ਚੰਡੀਗੜ੍ਹ :- ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਕੱਲ੍ਹ ਤੋਂ 10 ਦਿਨਾਂ ਦੇ ਮਹੱਤਵਪੂਰਣ ਸਰਕਾਰੀ ਦੌਰੇ ’ਤੇ ਜਾਪਾਨ ਜਾ ਰਹੇ ਹਨ। ਇਹ ਯਾਤਰਾ ਸੂਬੇ ਵਿੱਚ ਉਦਯੋਗਿਕ ਮਾਹੌਲ ਨੂੰ ਹੋਰ ਮਜ਼ਬੂਤ ਬਣਾਉਣ ਅਤੇ ਵਿਦੇਸ਼ੀ ਨਿਵੇਸ਼ ਦੀ ਨਵੀਂ ਲਹਿਰ ਲਿਆਉਣ ਵੱਜੋਂ ਬਹੁਤ ਅਹਿਮ ਮੰਨੀ ਜਾ ਰਹੀ ਹੈ।
ਜਾਪਾਨੀ ਉਦਯੋਗਪਤੀਆਂ ਨੂੰ ਪੰਜਾਬ ਬੁਲਾਉਣ ਦੀ ਤਿਆਰੀ
ਦੌਰੇ ਦੌਰਾਨ ਸੀ.ਐੱਮ. ਮਾਨ ਜਾਪਾਨ ਦੇ ਪ੍ਰਮੁੱਖ ਉਦਯੋਗਿਕ ਘਰਾਨਿਆਂ ਅਤੇ ਬਿਜ਼ਨਸ ਸੰਗਠਨਾਂ ਨਾਲ ਮੁਲਾਕਾਤਾਂ ਕਰਨਗੇ।
ਉਹ ਉਨ੍ਹਾਂ ਨੂੰ ਪੰਜਾਬ ਵਿੱਚ ਹੋਣ ਵਾਲੇ ਇੰਡਸਟਰੀਅਲ ਸਮਿਟ ਲਈ ਸਿੱਧਾ ਸੱਦਾ ਦੇਣਗੇ, ਤਾਂ ਜੋ ਜਾਪਾਨੀ ਨਿਵੇਸ਼ਕ ਪੰਜਾਬ ਦੇ ਮੌਕੇ ਅਤੇ ਸੰਭਾਵਨਾਵਾਂ ਨੂੰ ਆਪਣੇ ਤਜਰਬੇ ਨਾਲ ਜੋੜ ਸਕਣ।
ਵੱਡੇ ਨਿਵੇਸ਼ ਲਈ ਰਸਮੀ ਨਿਯੋਤਾ
ਮਾਨ ਵੱਲੋਂ ਜਾਪਾਨ ਦੀਆਂ ਸਿਖਰਲੀਆਂ ਕੰਪਨੀਆਂ ਨੂੰ ਪੰਜਾਬ ਵਿੱਚ ਵੱਡੇ ਪੱਧਰ ‘ਤੇ ਨਿਵੇਸ਼ ਕਰਨ ਲਈ ਰਸਮੀ ਨਿਯੋਤਾ ਦਿੱਤਾ ਜਾਵੇਗਾ।
ਇਹ ਕਦਮ ਪੰਜਾਬ ਦੇ ਉਦਯੋਗਿਕ ਖੇਤਰ ਨੂੰ ਵਿਸਥਾਰ ਦੇਣ ਅਤੇ ਤਾਜ਼ਾ ਪੂੰਜੀ ਲਿਆਉਣ ਦੀ ਰਣਨੀਤੀ ਦਾ ਹਿੱਸਾ ਹੈ।
ਨਵੀਂ ਤਕਨਾਲੋਜੀ ਅਤੇ ਉਦਯੋਗਿਕ ਵਿਸਥਾਰ ‘ਤੇ ਫੋਕਸ
ਇਸ ਦੌਰੇ ਵਿੱਚ ਦੁਨੀਆ ਭਰ ਵਿੱਚ ਮੰਨੀ ਜਾਣ ਵਾਲੀ ਜਾਪਾਨੀ ਉਤਪਾਦਨ ਤਕਨਾਲੋਜੀ ਅਤੇ ਕਾਰੋਬਾਰੀ ਮਾਡਲਾਂ ਨੂੰ ਪੰਜਾਬ ਤੱਕ ਲਿਆਉਣ ‘ਤੇ ਵੀ ਗਹਿਰੇ ਵਿਚਾਰ–ਵਿਮਰਸ਼ ਹੋਣਗੇ।
ਮਾਨ ਜਾਪਾਨੀ ਬਿਜ਼ਨਸ ਲੀਡਰਾਂ ਨਾਲ ਪੰਜਾਬ ਦੇ ਉਦਯੋਗਾਂ ਲਈ ਨਵੀਆਂ ਤਕਨੀਕੀ ਸਾਂਝਾਂ, ਸੈਕਟਰ-ਵਾਈਜ਼ ਵਿਸਥਾਰ ਅਤੇ ਲੰਬੇ ਸਮੇਂ ਵਾਲੇ ਪ੍ਰਾਜੈਕਟਾਂ ਬਾਰੇ ਚਰਚਾ ਕਰਨਗੇ।
ਪੰਜਾਬ – ਜਾਪਾਨ ਸੰਬੰਧਾਂ ਵਿੱਚ ਨਵੀਂ ਗਤੀ
ਇਹ ਦੌਰਾ ਦੋਵੇਂ ਖਿੱਤਿਆਂ ਵਿਚਕਾਰ ਆਰਥਿਕ ਸਹਿਕਾਰਤਾ, ਤਕਨੀਕੀ ਤਬਾਦਲੇ ਅਤੇ ਨਵੀਆਂ ਉਦਯੋਗਿਕ ਸਾਂਝਾਂ ਨੂੰ ਮਜ਼ਬੂਤ ਕਰਨ ਦੇ ਮਕਸਦ ਨਾਲ ਬਹੁਤ ਮਹੱਤਵਪੂਰਣ ਕਦਮ ਵਜੋਂ ਦੇਖਿਆ ਜਾ ਰਿਹਾ ਹੈ।
ਸਰਕਾਰੀ ਦਰਜੇ ’ਤੇ ਕੀਤੀ ਜਾ ਰਹੀ ਇਹ ਮੁਹਿੰਮ ਪੰਜਾਬ ਲਈ ਰੋਜ਼ਗਾਰ, ਤਕਨੀਕ ਅਤੇ ਨਿਵੇਸ਼ ਦੇ ਨਵੇਂ ਰਸਤੇ ਖੋਲ੍ਹ ਸਕਦੀ ਹੈ।
