ਆਸਟ੍ਰੇਲੀਆ :- ਆਸਟ੍ਰੇਲੀਆ ਦੇ ਰਾਜ Victoria ਦੇ ਕੋਰਿਓ ਇਲਾਕੇ ‘ਚ ਰਹਿੰਦੇ 22 ਸਾਲਾ ਸਿੱਖ ਨੌਜਵਾਨ ਹਰਮਨਪ੍ਰੀਤ ਸਿੰਘ ਨਾਲ ਨਸਲੀ ਟਿੱਪਣੀਆਂ ਤੋਂ ਸ਼ੁਰੂ ਹੋਇਆ ਵਿਵਾਦ ਹਿੰਸਕ ਰੂਪ ਧਾਰ ਗਿਆ। ਪੇਸ਼ੇ ਨਾਲ ਨਰਸ ਹਰਮਨਪ੍ਰੀਤ ਮੁਤਾਬਕ ਘਟਨਾ ਮੰਗਲਵਾਰ ਦੇਰ ਰਾਤ ਉਸ ਵੇਲੇ ਵਾਪਰੀ ਜਦੋਂ ਉਹ ਸਥਾਨਕ ਜਿਮ ਵਿੱਚ ਕਸਰਤ ਕਰ ਰਹੇ ਸਨ।
ਜਿਮ ਅੰਦਰ ਨਸਲੀ ਟਿੱਪਣੀਆਂ, ਬਾਹਰ ਹਿੰਸਕ ਝੜਪ
ਪੀੜਤ ਦੇ ਦੱਸਣ ਅਨੁਸਾਰ ਜਿਮ ਅੰਦਰ ਮੌਜੂਦ ਤਿੰਨ ਵਿਅਕਤੀਆਂ ਵੱਲੋਂ ਉਸ ‘ਤੇ ਨਸਲੀ ਟਿੱਪਣੀਆਂ ਕੀਤੀਆਂ ਗਈਆਂ। ਮਾਮਲਾ ਉਸ ਵੇਲੇ ਤਪ ਗਿਆ ਜਦੋਂ ਜਿਮ ਤੋਂ ਬਾਹਰ ਨਿਕਲਣ ‘ਤੇ ਇਕ ਵਿਅਕਤੀ ਉਸਦੇ ਬਿਲਕੁਲ ਨੇੜੇ ਆ ਕੇ ਅਚਾਨਕ ਸਿਰ ਨਾਲ ਉਸਦੇ ਨੱਕ ‘ਤੇ ਵਾਰ ਕਰ ਗਿਆ। ਇਸ ਟੱਕਰ ਨਾਲ ਉਸਦਾ ਨੱਕ ਤੁਰੰਤ ਖੂਨ ਨਾਲ ਭਰ ਗਿਆ।
ਆਸਟ੍ਰੇਲੀਆਈ ਮੀਡੀਆ ਸੰਸਥਾ 9News ਨਾਲ ਗੱਲਬਾਤ ਕਰਦਿਆਂ ਹਰਮਨਪ੍ਰੀਤ ਨੇ ਕਿਹਾ ਕਿ ਹਮਲਾਵਰਾਂ ਵੱਲੋਂ ਉਸਨੂੰ “ਆਪਣੇ ਦੇਸ਼ ਵਾਪਸ ਜਾ” ਵਰਗੀਆਂ ਗੱਲਾਂ ਕਹੀਆਂ ਗਈਆਂ ਅਤੇ ਅਪਮਾਨਜਨਕ ਸ਼ਬਦ ਵਰਤੇ ਗਏ।
ਹਮਲਾਵਰ ਕਾਰ ‘ਚ ਬੈਠ ਕੇ ਫਰਾਰ
ਘਟਨਾ ਤੋਂ ਬਾਅਦ ਤਿੰਨੇ ਦੋਸ਼ੀ ਇੱਕ ਸੈਡਾਨ ਕਾਰ ‘ਚ ਬੈਠ ਕੇ ਮੌਕੇ ਤੋਂ ਭੱਜ ਗਏ। ਜ਼ਖ਼ਮੀ ਹਾਲਤ ਵਿੱਚ ਹਰਮਨਪ੍ਰੀਤ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਦੱਸਿਆ ਕਿ ਚੋਟ ਗੰਭੀਰ ਹੈ ਅਤੇ ਸੰਭਵ ਹੈ ਕਿ ਅੱਗੇ ਤਜਰਬੇਕਾਰ ਇਲਾਜ ਜਾਂ ਸਰਜਰੀ ਦੀ ਲੋੜ ਪਵੇ।
ਮਾਨਸਿਕ ਝਟਕਾ ਵੀ ਗਹਿਰਾ
ਹਰਮਨਪ੍ਰੀਤ ਨੇ ਕਿਹਾ ਕਿ ਉਹ ਅਜੇ ਵੀ ਇਸ ਘਟਨਾ ਤੋਂ ਮਾਨਸਿਕ ਤੌਰ ‘ਤੇ ਹਿਲੇ ਹੋਏ ਹਨ। “ਰੋਜ਼ਾਨਾ ਦੀ ਜ਼ਿੰਦਗੀ ‘ਚੋਂ ਐਸਾ ਤਜਰਬਾ ਨਹੀਂ ਸੋਚਿਆ ਜਾਂਦਾ। ਇਹ ਬਹੁਤ ਦੁਖਦਾਈ ਹੈ,” ਉਨ੍ਹਾਂ ਕਿਹਾ। ਉਨ੍ਹਾਂ ਮੰਨਿਆ ਕਿ ਪਹਿਲਾਂ ਵੀ ਕਦੇ-ਕਦੇ ਨਸਲੀ ਟਿੱਪਣੀਆਂ ਸੁਣੀਆਂ, ਪਰ ਇਹ ਵਾਕਿਆ ਸਭ ਤੋਂ ਵੱਧ ਪੀੜਾਦਾਇਕ ਰਿਹਾ।
ਭਾਰਤੀ ਭਾਈਚਾਰੇ ‘ਚ ਚਿੰਤਾ
ਇਹ ਘਟਨਾ ਉਸ ਵੇਲੇ ਸਾਹਮਣੇ ਆਈ ਹੈ ਜਦੋਂ ਆਸਟ੍ਰੇਲੀਆ ‘ਚ ਭਾਰਤੀ ਮੂਲ ਦੇ ਲੋਕਾਂ ਖ਼ਿਲਾਫ਼ ਹੋ ਰਹੀਆਂ ਹਮਲਿਆਂ ਦੀਆਂ ਖ਼ਬਰਾਂ ਚਿੰਤਾ ਜਨਕ ਬਣ ਰਹੀਆਂ ਹਨ। ਪਿਛਲੇ ਸਾਲ ਜੁਲਾਈ ਵਿੱਚ Adelaide ਵਿੱਚ ਵੀ ਇੱਕ ਭਾਰਤੀ ਵਿਦਿਆਰਥੀ ‘ਤੇ ਹਮਲੇ ਦੀ ਜਾਂਚ ਨਸਲੀ ਕੋਣ ਤੋਂ ਕੀਤੀ ਗਈ ਸੀ।
ਸਮੁਦਾਇਕ ਆਗੂਆਂ ਨੇ ਸਰਕਾਰ ਅਤੇ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਤੋਂ ਮੰਗ ਕੀਤੀ ਹੈ ਕਿ ਨਸਲਵਾਦੀ ਘਟਨਾਵਾਂ ਖ਼ਿਲਾਫ਼ ਸਖ਼ਤ ਕਦਮ ਚੁੱਕੇ ਜਾਣ ਅਤੇ ਬਹੁ-ਸੱਭਿਆਚਾਰਕ ਸਮਾਜ ਦੀ ਸੁਰੱਖਿਆ ਯਕੀਨੀ ਬਣਾਈ ਜਾਵੇ। ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ, ਹਾਲਾਂਕਿ ਗ੍ਰਿਫ਼ਤਾਰੀਆਂ ਬਾਰੇ ਹਾਲੇ ਤੱਕ ਕੋਈ ਅਧਿਕਾਰਿਕ ਐਲਾਨ ਨਹੀਂ ਕੀਤਾ ਗਿਆ।
