ਨਵੀਂ ਦਿੱਲੀ :- ਜਾਅਲੀ ਪਾਸਪੋਰਟ ਦੀ ਮਦਦ ਨਾਲ ਦੇਸ਼ ਤੋਂ ਫਰਾਰ ਹੋ ਕੇ ਵਿਦੇਸ਼ਾਂ ਵਿਚ ਅਪਰਾਧਿਕ ਨੈੱਟਵਰਕ ਤਿਆਰ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਇੱਕ ਲੋੜੀਂਦਾ ਗੈਂਗਸਟਰ ਆਖ਼ਿਰਕਾਰ ਕਾਨੂੰਨ ਦੀ ਗਿਰਫ਼ਤ ‘ਚ ਆ ਗਿਆ। ਕੇਂਦਰੀ ਏਜੰਸੀਆਂ ਦੇ ਤਾਲਮੇਲ ਅਤੇ ਥਾਈ ਅਧਿਕਾਰੀਆਂ ਦੇ ਸਹਿਯੋਗ ਨਾਲ ਇਸਨੂੰ ਬੈਂਕਾਕ ਤੋਂ ਡਿਪੋਰਟ ਕਰਨ ਤੋਂ ਬਾਅਦ ਦਿੱਲੀ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ।
ਗੋਲਡੀ ਢਿੱਲੋਂ ਦੇ ਨੈੱਟਵਰਕ ਨਾਲ ਜੁੜਨ ਦੀ ਕੋਸ਼ਿਸ਼
ਪੁਲਿਸ ਜਾਣਕਾਰੀ ਮੁਤਾਬਕ, ਗ੍ਰਿਫ਼ਤਾਰ ਕੀਤਾ ਗਿਆ ਦੋਸ਼ੀ ਹਰਸਿਮਰਨ ਉਰਫ਼ ਬਾਦਲ (38), ਪੂਰਬੀ ਸ਼ਾਲੀਮਾਰ ਬਾਗ, ਦਿੱਲੀ ਦਾ ਰਹਿਣ ਵਾਲਾ ਹੈ। ਜਾਂਚ ਦੌਰਾਨ ਖੁਲਾਸਾ ਹੋਇਆ ਕਿ ਉਹ ਵਿਦੇਸ਼ੀ ਗੈਂਗਸਟਰ ਗੋਲਡੀ ਢਿੱਲੋਂ ਨਾਲ ਮਿਲ ਕੇ ਯੂਰਪ ਵਿੱਚ ਆਪਣੇ ਅਪਰਾਧਿਕ ਨੈੱਟਵਰਕ ਦਾ ਫੈਲਾਅ ਕਰਨਾ ਚਾਹੁੰਦਾ ਸੀ। ਇਸ ਲਈ ਉਸਨੇ ਜਾਅਲੀ ਨਾਂ ਰਾਜੇਸ਼ ਸਿੰਘ ਦੇ ਨਾਂ ‘ਤੇ ਗੋਰਖਪੁਰ ਤੋਂ ਨਕਲੀ ਪਾਸਪੋਰਟ ਤਿਆਰ ਕਰਵਾਇਆ ਅਤੇ ਜਨਵਰੀ ਵਿੱਚ ਬੈਂਕਾਕ ਰਵਾਨਾ ਹੋਇਆ।
ਅਮਰੀਕਾ – ਯੂਰਪ ਜਾਣ ਦੀ ਨਾਕਾਮ ਕੋਸ਼ਿਸ਼
ਬੈਂਕਾਕ ਤੋਂ ਉਹ ਸਿੱਧਾ ਦੁਬਈ ਪਹੁੰਚਿਆ, ਜਿਥੋਂ ਮਨੁੱਖੀ ਤਸਕਰਾਂ ਅਤੇ ਗੋਲਡੀ ਢਿੱਲੋਂ ਦੇ ਸਾਥੀਆਂ ਦੀ ਮਦਦ ਨਾਲ ਅਮਰੀਕਾ ਅਤੇ ਯੂਰਪ ਵਿੱਚ ਦਾਖਲ ਹੋਣ ਦੀ ਯੋਜਨਾ ਬਣਾਈ ਗਈ। ਪੁਲਿਸ ਦੇ ਅਨੁਸਾਰ, ਉਸਨੇ ਪਹਿਲਾਂ ਅਜ਼ਰਬੈਜ਼ਾਨ ਰਾਹੀਂ ਯੂਰਪ ਵਿੱਚ ਦਾਖਲ ਹੋਣ ਦੀ ਕੋਸ਼ਿਸ਼ ਕੀਤੀ। ਇਸ ਤੋਂ ਬਾਅਦ ਬੇਲਾਰੂਸ–ਲਾਤਵੀਆ–ਪੋਲੈਂਡ ਰੂਟ ਦੀ ਵਰਤੋਂ ਕੀਤੀ ਗਈ। ਦੋਵੇਂ ਯਤਨ ਅਸਫਲ ਰਹੇ ਅਤੇ ਯੂਰਪੀ ਅਧਿਕਾਰੀਆਂ ਨੇ ਉਸਨੂੰ ਹਿਰਾਸਤ ਵਿੱਚ ਲੈ ਕੇ ਡਿਪੋਰਟ ਕਰ ਦਿੱਤਾ।
ਬੈਂਕਾਕ ਵਾਪਸੀ ‘ਤੇ ਹਿਰਾਸਤ
ਵੀਜ਼ਾ ਵਧਾਉਣ ਲਈ ਜਦੋਂ ਹਰਸਿਮਰਨ ਮੁੜ ਬੈਂਕਾਕ ਪਹੁੰਚਿਆ ਤਾਂ ਓਥੇ ਹੀ ਥਾਈ ਅਧਿਕਾਰੀਆਂ ਨੇ ਉਸਨੂੰ ਗ੍ਰਿਫ਼ਤਾਰ ਕਰ ਲਿਆ। ਭਾਰਤੀ ਏਜੰਸੀਆਂ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਤੇ ਜਾਅਲੀ ਪਹਿਚਾਣ ਦੀ ਪੁਸ਼ਟੀ ਹੋਣ ‘ਤੇ ਉਸਨੂੰ 26 ਨਵੰਬਰ ਨੂੰ ਦਿੱਲੀ ਡਿਪੋਰਟ ਕਰ ਦਿੱਤਾ ਗਿਆ।
ਪਾਸਪੋਰਟ ਰੱਦ, ਕਾਨੂੰਨੀ ਕਾਰਵਾਈ ਜਾਰੀ
ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਜੇਹੜਾ ਪਾਸਪੋਰਟ ਹਰਸਿਮਰਨ ਨੇ ਜਾਅਲੀ ਤਰੀਕੇ ਨਾਲ ਬਣਵਾਇਆ ਸੀ, ਉਸਨੂੰ ਵਿਦੇਸ਼ ਮੰਤਰਾਲੇ ਨੇ ਪਹਿਲਾਂ ਹੀ ਰੱਦ ਕਰ ਦਿੱਤਾ ਸੀ। ਹੁਣ ਉਸਦੇ ਖ਼ਿਲਾਫ਼ ਧੋਖਾਧੜੀ, ਜਾਅਲੀ ਦਸਤਾਵੇਜ਼ ਅਤੇ ਅੰਤਰਰਾਸ਼ਟਰੀ ਅਪਰਾਧਿਕ ਗਤੀਵਿਧੀਆਂ ਦੇ ਤਹਿਤ ਕਾਰਵਾਈ ਚੱਲ ਰਹੀ ਹੈ।
