ਜਲੰਧਰ :- ਜਲੰਧਰ ਸਰਕਲ ਦੀਆਂ ਪੰਜਾਂ ਡਿਵੀਜ਼ਨਾਂ ਵੱਲੋਂ ਵਿਸ਼ੇਸ਼ ਮੁਹਿੰਮ ਚਲਾਕੇ 1242 ਬਿਜਲੀ ਕੁਨੈਕਸ਼ਨਾਂ ਦੀ ਚੈਕਿੰਗ ਕੀਤੀ ਗਈ। ਇਸ ਦੌਰਾਨ 33 ਖਪਤਕਾਰ ਬਿਜਲੀ ਚੋਰੀ ਅਤੇ ਗਲਤ ਵਰਤੋਂ ਕਰਦੇ ਫੜੇ ਗਏ, ਜਿਨ੍ਹਾਂ ‘ਤੇ ਕੁੱਲ 8.53 ਲੱਖ ਰੁਪਏ ਜੁਰਮਾਨਾ ਲਗਾਇਆ ਗਿਆ।
ਸਿੱਧੀ ਚੋਰੀ ਅਤੇ ਓਵਰਲੋਡ ਕੇਸ
13 ਸਿੱਧੀ ਚੋਰੀ ਦੇ ਮਾਮਲਿਆਂ ਵਿਚ 6.95 ਲੱਖ ਜੁਰਮਾਨਾ ਕੀਤਾ ਗਿਆ। ਹੋਰ 20 ਮਾਮਲੇ ਮਨਜ਼ੂਰਸ਼ੁਦਾ ਲੋਡ ਤੋਂ ਵੱਧ ਵਰਤੋਂ ਅਤੇ ਘਰੇਲੂ ਬਿਜਲੀ ਨੂੰ ਕਮਰਸ਼ੀਅਲ ਵਰਤਣ ਸਬੰਧੀ ਸਨ। ਅਧਿਕਾਰੀਆਂ ਮੁਤਾਬਕ, ਐਸੇ ਕੇਸਾਂ ਨਾਲ ਟਰਾਂਸਫਾਰਮਰ ਅਤੇ ਸਿਸਟਮ ਨੂੰ ਨੁਕਸਾਨ ਪਹੁੰਚਦਾ ਹੈ।
ਮਾਡਲ ਟਾਊਨ ‘ਚ ਸਭ ਤੋਂ ਵੱਧ ਕਾਰਵਾਈ
ਮਾਡਲ ਟਾਊਨ ਡਿਵੀਜ਼ਨ ਵੱਲੋਂ ਸਭ ਤੋਂ ਵੱਧ 3.57 ਲੱਖ ਜੁਰਮਾਨਾ ਲਗਾਇਆ ਗਿਆ। 343 ਕੁਨੈਕਸ਼ਨਾਂ ਦੀ ਜਾਂਚ ਦੌਰਾਨ 8 ਕੇਸ ਸਿੱਧੀ ਚੋਰੀ ਦੇ ਫੜੇ ਗਏ। ਈਸਟ ਡਿਵੀਜ਼ਨ ਵਿਚ 2.50 ਲੱਖ, ਕੈਂਟ ਵਿਚ 1.41 ਲੱਖ, ਫਗਵਾੜਾ ਵਿਚ 85 ਹਜ਼ਾਰ ਅਤੇ ਵੈਸਟ ਡਿਵੀਜ਼ਨ ਵਿਚ 20 ਹਜ਼ਾਰ ਜੁਰਮਾਨਾ ਕੀਤਾ ਗਿਆ।
ਬਿਜਲੀ ਚੋਰੀ ‘ਤੇ ਸਖ਼ਤ ਨਿਗਰਾਨੀ
ਡਿਪਟੀ ਚੀਫ਼ ਇੰਜੀਨੀਅਰ ਗੁਲਸ਼ਨ ਚੁਟਾਨੀ ਨੇ ਕਿਹਾ ਕਿ ਹੁੰਮਸ ਅਤੇ ਗਰਮੀ ਦੇ ਦਿਨਾਂ ਵਿਚ ਬਿਜਲੀ ਚੋਰੀ ਵਧਦੀ ਹੈ ਕਿਉਂਕਿ ਏ.ਸੀ. ਦੀ ਵਰਤੋਂ ਵਧ ਜਾਂਦੀ ਹੈ। ਇਸ ਲਈ ਸਾਰੇ ਐਕਸੀਅਨਾਂ ਨੂੰ ਵਿਸ਼ੇਸ਼ ਨਿਗਰਾਨੀ ਲਈ ਹੁਕਮ ਦਿੱਤੇ ਗਏ ਹਨ।
