ਅਮਰੀਕਾ :- ਅਮਰੀਕਾ ਦੇ ਟੈਕਸਾਸ ਸੂਬੇ ‘ਚ ਗੈਲਵੈਸਟਨ ਨੇੜੇ ਸੋਮਵਾਰ ਦੁਪਹਿਰ ਉਸ ਵੇਲੇ ਹੜਕੰਪ ਮਚ ਗਿਆ, ਜਦੋਂ ਮੈਕਸੀਕਨ ਨੇਵੀ ਦਾ ਇੱਕ ਛੋਟਾ ਜਹਾਜ਼ ਅਚਾਨਕ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਸਮੁੰਦਰੀ ਖੇਤਰ ਵਿੱਚ ਵਾਪਰੇ ਇਸ ਹਾਦਸੇ ਵਿੱਚ ਘੱਟੋ-ਘੱਟ ਪੰਜ ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋ ਚੁੱਕੀ ਹੈ, ਜਦਕਿ ਹੋਰਾਂ ਦੀ ਭਾਲ ਲਈ ਤੱਟੀ ਇਲਾਕੇ ‘ਚ ਵੱਡੇ ਪੱਧਰ ‘ਤੇ ਸਰਚ ਆਪਰੇਸ਼ਨ ਚਲਾਇਆ ਜਾ ਰਿਹਾ ਹੈ।
ਜਹਾਜ਼ ‘ਚ ਮੈਡੀਕਲ ਮਿਸ਼ਨ ਨਾਲ ਜੁੜੇ ਲੋਕ ਸਨ ਸਵਾਰ
ਪ੍ਰਾਰੰਭਿਕ ਜਾਣਕਾਰੀ ਮੁਤਾਬਕ, ਹਾਦਸੇ ਦਾ ਸ਼ਿਕਾਰ ਹੋਇਆ ਜਹਾਜ਼ ਇੱਕ ਮੈਡੀਕਲ ਸਹਾਇਤਾ ਮਿਸ਼ਨ ਦੌਰਾਨ ਉਡਾਨ ‘ਤੇ ਸੀ। ਜਹਾਜ਼ ਵਿੱਚ ਕੁੱਲ ਅੱਠ ਵਿਅਕਤੀ ਸਵਾਰ ਸਨ, ਜਿਨ੍ਹਾਂ ਵਿੱਚ ਇੱਕ ਮਰੀਜ਼ ਅਤੇ ਉਸ ਨਾਲ ਜੁੜੇ ਹੋਰ ਲੋਕ ਸ਼ਾਮਲ ਸਨ।
ਮੈਕਸੀਕਨ ਨੇਵੀ ਦਾ ਬਿਆਨ
ਮੈਕਸੀਕਨ ਜਲ ਸੈਨਾ ਵੱਲੋਂ ਜਾਰੀ ਬਿਆਨ ਅਨੁਸਾਰ ਜਹਾਜ਼ ਵਿੱਚ ਚਾਰ ਨੇਵੀ ਅਧਿਕਾਰੀ ਅਤੇ ਚਾਰ ਆਮ ਨਾਗਰਿਕ ਮੌਜੂਦ ਸਨ। ਆਮ ਨਾਗਰਿਕਾਂ ਵਿੱਚ ਇੱਕ ਬੱਚਾ ਵੀ ਸ਼ਾਮਲ ਸੀ। ਅਧਿਕਾਰੀਆਂ ਨੇ ਹਾਲੇ ਤੱਕ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਮ੍ਰਿਤਕਾਂ ਵਿੱਚ ਕੌਣ-ਕੌਣ ਸ਼ਾਮਲ ਹੈ।
ਗੈਰ-ਮੁਨਾਫ਼ਾ ਸੰਸਥਾ ਦੇ ਮੈਂਬਰ ਵੀ ਸਨ ਮੌਜੂਦ
ਜਹਾਜ਼ ‘ਚ ਸਵਾਰ ਦੋ ਵਿਅਕਤੀ ਮਿਚੂ ਅਤੇ ਮਾਉਈ ਫਾਊਂਡੇਸ਼ਨ ਨਾਲ ਸੰਬੰਧਤ ਦੱਸੇ ਜਾ ਰਹੇ ਹਨ। ਇਹ ਸੰਸਥਾ ਗੰਭੀਰ ਤੌਰ ‘ਤੇ ਸੜਨ ਦਾ ਸ਼ਿਕਾਰ ਹੋਏ ਮੈਕਸੀਕਨ ਬੱਚਿਆਂ ਨੂੰ ਇਲਾਜ ਅਤੇ ਸਹਾਇਤਾ ਮੁਹੱਈਆ ਕਰਵਾਉਂਦੀ ਹੈ।
ਅਮਰੀਕੀ ਤੱਟ ਰੱਖਿਅਕ ਵੱਲੋਂ ਮੌਤਾਂ ਦੀ ਪੁਸ਼ਟੀ
ਅਮਰੀਕੀ ਕੋਸਟ ਗਾਰਡ ਨੇ ਹਾਦਸੇ ਵਿੱਚ ਪੰਜ ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਕਰਦੇ ਹੋਏ ਦੱਸਿਆ ਕਿ ਬਾਕੀ ਲੋਕਾਂ ਦੀ ਭਾਲ ਜਾਰੀ ਹੈ। ਨਾਲ ਹੀ ਹਾਦਸੇ ਦੇ ਅਸਲ ਕਾਰਨਾਂ ਦੀ ਜਾਂਚ ਵੀ ਸ਼ੁਰੂ ਕਰ ਦਿੱਤੀ ਗਈ ਹੈ।
ਰਾਹਤ ਅਤੇ ਜਾਂਚ ਲਈ ਵੱਡਾ ਜਥਾ ਮੌਕੇ ‘ਤੇ ਤੈਨਾਤ
ਗੈਲਵੈਸਟਨ ਕਾਉਂਟੀ ਸ਼ੈਰਿਫ਼ ਦਫ਼ਤਰ ਮੁਤਾਬਕ ਮੌਕੇ ‘ਤੇ ਗੋਤਾਖੋਰ ਟੀਮਾਂ, ਅਪਰਾਧ ਜਾਂਚ ਯੂਨਿਟ, ਡਰੋਨ ਦਸਤੇ ਅਤੇ ਗਸ਼ਤੀ ਅਧਿਕਾਰੀ ਤੈਨਾਤ ਕੀਤੇ ਗਏ ਹਨ। ਸਾਰਾ ਖੇਤਰ ਸੀਲ ਕਰਕੇ ਰਾਹਤ ਅਤੇ ਖੋਜ ਕਾਰਵਾਈ ਚਲਾਈ ਜਾ ਰਹੀ ਹੈ।
ਮੌਸਮ ਭੂਮਿਕਾ ‘ਤੇ ਵੀ ਸ਼ੱਕ
ਹਾਲਾਂਕਿ ਹਾਦਸੇ ਦੇ ਕਾਰਨ ਬਾਰੇ ਹਾਲੇ ਤੱਕ ਕੋਈ ਪੱਕੀ ਜਾਣਕਾਰੀ ਸਾਹਮਣੇ ਨਹੀਂ ਆਈ, ਪਰ ਮੌਸਮ ਵਿਭਾਗ ਅਨੁਸਾਰ ਪਿਛਲੇ ਕੁਝ ਦਿਨਾਂ ਤੋਂ ਗੈਲਵੈਸਟਨ ਖੇਤਰ ‘ਚ ਸੰਘਣੀ ਧੁੰਦ ਦੀ ਸਥਿਤੀ ਬਣੀ ਹੋਈ ਸੀ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਘੱਟ ਦਿੱਖ ਵੀ ਹਾਦਸੇ ਦਾ ਇੱਕ ਕਾਰਨ ਹੋ ਸਕਦੀ ਹੈ।
ਜਾਂਚ ਜਾਰੀ, ਪਰਿਵਾਰਾਂ ‘ਚ ਸੋਗ ਦਾ ਮਾਹੌਲ
ਹਾਦਸੇ ਤੋਂ ਬਾਅਦ ਮੈਕਸੀਕੋ ਅਤੇ ਅਮਰੀਕਾ ਦੋਵਾਂ ਵਿੱਚ ਮ੍ਰਿਤਕਾਂ ਦੇ ਪਰਿਵਾਰਾਂ ‘ਚ ਸੋਗ ਦੀ ਲਹਿਰ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਾਂਚ ਪੂਰੀ ਹੋਣ ਤੋਂ ਬਾਅਦ ਹੀ ਹਾਦਸੇ ਦੀ ਅਸਲ ਵਜ੍ਹਾ ਸਪੱਸ਼ਟ ਹੋ ਸਕੇਗੀ।
