ਚੰਡੀਗੜ੍ਹ :- ਪੰਜਾਬ ਵਿੱਚ ਜ਼ਿਲ੍ਹਾ ਪਰਿਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਲਈ ਅੱਜ 17 ਦਸੰਬਰ ਨੂੰ ਵੋਟਾਂ ਦੀ ਗਿਣਤੀ ਦੀ ਪ੍ਰਕਿਰਿਆ ਸ਼ੁਰੂ ਹੋ ਗਈ ਹੈ। ਸਵੇਰੇ ਤੋਂ ਹੀ ਵੱਖ-ਵੱਖ ਕਾਊਂਟਿੰਗ ਸੈਂਟਰਾਂ ‘ਤੇ ਬੈਲੇਟ ਪੇਪਰ ਖੋਲ੍ਹਣ ਦਾ ਕੰਮ ਜਾਰੀ ਹੈ, ਜਿੱਥੇ ਉਮੀਦਵਾਰਾਂ ਦੇ ਨਾਲ-ਨਾਲ ਪਾਰਟੀਆਂ ਦੀ ਧੜਕਣ ਵੀ ਤੇਜ਼ ਹੋਈ ਹੋਈ ਹੈ।
23 ਜ਼ਿਲ੍ਹਿਆਂ ‘ਚ 151 ਕਾਊਂਟਿੰਗ ਸੈਂਟਰ, ਸਖ਼ਤ ਸੁਰੱਖਿਆ ਪ੍ਰਬੰਧ
ਚੋਣ ਆਯੋਗ ਵੱਲੋਂ ਸੂਬੇ ਦੇ 23 ਜ਼ਿਲ੍ਹਿਆਂ ਵਿੱਚ ਕੁੱਲ 151 ਕਾਊਂਟਿੰਗ ਸੈਂਟਰ ਸਥਾਪਿਤ ਕੀਤੇ ਗਏ ਹਨ। ਵੋਟਾਂ ਦੀ ਗਿਣਤੀ ਨੂੰ ਲੈ ਕੇ ਪ੍ਰਸ਼ਾਸਨ ਨੇ ਹਰ ਕੇਂਦਰ ‘ਤੇ ਪੁਖ਼ਤਾ ਸੁਰੱਖਿਆ ਪ੍ਰਬੰਧ ਕੀਤੇ ਹਨ। ਇਸ ਚੋਣੀ ਪ੍ਰਕਿਰਿਆ ਰਾਹੀਂ 12 ਹਜ਼ਾਰ 814 ਉਮੀਦਵਾਰਾਂ ਦੀ ਕਿਸਮਤ ਦਾ ਫੈਸਲਾ ਹੋਣਾ ਹੈ।
ਮੁੱਲਾਪੁਰ ਦਾਖਾ ਕਾਊਂਟਿੰਗ ਸੈਂਟਰ ‘ਚ ਹੰਗਾਮਾ
ਲੁਧਿਆਣਾ ਦੇ ਮੁੱਲਾਪੁਰ ਦਾਖਾ ਸਥਿਤ ਕਾਊਂਟਿੰਗ ਸੈਂਟਰ ‘ਤੇ ਗਿਣਤੀ ਦੌਰਾਨ ਉਸ ਵੇਲੇ ਹੰਗਾਮੇ ਦੀ ਸਥਿਤੀ ਬਣ ਗਈ, ਜਦੋਂ ਕੁਝ ਉਮੀਦਵਾਰਾਂ ਅਤੇ ਉਨ੍ਹਾਂ ਦੇ ਸਮਰਥਕਾਂ ਵੱਲੋਂ ਇਤਰਾਜ਼ ਜਤਾਇਆ ਗਿਆ। ਮੌਕੇ ‘ਤੇ ਮੌਜੂਦ ਪ੍ਰਸ਼ਾਸਨ ਅਤੇ ਪੁਲਿਸ ਅਧਿਕਾਰੀਆਂ ਨੇ ਹਾਲਾਤਾਂ ਨੂੰ ਕਾਬੂ ‘ਚ ਰੱਖਦਿਆਂ ਗਿਣਤੀ ਦਾ ਕੰਮ ਜਾਰੀ ਰੱਖਿਆ।
14 ਦਸੰਬਰ ਨੂੰ ਹੋਇਆ ਸੀ ਮਤਦਾਨ, 48 ਫੀਸਦੀ ਰਹੀ ਵੋਟਿੰਗ
ਜ਼ਿਲ੍ਹਾ ਪਰਿਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਲਈ 14 ਦਸੰਬਰ ਨੂੰ ਸੂਬੇ ਭਰ ਵਿੱਚ ਮਤਦਾਨ ਕਰਵਾਇਆ ਗਿਆ ਸੀ। ਇਹ ਚੋਣਾਂ ਸਾਰੀਆਂ ਸਿਆਸੀ ਪਾਰਟੀਆਂ ਵੱਲੋਂ ਆਪਣੇ-ਆਪਣੇ ਚੁਣਾਵੀ ਨਿਸ਼ਾਨਾਂ ‘ਤੇ ਲੜੀਆਂ ਗਈਆਂ। ਚੋਣਾਂ ਦੌਰਾਨ ਕੁੱਲ ਕਰੀਬ 48 ਫੀਸਦੀ ਮਤਦਾਨ ਦਰਜ ਕੀਤਾ ਗਿਆ।
16 ਬੂਥਾਂ ‘ਤੇ ਰੱਦ ਹੋਈ ਸੀ ਵੋਟਿੰਗ, ਦੁਬਾਰਾ ਪਈਆਂ ਵੋਟਾਂ
ਚੋਣੀ ਪ੍ਰਕਿਰਿਆ ਦੌਰਾਨ 5 ਜ਼ਿਲ੍ਹਿਆਂ ਦੇ 16 ਬੂਥਾਂ ‘ਤੇ ਮਤਦਾਨ ਰੱਦ ਕਰਨਾ ਪਿਆ ਸੀ। ਕੁਝ ਥਾਵਾਂ ‘ਤੇ ਬੂਥ ਕੈਪਚਰਿੰਗ ਅਤੇ ਬੈਲੇਟ ਪ੍ਰਿੰਟਿੰਗ ਨਾਲ ਜੁੜੀਆਂ ਖਾਮੀਆਂ ਸਾਹਮਣੇ ਆਈਆਂ ਸਨ, ਜਿਸ ਤੋਂ ਬਾਅਦ ਮਾਮਲਾ ਚੋਣ ਆਯੋਗ ਤੱਕ ਪਹੁੰਚਿਆ। ਆਯੋਗ ਦੇ ਹੁਕਮਾਂ ਅਨੁਸਾਰ ਇਨ੍ਹਾਂ ਬੂਥਾਂ ‘ਤੇ 16 ਦਸੰਬਰ ਨੂੰ ਦੁਬਾਰਾ ਵੋਟਿੰਗ ਕਰਵਾਈ ਗਈ।
ਨਤੀਜਿਆਂ ‘ਤੇ ਸਿਆਸੀ ਨਜ਼ਰਾਂ ਟਿਕੀਆਂ
ਜ਼ਿਲ੍ਹਾ ਪਰਿਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਦੇ ਨਤੀਜਿਆਂ ਨੂੰ ਸੂਬੇ ਦੀ ਸਿਆਸਤ ਲਈ ਅਹਿਮ ਮੰਨਿਆ ਜਾ ਰਿਹਾ ਹੈ। ਸਿਆਸੀ ਮਾਹਿਰਾਂ ਅਨੁਸਾਰ ਇਹ ਨਤੀਜੇ ਆਉਣ ਵਾਲੇ ਸਮੇਂ ਵਿੱਚ ਪਾਰਟੀਆਂ ਦੀ ਜ਼ਮੀਨੀ ਹਾਲਤ ਅਤੇ ਲੋਕੀ ਮੂਡ ਦੀ ਝਲਕ ਪੇਸ਼ ਕਰਨਗੇ। ਗਿਣਤੀ ਪੂਰੀ ਹੋਣ ਮਗਰੋਂ ਨਤੀਜੇ ਜਲਦ ਐਲਾਨੇ ਜਾਣ ਦੀ ਸੰਭਾਵਨਾ ਹੈ।
