਾਇਆ ਗਿਆ ਬੇਸ ਕੈਂਪ
ਈਰਾਨ ਫੁੱਟਬਾਲ ਫੈਡਰੇਸ਼ਨ ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ ਟੀਮ ਦਾ ਬੇਸ ਕੈਂਪ ਮੈਕਸੀਕੋ ਦੇ ਤਿਜੁਆਨਾ ਸ਼ਹਿਰ ਵਿੱਚ ਤਿਆਰ ਕੀਤਾ ਗਿਆ ਹੈ। ਇਹ ਸ਼ਹਿਰ ਅਮਰੀਕੀ ਰਾਜ ਕੈਲੀਫੋਰਨੀਆ ਦੀ ਸਰਹੱਦ ਦੇ ਨੇੜੇ ਸਥਿਤ ਹੈ, ਜਿਸ ਕਾਰਨ ਟੀਮ ਲਈ ਮੈਚ ਵਾਲੇ ਦਿਨ ਯਾਤਰਾ ਕਰਨਾ ਆਸਾਨ ਰਹੇਗਾ। ਫੀਫਾ ਨੇ ਵੀ ਇਸ ਪ੍ਰਬੰਧ ਦੀ ਪੁਸ਼ਟੀ ਕਰ ਦਿੱਤੀ ਹੈ।
ਮੈਕਸੀਕੋ ਸਰਕਾਰ ਨੇ ਦਿੱਤੀ ਮਨਜ਼ੂਰੀ
ਮੈਕਸੀਕੋ ਦੀ ਰਾਸ਼ਟਰਪਤੀ ਕਲਾਉਡੀਆ ਸ਼ੀਨਬੌਮ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਨੂੰ ਈਰਾਨੀ ਟੀਮ ਦੇ ਮੈਕਸੀਕੋ ਵਿੱਚ ਰਹਿਣ ‘ਤੇ ਕੋਈ ਇਤਰਾਜ਼ ਨਹੀਂ ਹੈ। ਉਨ੍ਹਾਂ ਦੱਸਿਆ ਕਿ ਫੀਫਾ ਵੱਲੋਂ ਇਸ ਮਾਮਲੇ ‘ਤੇ ਮੈਕਸੀਕੋ ਸਰਕਾਰ ਨਾਲ ਸੰਪਰਕ ਕੀਤਾ ਗਿਆ ਸੀ ਅਤੇ ਸਰਕਾਰ ਨੇ ਤੁਰੰਤ ਮਨਜ਼ੂਰੀ ਦੇ ਦਿੱਤੀ।
ਅਮਰੀਕਾ ਵਿੱਚ ਖੇਡੇ ਜਾਣਗੇ ਗਰੁੱਪ ਮੈਚ
ਈਰਾਨ ਆਪਣੇ ਤਿੰਨ ਗਰੁੱਪ ਮੈਚ ਅਮਰੀਕਾ ਵਿੱਚ ਖੇਡੇਗਾ। ਟੀਮ 15 ਜੂਨ ਨੂੰ ਇੰਗਲਵੁੱਡ ਦੇ ਸੋਫੀ ਸਟੇਡੀਅਮ ਵਿੱਚ ਨਿਊਜ਼ੀਲੈਂਡ ਨਾਲ ਪਹਿਲਾ ਮੁਕਾਬਲਾ ਕਰੇਗੀ। ਇਸ ਤੋਂ ਬਾਅਦ 21 ਜੂਨ ਨੂੰ ਬੈਲਜੀਅਮ ਖ਼ਿਲਾਫ਼ ਵੀ ਉਸੇ ਮੈਦਾਨ ‘ਤੇ ਟੱਕਰ ਹੋਵੇਗੀ। ਗਰੁੱਪ ਦੌਰ ਦਾ ਆਖਰੀ ਮੈਚ ਮਿਸਰ ਵਿਰੁੱਧ ਸੀਏਟਲ ਦੇ ਲੂਮੇਨ ਫੀਲਡ ਵਿੱਚ ਖੇਡਿਆ ਜਾਵੇਗਾ।
ਵਿਸ਼ਵ ਕੱਪ 11 ਜੂਨ ਤੋਂ ਹੋਵੇਗਾ ਸ਼ੁਰੂ
ਫੀਫਾ ਵਰਲਡ ਕੱਪ 2026 ਦੀ ਸ਼ੁਰੂਆਤ 11 ਜੂਨ ਤੋਂ ਹੋ ਰਹੀ ਹੈ, ਜਦਕਿ ਫਾਈਨਲ ਮੁਕਾਬਲਾ 19 ਜੁਲਾਈ ਨੂੰ ਖੇਡਿਆ ਜਾਵੇਗਾ। ਟੂਰਨਾਮੈਂਟ ਦੀ ਸਾਂਝੀ ਮੇਜ਼ਬਾਨੀ ਅਮਰੀਕਾ, ਮੈਕਸੀਕੋ ਅਤੇ ਕੈਨੇਡਾ ਕਰ ਰਹੇ ਹਨ। ਈਰਾਨ ਨੂੰ ਗਰੁੱਪ ਜੀ ਵਿੱਚ ਬੈਲਜੀਅਮ, ਮਿਸਰ ਅਤੇ ਨਿਊਜ਼ੀਲੈਂਡ ਨਾਲ ਰੱਖਿਆ ਗਿਆ ਹੈ।
ਦੋਵੇਂ ਦੇਸ਼ਾਂ ਵਿਚਕਾਰ ਤਣਾਅ ਦਾ ਅਸਰ ਖੇਡਾਂ ‘ਤੇ ਵੀ
ਜ਼ਿਕਰਯੋਗ ਹੈ ਕਿ ਅਮਰੀਕਾ ਅਤੇ ਈਰਾਨ ਵਿਚਕਾਰ ਲੰਬੇ ਸਮੇਂ ਤੋਂ ਤਣਾਅਪੂਰਨ ਸਬੰਧ ਬਣੇ ਹੋਏ ਹਨ। ਮੌਜੂਦਾ ਹਾਲਾਤਾਂ ਨੂੰ ਦੇਖਦਿਆਂ ਅਮਰੀਕਾ ਨੇ ਈਰਾਨੀ ਟੀਮ ਨੂੰ ਉੱਥੇ ਲੰਬੇ ਸਮੇਂ ਲਈ ਰਹਿਣ ਦੀ ਇਜਾਜ਼ਤ ਨਹੀਂ ਦਿੱਤੀ, ਜਿਸ ਕਾਰਨ ਇਹ ਨਵਾਂ ਪ੍ਰਬੰਧ ਕੀਤਾ ਗਿਆ ਹੈ।
