ਅੰਮ੍ਰਿਤਸਰ :- ਗੁਰੂ ਨਗਰੀ ਵਿਚ ਅੱਜ 24 ਘੰਟਿਆਂ ਦੇ ਅੰਦਰ ਅੰਦਰ ਲਗਾਤਾਰ ਤਿੰਨ ਵਾਰਦਾਤਾਂ ਹੋਈਆਂ ਹਨ, ਜਿਸ ਵਿਚ ਤਿੰਨਾ ਵਾਰਦਾਤਾਂ ਦੌਰਾਨ ਗੋਲੀਆਂ ਚਲਾਈਆਂ ਗਈਆਂ ਤੇ ਮੋਤਾਂ ਵੀ ਹੋਈਆਂ, ਜੋ ਪੁਲਸ ਪ੍ਰਸ਼ਾਸਨ ਦੇ ਮੂੰਹ ਤੇ ਸਿੱਧੀ ਸਿੱਧੀ ਚਪੇੜ ਹੈ।
ਬੱਸ ਸਟੈਂਡ ਦੇ ਗੋਲੀਬਾਰੀ
ਅੰਮ੍ਰਿਤਸਰ ਦੇ ਕੇਂਦਰੀ ਬੱਸ ਅੱਡੇ ’ਚ ਮੰਗਲਵਾਰ ਨੂੰ ਹੜਬੜਾਹਟ ਉਸ ਵੇਲੇ ਮਚ ਗਈ ਜਦੋਂ ਇਕ ਕਰਮਚਾਰੀ ਵਿਵਾਦ ਨੇ ਖੂਨੀ ਰੂਪ ਧਾਰ ਲਿਆ। ਡਿਊਟੀ ਦੌਰਾਨ ਟਰਾਂਸਪੋਰਟ ਅਧਿਕਾਰੀ ’ਤੇ ਚੱਲੀਆਂ ਗੋਲੀਆਂ ਨੇ ਮੌਕੇ ’ਤੇ ਹੀ ਉਸਦੀ ਜਾਨ ਲੈ ਲਈ, ਜਦਕਿ ਦੂਜੇ ਕਰਮਚਾਰੀ ਨੂੰ ਚਾਰ ਗੋਲੀਆਂ ਲੱਗਣ ਕਾਰਨ ਗੰਭੀਰ ਜ਼ਖ਼ਮੀ ਹਾਲਤ ਵਿੱਚ ਹਸਪਤਾਲ ਪਹੁੰਚਾਇਆ ਗਿਆ। ਪੁਲਿਸ ਨੂੰ ਮੌਕੇ ਤੋਂ ਛੇ ਖੋਲ ਮਿਲੇ ਹਨ। ਸ਼ੁਰੂਆਤੀ ਜਾਂਚ ’ਚ ਸਾਹਮਣੇ ਆਇਆ ਕਿ ਝਗੜਾ ਯਾਤਰੀਆਂ ਨੂੰ ਪਹਿਲਾਂ ਚੁੱਕਣ ’ਤੇ ਹੋਇਆ। ਗੋਲੀਬਾਰੀ ਤੋਂ ਬਾਅਦ ਦੋਸ਼ੀ ਥਾਂ ਤੋਂ ਫਰਾਰ ਹੋ ਗਿਆ।
ਛੇਹਰਟਾ ਸਾਹਿਬ – ਸਕੂਲ ਛੱਡ ਕੇ ਆ ਰਿਹਾ ਵਿਅਕਤੀ ਕਤਲ
ਪੁਲਿਸ ਥਾਣਾ ਛੇਹਰਟਾ ਦੇ ਇਲਾਕੇ ’ਚ ਵੀ ਦਿਨਦਿਹਾੜੇ ਖੂਨ ਵਗਿਆ। 40 ਸਾਲਾ ਵਰਿੰਦਰ ਸਿੰਘ, ਜੋ ਆਪਣੇ ਬੱਚਿਆਂ ਨੂੰ ਸਕੂਲ ਛੱਡ ਕੇ ਘਰ ਵੱਲ ਆ ਰਿਹਾ ਸੀ, ਪਿਛੋਂ ਆ ਰਹੇ ਦੋ ਮੋਟਰਸਾਈਕਲ ਸਵਾਰਾਂ ਨੇ ਉਸਨੂੰ ਨਿਸ਼ਾਨਾ ਬਣਾ ਲਿੱਤਾ। ਗੋਲੀ ਗਰਦਨ ਵਿਚ ਲੱਗਣ ਨਾਲ ਉਹ ਜ਼ਖ਼ਮੀ ਹੋ ਕੇ ਡਿੱਗ ਪਿਆ। ਪਰਿਵਾਰ ਵੱਲੋਂ ਤੁਰੰਤ ਹਸਪਤਾਲ ਲਿਜਾਣ ਦੇ ਬਾਵਜੂਦ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ।
ਦਬੁਰਜੀ – ਕਾਰ ਸਵਾਰ ਡਾਕਟਰ ’ਤੇ ਫਾਇਰਿੰਗ, ਗਰਦਨ ’ਚ ਗੋਲੀ
ਜਿਲ੍ਹੇ ’ਚ ਤੀਜਾ ਮਾਮਲਾ ਦਬੁਰਜੀ ਇਲਾਕੇ ਤੋਂ ਸਾਹਮਣੇ ਆਇਆ, ਜਿੱਥੇ ਕਾਰ ਰਾਹੀਂ ਜਾ ਰਹੇ ਇਕ ਡਾਕਟਰ ’ਤੇ ਦੋ ਅਣਪਛਾਤੇ ਹਮਲਾਵਰਾਂ ਨੇ ਗੋਲੀਆਂ ਚਲਾ ਦਿੱਤੀਆਂ। ਗਰਦਨ ’ਚ ਗੋਲੀ ਲੱਗਣ ਨਾਲ ਉਹ ਗੰਭੀਰ ਜ਼ਖ਼ਮੀ ਹੋਇਆ ਅਤੇ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ। ਪੁਲਿਸ ਫੁਟੇਜ ਖੰਗਾਲ ਕੇ ਹਮਲਾਵਰਾਂ ਦੇ ਨਿਸ਼ਾਨੇ ਅਤੇ ਮਕਸਦ ਦੀ ਜਾਂਚ ਕਰ ਰਹੀ ਹੈ।
ਲਗਾਤਾਰ ਵੱਧ ਰਹੀਆਂ ਗੋਲੀਬਾਰੀ ਦੀਆਂ ਘਟਨਾਵਾਂ—ਪੁਲਿਸ ਪ੍ਰਸ਼ਾਸਨ ’ਤੇ ਸਵਾਲ
ਤਿੰਨ ਖੂਨੀ ਵਾਰਦਾਤਾਂ ਨੇ ਗੁਰੂ ਨਗਰੀ ਦੀ ਸੁਰੱਖਿਆ ਪ੍ਰਣਾਲੀ ’ਤੇ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਜਿੱਥੇ ਸਰਕਾਰ ਤੇ ਪੁਲਿਸ ਵੱਲੋਂ ਸੁਰੱਖਿਆ ਦੇ ਦਾਅਵੇ ਕੀਤੇ ਜਾ ਰਹੇ ਹਨ, ਉੱਥੇ ਸ਼ਹਿਰ ’ਚ ਇੱਕੇ ਦਿਨ ਵਿਚ ਤਿੰਨ ਗੋਲੀਬਾਰੀ ਦੀਆਂ ਘਟਨਾਵਾਂ ਚਿੰਤਾ ਵਧਾਉਣ ਵਾਲੀਆਂ ਹਨ। ਪ੍ਰਸ਼ਾਸਨ ਦੀ ਕਾਰਗੁਜ਼ਾਰੀ ਹੁਣ ਲੋਕਾਂ ਦੀ ਨਿਗਰਾਨੀ ਹੇਠ ਹੈ।
