ਨਵੀਂ ਦਿੱਲੀ :- ਪਾਕਿਸਤਾਨ ਦੇ ਫੌਜੀ ਮੁਖੀ ਜਨਰਲ ਆਸੀਮ ਮੁਨੀਰ ਨੇ ਅਮਰੀਕਾ ਪਹੁੰਚ ਕੇ ਇੱਕ ਵਾਰੀ ਫਿਰ ਭਾਰਤ ਖਿਲਾਫ਼ ਤਿੱਖੇ ਅਤੇ ਖਤਰਨਾਕ ਬਿਆਨ ਦਿੱਤੇ ਹਨ। ਇਸ ਮਾਮਲੇ ‘ਚ ਭਾਰਤ ਦੇ ਵਿਦੇਸ਼ ਮੰਤਰਾਲੇ ਨੇ ਵੀ ਸਖ਼ਤ ਪ੍ਰਤੀਕਿਰਿਆ ਦਿੱਤੀ ਹੈ ਅਤੇ ਪਾਕਿਸਤਾਨ ਦੀ ਸੱਚਾਈ ਬੇਨਕਾਬ ਕਰ ਦਿੱਤੀ ਹੈ।
ਆਸੀਮ ਮੁਨੀਰ ਨੇ ਕਿਹਾ ਕਿ “ਮੈਂ ਸਥਿਤੀ ਨੂੰ ਸਧਾਰਨ ਸ਼ਬਦਾਂ ਵਿੱਚ ਵਰਨਣ ਕਰਾਂਗਾ। ਭਾਰਤ ਇੱਕ ਚਮਕਦੀ ਮਰਸਿਡੀਜ਼ ਜਾਂ ਫਰਾਰੀ ਹੈ ਜੋ ਹਾਈਵੇ ‘ਤੇ ਦੌੜ ਰਹੀ ਹੈ, ਅਤੇ ਅਸੀਂ ਇੱਕ ਮਿੱਟੀ ਭਰੇ ਡੰਪ ਟਰੱਕ ਵਰਗੇ ਹਾਂ। ਹੁਣ ਸੋਚੋ ਜੇ ਟਰੱਕ ਕਾਰ ਨਾਲ ਟਕਰਾਇਆ ਤਾਂ ਨੁਕਸਾਨ ਕਿਸਦਾ ਹੋਵੇਗਾ?”
ਭਾਰਤ ਦੇ ਵਿਦੇਸ਼ ਮੰਤਰਾਲਏ ਦੀ ਪ੍ਰਤੀਕਿਰਿਆ
ਵਿਦੇਸ਼ ਮੰਤਰਾਲੇ ਨੇ ਇਸ ਘਟਨਾ ‘ਤੇ ਟਿੱਪਣੀ ਕਰਦਿਆਂ ਕਿਹਾ ਕਿ ਪਾਕਿਸਤਾਨੀ ਫੌਜ ਦੇ ਮੁਖੀ ਵੱਲੋਂ ਅਮਰੀਕਾ ਵਿੱਚ ਦਿੱਤੇ ਗਏ ਇਹ ਬਿਆਨ ਗੈਰ ਜ਼ਿੰਮੇਵਾਰਾਨਾ ਹਨ। ਪਾਕਿਸਤਾਨ ਦੇਸ਼ ਵਿੱਚ ਜਿੱਥੇ ਫੌਜ ਅਤੇ ਆਤੰਕਵਾਦੀ ਸੰਗਠਨਾਂ ਦਾ ਗੂੜ੍ਹਾ ਜਾਲ ਹੈ। ਉਥੇ ਪਰਮਾਣੂ ਹਥਿਆਰਾਂ ਦੀ ਸੁਰੱਖਿਆ ਅਤੇ ਜ਼ਿੰਮੇਵਾਰੀ ਉਤੇ ਭਰੋਸਾ ਨਹੀਂ ਕੀਤਾ ਜਾ ਸਕਦਾ। ਅੰਤਰਰਾਸ਼ਟਰੀ ਭਾਈਚਾਰੇ ਨੇ ਵੀ ਇਸ ਗੱਲ ਨੂੰ ਸਪਸ਼ਟ ਕੀਤਾ ਹੈ।
ਵਿਦੇਸ਼ ਮੰਤਰਾਲੇ ਨੇ ਇਹ ਵੀ ਦੱਸਿਆ ਕਿ ਭਾਰਤ ਪਹਿਲਾਂ ਹੀ ਸਪੱਸ਼ਟ ਕਰ ਚੁਕਾ ਹੈ ਕਿ ਪਰਮਾਣੂ ਬਲੈਕਮੇਲਿੰਗ ਦੇ ਅੱਗੇ ਕਦੇ ਨਹੀਂ ਝੁਕੇਗਾ ਅਤੇ ਆਪਣੇ ਦੇਸ਼ ਦੀ ਸੁਰੱਖਿਆ ਲਈ ਜ਼ਰੂਰੀ ਕਦਮ ਲੈਂਦਾ ਰਹੇਗਾ।
ਆਸੀਮ ਮੁਨੀਰ ਵੱਲੋਂ ਪਰਮਾਣੂ ਜੰਗ ਦੀ ਧਮਕੀ
ਅਮਰੀਕਾ ਵਿੱਚ ਇੱਕ ਡਿਨਰ ਦੌਰਾਨ, ਜਿੱਥੇ ਜਨਰਲ ਮੁਨੀਰ ਮੌਜੂਦ ਸਨ, ਉਨ੍ਹਾਂ ਨੇ ਭਾਰਤ ਨੂੰ ਪਰਮਾਣੂ ਜੰਗ ਦੀ ਧਮਕੀ ਵੀ ਦਿੱਤੀ। ਉਹਨਾਂ ਨੇ ਕਿਹਾ, “ਅਸੀਂ ਪਰਮਾਣੂ ਸਮਰੱਥ ਦੇਸ਼ ਹਾਂ। ਜੇ ਸਾਨੂੰ ਲੱਗਾ ਕਿ ਅਸੀਂ ਡੁੱਬ ਰਹੇ ਹਾਂ ਤਾਂ ਅਸੀਂ ਅੱਧੀ ਦੁਨੀਆਂ ਨੂੰ ਆਪਣੇ ਨਾਲ ਲੈ ਕੇ ਡੁੱਬ ਜਾਵਾਂਗੇ।”
ਇਸ ਤੋਂ ਇਲਾਵਾ, ਮੀਡੀਆ ਰਿਪੋਰਟਾਂ ਅਨੁਸਾਰ ਜਨਰਲ ਮੁਨੀਰ ਨੇ ਸਿੰਧੂ ਜਲ ਸੰਧੀ ਦਾ ਵੀ ਜ਼ਿਕਰ ਕੀਤਾ ਅਤੇ ਕਿਹਾ ਕਿ ਜੇ ਭਾਰਤ ਨੇ ਕਿਸੇ ਤਰ੍ਹਾਂ ਦਾ ਬੰਧ ਬਣਾਇਆ ਤਾਂ ਉਹਨਾਂ ਕੋਲ ਉਸਨੂੰ 10 ਮਿਸਾਈਲਾਂ ਨਾਲ ਤਬਾਹ ਕਰਨ ਦੀ ਤਾਕਤ ਹੈ। ਮੁਨੀਰ ਨੇ ਚੇਤਾਵਨੀ ਦਿੱਤੀ ਕਿ ਭਾਰਤ ਵੱਲੋਂ ਬੰਧ ਬਣਾਉਣ ਦੇ ਫੈਸਲੇ ਨਾਲ 25 ਕਰੋੜ ਲੋਕਾਂ ਨੂੰ ਭੁੱਖਮਰੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
ਇਸ ਘਟਨਾ ਨੇ ਭਾਰਤੀ ਸਰਕਾਰ ਅਤੇ ਵਿਦੇਸ਼ ਮੰਤਰਾਲੇ ਵੱਲੋਂ ਪਾਕਿਸਤਾਨ ਦੀਆਂ ਨੀਤੀਆਂ ਨੂੰ ਫਿਰ ਇਕ ਵਾਰੀ ਸਖ਼ਤ ਤਰੀਕੇ ਨਾਲ ਟੀਕਾ ਕਰਨ ਦਾ ਮੌਕਾ ਦਿੱਤਾ ਹੈ। ਪਾਕਿਸਤਾਨ ਦੇ ਅਜਿਹੇ ਬਿਆਨਾਂ ਨਾਲ ਖੇਤਰ ਵਿੱਚ ਸੁਰੱਖਿਆ ਸਥਿਤੀ ਤੇ ਭਾਰੀ ਚਿੰਤਾ ਵਧੀ ਹੈ।
