ਨਵੀਂ ਦਿੱਲੀ :- ਪੋਲੈਂਡ ਦੇ ਰਾਡੋਮ ਇਲਾਕੇ ‘ਚ ਆਉਣ ਵਾਲੇ ਏਅਰ ਸ਼ੋ ਤੋਂ ਪਹਿਲਾਂ ਦੀ ਰਿਹਰਸਲ ਦੌਰਾਨ ਪੋਲਿਸ਼ ਏਅਰਫੋਰਸ ਦਾ F-16 ਫਾਈਟਰ ਜੈੱਟ ਕਰੈਸ਼ ਹੋ ਗਿਆ। ਹਾਦਸੇ ਵਿੱਚ ਪਾਇਲਟ ਦੀ ਮੌਤ ਹੋ ਗਈ। ਕਰੈਸ਼ ਸਮੇਂ ਜੈੱਟ ਅੱਗ ਦਾ ਗੋਲਾ ਬਣ ਗਿਆ ਅਤੇ ਕਈ ਦੂਰ ਤੱਕ ਘਿਸਟਦਾ ਚਲਾ ਗਿਆ।
ਸਰਕਾਰੀ ਪੁਸ਼ਟੀ ਅਤੇ ਸ਼ਰਧਾਂਜਲੀਆਂ
ਪੋਲੈਂਡ ਦੇ ਉਪ ਪ੍ਰਧਾਨ ਮੰਤਰੀ ਅਤੇ ਰਾਸ਼ਟਰੀ ਰੱਖਿਆ ਮੰਤਰੀ ਵਲਾਦਿਸਲਾਵ ਕੋਸਿਨਿਆਕ ਕਾਮਿਜ ਨੇ ਹਾਦਸੇ ਦੀ ਪੁਸ਼ਟੀ ਕੀਤੀ ਹੈ। ਪ੍ਰਧਾਨ ਮੰਤਰੀ ਡੋਨਾਲਡ ਟਸਕ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X ‘ਤੇ ਪਾਇਲਟ ਨੂੰ ਸ਼ਰਧਾਂਜਲੀ ਦਿੰਦੇ ਹੋਏ ਕਿਹਾ ਕਿ ਇਸ ਦੁਖਦ ਘਟਨਾ ‘ਚ ਇੱਕ ਕੀਮਤੀ ਜਾਨ ਚਲੀ ਗਈ ਹੈ।
F-16: ਅਮਰੀਕੀ ਤਕਨੀਕ ਦਾ ਜਾਣਿਆ-ਪਹਿਚਾਣਿਆ ਹਿੱਸਾ
F-16 ਫਾਈਟਰ ਜੈੱਟ, ਜਿਸਨੂੰ “ਫਾਈਟਿੰਗ ਫਾਲਕਨ” ਵੀ ਕਿਹਾ ਜਾਂਦਾ ਹੈ, ਇੱਕ ਅਮਰੀਕੀ ਬਣਿਆ ਸਿੰਗਲ-ਇੰਜਨ, ਸੁਪਰਸੋਨਿਕ ਅਤੇ ਮਲਟੀਰੋਲ ਲੜਾਕੂ ਜਹਾਜ਼ ਹੈ। ਇਸਨੂੰ 1970 ਦੇ ਦਹਾਕੇ ‘ਚ ਜਨਰਲ ਡਾਇਨਾਮਿਕਸ (ਹੁਣ ਲੌਕਹੀਡ ਮਾਰਟਿਨ) ਵੱਲੋਂ ਤਿਆਰ ਕੀਤਾ ਗਿਆ ਸੀ। ਇਹ ਜਹਾਜ਼ ਹਲਕਾ, ਤੇਜ਼ ਤੇ ਤਕਨੀਕੀ ਤੌਰ ‘ਤੇ ਉੱਨਤ ਮੰਨਿਆ ਜਾਂਦਾ ਹੈ ਅਤੇ 25 ਤੋਂ ਵੱਧ ਦੇਸ਼ਾਂ ਦੀ ਏਅਰਫੋਰਸ ਇਸਨੂੰ ਵਰਤ ਰਹੀ ਹੈ। ਇਸਦੀ ਵੱਧ ਤੋਂ ਵੱਧ ਗਤੀ ਮੈਕ 2 (ਲਗਭਗ 2,400 ਕਿਮੀ/ਘੰਟਾ) ਹੈ ਅਤੇ ਇਹ ਹਰ ਮੌਸਮ ਵਿੱਚ ਕਾਰਗਰ ਹੈ।
ਲਗਾਤਾਰ ਹਾਦਸਿਆਂ ਨਾਲ ਵਧ ਰਹੇ ਸਵਾਲ
ਕੁਝ ਹੀ ਦਿਨ ਪਹਿਲਾਂ ਅਲਾਸਕਾ ‘ਚ ਅਮਰੀਕਾ ਦਾ ਸਭ ਤੋਂ ਐਡਵਾਂਸ ਮੰਨਿਆ ਜਾਣ ਵਾਲਾ F-35 ਫਾਈਟਰ ਜੈੱਟ ਵੀ ਕਰੈਸ਼ ਹੋ ਗਿਆ ਸੀ। ਪਾਇਲਟ ਨੇ ਆਖਰੀ ਵੇਲੇ ਤਕ ਜਹਾਜ਼ ਨੂੰ ਸੰਭਾਲਣ ਦੀ ਕੋਸ਼ਿਸ਼ ਕੀਤੀ ਪਰ ਆਖ਼ਰਕਾਰ ਉਸਨੂੰ ਇਜੈਕਟ ਕਰਨਾ ਪਿਆ। ਜਹਾਜ਼ ਜ਼ਮੀਨ ‘ਤੇ ਡਿੱਗਦੇ ਹੀ ਅੱਗ ਦੀ ਲਪੇਟ ਵਿੱਚ ਆ ਗਿਆ।
ਕੀ ਅਮਰੀਕੀ ਫਾਈਟਰ ਜੈੱਟ ਹੁਣ ਵੀ ਸਭ ਤੋਂ ਭਰੋਸੇਮੰਦ?
F-35 ਅਤੇ ਹੁਣ F-16 ਦੇ ਹਾਦਸਿਆਂ ਨੇ ਅਮਰੀਕੀ ਫਾਈਟਰ ਜੈੱਟਸ ਦੀ ਭਰੋਸੇਯੋਗਤਾ ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਕੀ ਇਹ ਹਾਦਸੇ ਤਕਨੀਕੀ ਖਾਮੀਆਂ ਦਾ ਨਤੀਜਾ ਹਨ ਜਾਂ ਰੱਖ-ਰਖਾਅ ਵਿੱਚ ਕੁਝ ਕਮੀਆਂ ਰਹਿ ਗਈਆਂ ਹਨ? ਇਸਦੇ ਜਵਾਬ ਲਈ ਹਾਲੇ ਜਾਂਚ ਜਾਰੀ ਹੈ।
