ਨਵੀਂ ਦਿੱਲੀ :- ਕੈਨੇਡਾ ਦੇ ਔਟਵਾ ਸ਼ਹਿਰ ਵਿੱਚ ਪੰਜਾਬ ਦੇ ਮੋਰਿੰਡਾ ਦੇ ਰਹਿਣ ਵਾਲੇ ਨੌਜਵਾਨ ਹਰਵਿੰਦਰ ਸਿੰਘ ਹੈਰੀ (ਉਮਰ 31 ਸਾਲ) ਦੀ ਦਰਦਨਾਕ ਮੌਤ ਹੋ ਗਈ। ਸ਼ਨੀਵਾਰ ਨੂੰ ਹਾਈਵੇ 417 ‘ਤੇ ਆਪਣੀ ਭੈਣ ਕੋਲ ਰੱਖੜੀ ਬਨਵਾਉਣ ਲਈ ਜਾਂਦੇ ਸਮੇਂ ਉਸ ਦੀ ਗੱਡੀ ਨੂੰ ਅਚਾਨਕ ਅੱਗ ਲੱਗ ਗਈ। ਕਾਰ ਪੂਰੀ ਤਰ੍ਹਾਂ ਸੜ ਕੇ ਖਾਕ ਹੋ ਗਈ ਅਤੇ ਹੈਰੀ ਵੀ ਗੰਭੀਰ ਤਰ੍ਹਾਂ ਝੁਲਸ ਗਿਆ। ਉਸ ਨੂੰ ਫੌਰੀ ਤੌਰ ‘ਤੇ ਹਸਪਤਾਲ ਪਹੁੰਚਾਇਆ ਗਿਆ, ਪਰ ਡਾਕਟਰਾਂ ਨੇ ਉਸ ਨੂੰ ਬਚਾ ਨਹੀਂ ਸਕੇ।
ਮੋਰਿੰਡਾ ਦਾ ਰਹਿਣ ਵਾਲਾ, ਹਾਲ ਹੀ ‘ਚ ਹੋਇਆ ਸੀ ਵਿਆਹ
ਹਰਵਿੰਦਰ ਸਿੰਘ ਹੈਰੀ, ਸੂਦ ਕਲੋਨੀ ਮੋਰਿੰਡਾ ਦੇ ਵਸਨੀਕ ਅਤੇ ਸਟੇਟ ਬੈਂਕ ਆਫ ਪਟਿਆਲਾ ਤੋਂ ਰਿਟਾਇਰ ਹੋਏ ਜਸਬੀਰ ਸਿੰਘ ਦਾ ਪੁੱਤਰ ਸੀ। ਵਧੀਆ ਭਵਿੱਖ ਦੀ ਖ਼ਾਤਰ ਉਹ ਕੈਨੇਡਾ ਗਿਆ ਸੀ। ਉਸ ਦਾ ਵਿਆਹ ਸਿਰਫ਼ ਪੰਜ ਮਹੀਨੇ ਪਹਿਲਾਂ, 12 ਮਾਰਚ 2025 ਨੂੰ ਮੋਰਿੰਡਾ ਵਿੱਚ ਹੋਇਆ ਸੀ।
ਰੱਖੜੀ ਤੋਂ ਇੱਕ ਦਿਨ ਪਹਿਲਾਂ ਉਸ ਦੀ ਪਤਨੀ, ਉਸ ਦੀ ਭੈਣ ਕੋਲ ਰਹਿਣ ਲਈ ਗਈ ਹੋਈ ਸੀ। ਹੈਰੀ ਨੇ ਕਿਹਾ ਸੀ ਕਿ ਉਹ ਰੱਖੜੀ ਵਾਲੇ ਦਿਨ ਆਪਣੀ ਭੈਣ ਤੋਂ ਰੱਖੜੀ ਬਨਵਾਉਣ ਆਵੇਗਾ ਅਤੇ ਪਤਨੀ ਨੂੰ ਵੀ ਨਾਲ ਲੈ ਜਾਵੇਗਾ, ਪਰ ਉਸ ਤੋਂ ਪਹਿਲਾਂ ਹੀ ਇਹ ਹਾਦਸਾ ਹੋ ਗਿਆ ਅਤੇ ਉਸ ਦੀ ਜ਼ਿੰਦਗੀ ਅਚਾਨਕ ਖ਼ਤਮ ਹੋ ਗਈ।
