ਜਲੰਧਰ :- ਜਲੰਧਰ ਦੇ ਪਾਰਸ ਐਸਟੇਟ ‘ਚ 13 ਸਾਲਾਂ ਨਾਬਾਲਗ ਲੜਕੀ ਦੇ ਦੁਰਵਿਵਹਾਰ ਅਤੇ ਕਤਲ ਦੇ ਮਾਮਲੇ ਨੇ ਸ਼ਹਿਰ ਨੂੰ ਹਿਲਾ ਦਿੱਤਾ ਹੈ। ਹੁਣ ਪੋਸਟਮਾਰਟਮ ਰਿਪੋਰਟ ਸਾਹਮਣੇ ਆਉਣ ਨਾਲ ਘਟਨਾ ਦੇ ਨਵੇਂ ਤੇ ਖ਼ੌਫਨਾਕ ਤੱਥ ਸਾਹਮਣੇ ਆਏ ਹਨ। ਰਿਪੋਰਟ ਮੁਤਾਬਕ ਬੱਚੀ ਦੀ ਮੌਤ ਗਲਾ ਘੁੱਟੇ ਜਾਣ ਕਾਰਨ ਹੋਈ। ਉਸ ਦੇ ਗਲੇ ‘ਤੇ ਡੂੰਘੇ ਜ਼ਖ਼ਮਾਂ ਦੇ ਨਿਸ਼ਾਨ ਮਿਲੇ ਹਨ, ਜੋ ਇਹ ਦਰਸਾਉਂਦੇ ਹਨ ਕਿ ਉਸਨੂੰ ਬੇਰਹਿਮੀ ਨਾਲ ਦਬੋਚਿਆ ਗਿਆ। ਸਰੀਰ ‘ਤੇ ਨੂੰਹਾਂ ਅਤੇ ਖਰੋਚਾਂ ਦੇ ਕਈ ਨਿਸ਼ਾਨ ਵੀ ਮਿਲੇ ਹਨ, ਜੋ ਸੰਘਰਸ਼ ਜਾਂ ਜ਼ਬਰਦਸਤੀ ਦਾ ਇਸ਼ਾਰਾ ਕਰਦੇ ਹਨ। ਪੋਸਟਮਾਰਟਮ ਦੌਰਾਨ ਲਏ ਗਏ ਸਵੈਬ ਅਤੇ ਮੁਲਜ਼ਮ ਦਾ ਬਲੱਡ ਸੈਂਪਲ ਹੁਣ ਡੀਐਨਏ ਜਾਂਚ ਲਈ ਫੋਰੈਂਸਿਕ ਲੈਬ ਭੇਜੇ ਗਏ ਹਨ।
ਮੁਲਜ਼ਮ ਦਾ ਮੋਬਾਇਲ ਫ਼ੋਨ ਗਾਇਬ, ਪੁਲਿਸ ਲਈ ਵੱਡੀ ਚੁਣੌਤੀ
ਪੁਲਿਸ ਲਈ ਇੱਕ ਹੋਰ ਮੁਸ਼ਕਲ ਮੁਲਜ਼ਮ ਹਰਮਿੰਦਰ ਸਿੰਘ ਉਰਫ਼ ਰਿੰਪੀ ਦਾ ਮੋਬਾਇਲ ਫ਼ੋਨ ਹੈ, ਜੋ ਅਜੇ ਤੱਕ ਛਪਾ ਹੋਇਆ ਹੈ। ਜਾਂਚ ਅਧਿਕਾਰੀਆਂ ਦਾ ਅੰਦਾਜ਼ਾ ਹੈ ਕਿ ਜਦੋਂ ਗੁੱਸੇ ਵਿੱਚ ਭੀੜ ਨੇ ਰਿੰਪੀ ਦੀ ਕੁੱਟਮਾਰ ਕੀਤੀ, ਤਦ ਮੋਬਾਇਲ ਕਿਸੇ ਨੇ ਚੁੱਕ ਲਿਆ। ਫ਼ੋਨ ਉਸੇ ਦਿਨ ਤੋਂ ਸਵੀਚ ਆਫ਼ ਹੈ। ਪੁਲਿਸ ਇਸਨੂੰ ਟਰੇਸ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿਉਂਕਿ ਇਸ ਵਿੱਚ ਮਾਮਲੇ ਨਾਲ ਜੁੜੇ ਅਹਿਮ ਸਬੂਤ ਹੋ ਸਕਦੇ ਹਨ।
ਮੁਲਜ਼ਮ ਨੂੰ 9 ਦਿਨਾਂ ਰਿਮਾਂਡ
ਬੁੱਧਵਾਰ ਨੂੰ ਜਲੰਧਰ ਕਮਿਸ਼ਨਰੇਟ ਪੁਲਿਸ ਨੇ ਮੁਲਜ਼ਮ ਹਰਮਿੰਦਰ ਸਿੰਘ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ, ਜਿੱਥੇ ਅਦਾਲਤ ਨੇ ਉਸਨੂੰ 9 ਦਿਨਾਂ ਦੇ ਪੁਲਿਸ ਰਿਮਾਂਡ ‘ਤੇ ਭੇਜਣ ਦੇ ਹੁਕਮ ਦਿੱਤੇ। ਪੁਲਿਸ ਨੇ 10 ਦਿਨਾਂ ਦੇ ਰਿਮਾਂਡ ਦੀ ਮੰਗ ਕੀਤੀ ਸੀ, ਪਰ ਅਦਾਲਤ ਨੇ 9 ਦਿਨਾਂ ਨੂੰ ਹੀ ਕਾਫ਼ੀ ਮੰਨਿਆ।
ਏਡੀਸੀਪੀ ਹਰਿੰਦਰ ਸਿੰਘ ਗਿੱਲ ਨੇ ਮੀਡੀਆ ਨਾਲ ਗੱਲਦਾਤੋਂ ਦੱਸਿਆ ਕਿ ਦੋਸ਼ੀ ਖ਼ਿਲਾਫ਼ ਪੋਕਸੋ ਐਕਟ ਸਮੇਤ ਕਈ ਗੰਭੀਰ ਧਾਰਾਵਾਂ ਹੇਠ ਮਾਮਲਾ ਦਰਜ ਕੀਤਾ ਗਿਆ ਹੈ। ਰਿਮਾਂਡ ਦੌਰਾਨ ਦੋਸ਼ੀ ਨਾਲ ਕਈ ਅਹਿਮ ਮੋੜਾਂ ‘ਤੇ ਪੁੱਛਗਿੱਛ ਹੋਵੇਗੀ। ਇਸਦੇ ਨਾਲ ਹੀ, ਮੁਅੱਤਲ ਏਐਸਆਈ ਮੰਗਤ ਰਾਮ ਦੀ ਭੂਮਿਕਾ ਦੀ ਜਾਂਚ ਵੀ ਜਾਰੀ ਹੈ।
ਲਾਪਰਵਾਹੀ ਦਾ ਗੰਭੀਰ ਨਤੀਜਾ – ਏਐਸਆਈ ਮੰਗਤ ਰਾਮ ਨੂੰ ਨੌਕਰੀ ਤੋਂ ਬਰਖਾਸਤ
ਘਟਨਾ ਤੋਂ ਬਾਅਦ ਲੋਕਾਂ ਦਾ ਗੁੱਸਾ ਲਗਾਤਾਰ ਵਧ ਰਿਹਾ ਹੈ। ਪਾਰਸ ਐਸਟੇਟ ਅਤੇ ਆਲੇ-ਦੁਆਲੇ ਦੇ ਇਲਾਕੇ ਵਿੱਚ ਰੋਸ਼ ਦਾ ਮਾਹੌਲ ਹੈ। ਇਸ ਦਬਾਅ ਅਤੇ ਮੂਲ ਜਾਂਚ ਦੇ ਆਧਾਰ ‘ਤੇ, ਪੁਲਿਸ ਵਿਭਾਗ ਨੇ ਵੱਡੀ ਕਾਰਵਾਈ ਕਰਦਿਆਂ ਏਐਸਆਈ ਮੰਗਤ ਰਾਮ ਨੂੰ ਨੌਕਰੀ ਤੋਂ ਬਰਖਾਸਤ ਕਰ ਦਿੱਤਾ ਹੈ।
ਪੁਲਿਸ ਕਮਿਸ਼ਨਰ ਧਨਪ੍ਰੀਤ ਕੌਰ ਨੇ ਪੁਸ਼ਟੀ ਕੀਤੀ ਕਿ ਮੋਕੇ ‘ਤੇ ਦੌੜ ਕੇ ਜਾਣ ਦੇ ਬਾਵਜੂਦ ਏਐਸਆਈ ਵੱਲੋਂ ਲਾਪਰਵਾਹੀ ਕੀਤੀ ਗਈ ਸੀ, ਅਤੇ ਪਰਿਵਾਰ ਦੀ ਸਪਸ਼ਟ ਮੰਗ ਵੀ ਸੀ ਕਿ ਉਸ ’ਤੇ ਸਖ਼ਤ ਕਾਰਵਾਈ ਹੋਵੇ। ਇਸ ਲਈ ਉਸਨੂੰ ਤੁਰੰਤ ਪ੍ਰਭਾਵ ਨਾਲ ਡਿਸਮਿਸ ਕਰ ਦਿੱਤਾ ਗਿਆ ਹੈ।
