ਪਾਕਿਸਤਾਨ ‘ਚ ਮਾਨਸੂਨੀ ਤਬਾਹੀ, ਦੋ ਦਿਨਾਂ ‘ਚ 321 ਮੌਤਾਂ — ਕਈ ਜ਼ਿਲ੍ਹੇ ਹਾਈ ਅਲਰਟ ਤੇ…..

ਸਭ ਤੋਂ ਵੱਧ ਤਬਾਹੀ ਖੈਬਰ ਪਖ਼ਤੂਨਖ਼ਵਾ ‘ਚ

ਸਭ ਤੋਂ ਵੱਧ ਮੌਤਾਂ ਖੈਬਰ ਪਖ਼ਤੂਨਖ਼ਵਾ ਸੂਬੇ ਤੋਂ ਸਾਹਮਣੇ ਆਈਆਂ ਹਨ, ਜਿੱਥੇ 307 ਲੋਕਾਂ ਦੀ ਜਾਨ ਗਈ ਹੈ। ਪਹਾੜੀ ਇਲਾਕਿਆਂ ਵਿੱਚ ਅਚਾਨਕ ਆਏ ਬਾੜ੍ਹ ਅਤੇ ਘਰਾਂ ਦੇ ਡਿੱਗਣ ਨਾਲ ਹਾਲਾਤ ਹੋਰ ਵੀ ਖਰਾਬ ਹੋਏ ਹਨ। ਇਸ ਤੋਂ ਇਲਾਵਾ, ਪਾਕਿਸਤਾਨ ਪ੍ਰਸ਼ਾਸਿਤ ਕਸ਼ਮੀਰ ਵਿੱਚ 9 ਤੇ ਗਿਲਗਿਤ-ਬਲਤਿਸਤਾਨ ਵਿੱਚ 5 ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ। ਘੱਟੋ-ਘੱਟ 21 ਹੋਰ ਲੋਕ ਜ਼ਖਮੀ ਵੀ ਹੋਏ ਹਨ।

ਭਾਰੀ ਮੀਂਹ ਦੀ ਨਵੀਂ ਚੇਤਾਵਨੀ

ਪਾਕਿਸਤਾਨ ਮੌਸਮ ਵਿਭਾਗ ਨੇ ਉੱਤਰੀ-ਪੱਛਮੀ ਇਲਾਕਿਆਂ ਲਈ ਨਵੀਂ ਭਾਰੀ ਮੀਂਹ ਦੀ ਚੇਤਾਵਨੀ ਜਾਰੀ ਕੀਤੀ ਹੈ ਅਤੇ ਲੋਕਾਂ ਨੂੰ ਸਾਵਧਾਨੀਆਂ ਬਰਤਣ ਲਈ ਕਿਹਾ ਹੈ। ਅਧਿਕਾਰੀਆਂ ਨੇ ਛੇ ਜ਼ਿਲ੍ਹਿਆਂ — ਬੂਨੇਰ, ਬਜੌਰ, ਸਵਾਤ, ਸ਼ੰਗਲਾ, ਮਨਸੇਹਰਾ ਅਤੇ ਬੱਟਗ੍ਰਾਮ — ਨੂੰ ਆਫ਼ਤ-ਜ਼ੋਨ ਘੋਸ਼ਿਤ ਕਰ ਦਿੱਤਾ ਹੈ।

ਰਾਹਤ ਕਾਰਜਾਂ ਵਿੱਚ ਮੁਸ਼ਕਲਾਂ

ਲਗਭਗ 2,000 ਰਾਹਤ ਕਰਮਚਾਰੀ ਪ੍ਰਭਾਵਿਤ ਇਲਾਕਿਆਂ ਵਿੱਚ ਮਦਦ ਦੇ ਕੰਮ ‘ਚ ਜੁਟੇ ਹੋਏ ਹਨ, ਪਰ ਮੌਸਮ ਅਤੇ ਹਾਲਾਤ ਕਾਰਨ ਕਾਰਵਾਈ ਸੁਸਤ ਹੋ ਰਹੀ ਹੈ। ਖੈਬਰ ਪਖ਼ਤੂਨਖ਼ਵਾ ਦੀ ਰੈਸਕਿਊ ਏਜੰਸੀ ਦੇ ਬੁਲਾਰੇ ਬਿਲਾਲ ਅਹਿਮਦ ਫ਼ੈਜ਼ੀ ਨੇ ਕਿਹਾ, “ਲਗਾਤਾਰ ਮੀਂਹ, ਭੂਸਖ਼ਲਨ ਅਤੇ ਟੁੱਟੀਆਂ ਸੜਕਾਂ ਕਾਰਨ ਰਾਹਤ ਟੀਮਾਂ ਲਈ ਪਹੁੰਚ ਬਹੁਤ ਔਖੀ ਹੋ ਰਹੀ ਹੈ। ਭਾਰੀ ਮਸ਼ੀਨਰੀ ਅਤੇ ਐਂਬੂਲੈਂਸਾਂ ਦੂਰ-ਦਰਾਜ਼ ਇਲਾਕਿਆਂ ਤੱਕ ਨਹੀਂ ਪਹੁੰਚ ਸਕਦੀਆਂ, ਇਸ ਲਈ ਸਾਡੇ ਕਰਮਚਾਰੀ ਪੈਦਲ ਹੀ ਜਾ ਰਹੇ ਹਨ।”

ਲੋਕ ਛੱਡਣ ਨੂੰ ਤਿਆਰ ਨਹੀਂ

ਬਚਾਵ ਅਪੀਲਾਂ ਦੇ ਬਾਵਜੂਦ, ਕਈ ਰਹਿਣ ਵਾਲੇ ਆਪਣੀਆਂ ਥਾਵਾਂ ਛੱਡਣ ਨੂੰ ਤਿਆਰ ਨਹੀਂ ਹਨ। ਫ਼ੈਜ਼ੀ ਨੇ ਕਿਹਾ, “ਲੋਕਾਂ ਦੇ ਆਪਣੇ ਪਰਿਵਾਰਕ ਮੈਂਬਰ ਗਾਇਬ ਹਨ ਜਾਂ ਮਲਬੇ ਹੇਠ ਦੱਬੇ ਹੋਏ ਹਨ, ਇਸ ਲਈ ਉਹ ਘਰ ਛੱਡ ਕੇ ਜਾਣਾ ਨਹੀਂ ਚਾਹੁੰਦੇ।”

ਪੈਮਾਨਾ ਵਧਣ ਕਾਰਨ ਅਧਿਕਾਰੀਆਂ ਨੂੰ ਡਰ ਹੈ ਕਿ ਜੇਕਰ ਮੌਸਮ ਵਿੱਚ ਸੁਧਾਰ ਨਾ ਆਇਆ ਤੇ ਅਗਲੇ ਕੁਝ ਦਿਨਾਂ ਵਿੱਚ ਮੌਤਾਂ ਦੀ ਗਿਣਤੀ ਹੋਰ ਵਧ ਸਕਦੀ ਹੈ।