ਨਵੀਂ ਦਿੱਲੀ :- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਭਾਰਤੀ ਸਮੇਂ ਅਨੁਸਾਰ ਵੀਰਵਾਰ ਸਵੇਰੇ 6.30 ਵਜੇ ਸੰਬੋਧਨ ਕਰਕੇ ਈਰਾਨ ਖਿਲਾਫ ਚੱਲ ਰਹੀ ਫੌਜੀ ਕਾਰਵਾਈ ਦੀ ਸਥਿਤੀ ਬਾਰੇ ਅਮਰੀਕੀ ਲੋਕਾਂ ਨੂੰ ਜਾਣੂ ਕਰਵਾਇਆ। ਇਹ ਉਨ੍ਹਾਂ ਦਾ ਪਹਿਲਾ ਵੱਡਾ ਸੰਬੋਧਨ ਹੈ ਜੋ 28 ਫਰਵਰੀ ਤੋਂ ਅਮਰੀਕਾ ਅਤੇ ਇਜ਼ਰਾਈਲ ਵੱਲੋਂ ਸ਼ੁਰੂ ਕੀਤੀ ਗਈ ਫੌਜੀ ਮੁਹਿੰਮ ਦੇ ਦੂਜੇ ਮਹੀਨੇ ਵਿੱਚ ਆਇਆ। ਇਸ ਦੌਰਾਨ ਅਮਰੀਕੀ ਲੋਕਾਂ ਵਿੱਚ ਜੰਗ ਪ੍ਰਤੀ ਚਿੰਤਾ ਤੇ ਅਸੰਤੁਸ਼ਟੀ ਵਧ ਰਹੀ ਹੈ।
ਟ੍ਰੰਪ ਨੇ ਕਿਹਾ—“ਈਰਾਨ ਦੀ ਫੌਜੀ ਸਮਰੱਥਾ ਖ਼ਤਮ”
ਸੰਬੋਧਨ ਦੀ ਸ਼ੁਰੂਆਤ ਵਿੱਚ ਟਰੰਪ ਨੇ ਦਾਅਵਾ ਕੀਤਾ ਕਿ ਈਰਾਨ ਦੀ ਜਲ ਸੈਨਾ ਮੁਕੰਮਲ ਤੌਰ ‘ਤੇ ਤਬਾਹ ਹੋ ਚੁਕੀ ਹੈ ਅਤੇ ਹਵਾਈ ਫੌਜ ਵੀ ਖ਼ਤਮ ਹੋ ਚੁੱਕੀ ਹੈ। ਉਨ੍ਹਾਂ ਅਨੁਸਾਰ, ਬਹੁਤ ਸਾਰੇ ਉੱਚ ਅਫ਼ਸਰ ਮਾਰੇ ਗਏ ਹਨ ਅਤੇ ਬਾਕੀ ਬਚੇ ਨੇਤਾ ਘੱਟ ਸਮਰੱਥ ਹਨ। ਇਸ ਨਾਲ ਈਰਾਨੀ ਮਿਜ਼ਾਈਲਾਂ ਅਤੇ ਡਰੋਨ ਲਾਂਚ ਕਰਨ ਦੀ ਯੋਗਤਾ ਕਾਫੀ ਘੱਟ ਹੋ ਗਈ ਹੈ।
ਵੈਨੇਜ਼ੁਏਲਾ ਆਪ੍ਰੇਸ਼ਨ ਦਾ ਉਲੇਖ
ਟਰੰਪ ਨੇ ਜਨਵਰੀ ਵਿੱਚ ਨਿਕੋਲਸ ਮਾਦੁਰੋ ਖਿਲਾਫ ਕੀਤੇ ਗਏ ਵੈਨੇਜ਼ੁਏਲਾ ਆਪ੍ਰੇਸ਼ਨ ਦੀ ਵੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਅਮਰੀਕਾ ਹੁਣ ਵੈਨੇਜ਼ੁਏਲਾ ਦੇ ਸਹਿਯੋਗ ਨਾਲ ਕਾਰਵਾਈ ਕਰ ਰਿਹਾ ਹੈ ਅਤੇ ਦੋਵਾਂ ਦੇਸ਼ਾਂ ਦੇ ਰਿਸ਼ਤੇ ਮਜ਼ਬੂਤ ਹਨ।
“2-3 ਹਫ਼ਤਿਆਂ ‘ਚ ਹੋਵੇਗਾ ਵੱਡਾ ਹਮਲਾ”
ਰਾਸ਼ਟਰਪਤੀ ਨੇ ਚਿਤਾਵਨੀ ਦਿੱਤੀ ਕਿ ਈਰਾਨ ਖਿਲਾਫ ਅਗਲੇ 2-3 ਹਫ਼ਤਿਆਂ ਵਿੱਚ ਵੱਡੀ ਕਾਰਵਾਈ ਸ਼ੁਰੂ ਕੀਤੀ ਜਾ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਅਮਰੀਕਾ ਆਪਣੇ ਨਾਗਰਿਕਾਂ ਦੇ ਭਵਿੱਖ ਨੂੰ ਸੁਰੱਖਿਅਤ ਰੱਖਣ ਲਈ ਜ਼ਰੂਰੀ ਕਦਮ ਉਠਾ ਰਿਹਾ ਹੈ।
‘ਆਪ੍ਰੇਸ਼ਨ ਐਪਿਕ ਫਿਊਰੀ’ ਜਾਰੀ ਰਹੇਗਾ
ਟਰੰਪ ਨੇ ਰਾਸ਼ਟਰ ਨੂੰ ਦੱਸਿਆ ਕਿ ‘ਆਪ੍ਰੇਸ਼ਨ ਐਪਿਕ ਫਿਊਰੀ’ ਚੱਲਦਾ ਰਹੇਗਾ। ਉਨ੍ਹਾਂ ਕਿਹਾ ਕਿ ਪਿਛਲੇ ਚਾਰ ਹਫ਼ਤਿਆਂ ਵਿੱਚ ਫੌਜਾਂ ਨੇ ਜੰਗ ਦੇ ਮੈਦਾਨ ਵਿੱਚ ਭਾਰੀ ਅਤੇ ਨਿਰਣਾਇਕ ਜਿੱਤ ਪ੍ਰਾਪਤ ਕੀਤੀ।
ਮੱਧ ਪੂਰਬ ਦੇ ਸਹਿਯੋਗੀਆਂ ਦੀ ਤਾਰੀਫ਼
ਟਰੰਪ ਨੇ ਇਜ਼ਰਾਈਲ, ਸਾਊਦੀ ਅਰਬ, ਕਤਰ, ਸੰਯੁਕਤ ਅਰਬ ਅਮੀਰਾਤ, ਕੁਵੈਤ ਅਤੇ ਬਹਿਰੀਨ ਦੀ ਭੂਮਿਕਾ ਦੀ ਵੀ ਪ੍ਰਸ਼ੰਸਾ ਕੀਤੀ। ਉਨ੍ਹਾਂ ਕਿਹਾ ਕਿ ਇਹ ਦੇਸ਼ ਸ਼ਾਨਦਾਰ ਸਹਿਯੋਗ ਦੇ ਰਹੇ ਹਨ ਅਤੇ ਉਨ੍ਹਾਂ ਨੂੰ ਕਿਸੇ ਨੁਕਸਾਨ ਦੀ ਚਿੰਤਾ ਨਹੀਂ।
ਮਿਡਲ ਈਸਟ ਦੇ ਤੇਲ ਬਾਰੇ ਸਪਸ਼ਟ ਬਿਆਨ
ਟਰੰਪ ਨੇ ਜ਼ੋਰ ਦਿੱਤਾ ਕਿ ਅਮਰੀਕਾ ਨੂੰ ਮਿਡਲ ਈਸਟ ਦੇ ਤੇਲ ਦੀ ਲੋੜ ਨਹੀਂ ਹੈ, ਫਿਰ ਵੀ ਉਹ ਆਪਣੇ ਸਹਿਯੋਗੀਆਂ ਦੀ ਸਹਾਇਤਾ ਜਾਰੀ ਰੱਖੇਗਾ।
ਅਮਰੀਕੀ ਫੌਜ ਦੀ ਸ਼ਲਾਘਾ
ਰਾਸ਼ਟਰਪਤੀ ਨੇ ਆਪਣੀ ਫੌਜ ਦੀ ਤਾਕਤ ਦਾ ਵੀ ਬਿਆਨ ਦਿੱਤਾ, ਕਿਹਾ ਕਿ ਫੌਜ ਨੇ ਈਰਾਨ ਨੂੰ ਭਾਰੀ ਝਟਕਾ ਦਿੱਤਾ ਹੈ ਅਤੇ ਦੁਨੀਆ ਦੀ ਸਭ ਤੋਂ ਤਾਕਤਵਰ ਫੌਜ ਵਜੋਂ ਆਪਣੀ ਸਮਰੱਥਾ ਸਾਬਤ ਕੀਤੀ ਹੈ।
