ਨਵੀਂ ਦਿੱਲੀ :- ਅਮਰੀਕਾ ਦੇ ਟੈਕਸਾਸ ਰਾਜ ਦੇ ਡੱਲਾਸ ਸ਼ਹਿਰ ‘ਚ ਰਹਿੰਦੇ 50 ਸਾਲਾ ਭਾਰਤੀ ਮੋਟਲ ਮੈਨੇਜਰ ਚੰਦਰ ਮੌਲੀ ਨਾਗਮੱਲਈਆ ਦੀ ਉਸਦੀ ਪਤਨੀ ਅਤੇ ਪੁੱਤਰ ਦੇ ਸਾਹਮਣੇ ਕੁਹਾੜੀ ਨਾਲ ਹੱਤਿਆ ਕਰ ਦਿੱਤੀ ਗਈ। ਮ੍ਰਿਤਕ ਕਰਨਾਟਕ ਦਾ ਮੂਲ ਨਿਵਾਸੀ ਸੀ ਅਤੇ ਇਥੇ ਡੱਲਾਸ ਦੇ ਡਾਊਨਟਾਊਨ ਸੂਟਸ ਮੋਟਲ ਵਿੱਚ ਕੰਮ ਕਰ ਰਿਹਾ ਸੀ। ਇਹ ਦਿਲ ਦਹਲਾਉਣ ਵਾਲੀ ਘਟਨਾ ਬੁੱਧਵਾਰ 10 ਸਤੰਬਰ ਦੀ ਸਵੇਰ ਵਾਪਰੀ।
ਵਾਸ਼ਿੰਗ ਮਸ਼ੀਨ ਤੋਂ ਸ਼ੁਰੂ ਹੋਇਆ ਝਗੜਾ
ਡੱਲਾਸ ਪੁਲਿਸ ਦੇ ਮੁਤਾਬਕ, ਨਾਗਮੱਲਈਆ ਦਾ ਸਾਥੀ ਕਰਮਚਾਰੀ ਯੋਰਡਾਨਿਸ ਕੋਬੋਸ-ਮਾਰਟੀਨੇਜ਼ ਨਾਲ ਇੱਕ ਟੁੱਟੀ ਹੋਈ ਵਾਸ਼ਿੰਗ ਮਸ਼ੀਨ ਨੂੰ ਲੈ ਕੇ ਬਹਿਸ ਹੋਈ ਸੀ। ਬਹਿਸ ਦੌਰਾਨ ਗੱਲਬਾਤ ਵਧ ਗਈ ਅਤੇ ਕੋਬੋਸ-ਮਾਰਟੀਨੇਜ਼ ਗੁੱਸੇ ‘ਚ ਆ ਗਿਆ। ਉਸਨੇ ਨਾਗਮੱਲਈਆ ਨੂੰ ਕਿਸੇ ਹੋਰ ਰਾਹੀਂ ਆਪਣੇ ਹੁਕਮਾਂ ਦਾ ਅਨੁਵਾਦ ਕਰਨ ਲਈ ਕਹਿਣ ‘ਤੇ ਵੀ ਆਪੱਤੀ ਜਤਾਈ ਸੀ। ਸੀਸੀਟੀਵੀ ਫੁਟੇਜ ‘ਚ ਕੋਬੋਸ-ਮਾਰਟੀਨੇਜ਼ ਨੂੰ ਗੰਡਾਸਾ ਕੱਢ ਕੇ ਨਾਗਮੱਲਈਆ ‘ਤੇ ਹਮਲਾ ਕਰਦੇ ਹੋਏ ਦੇਖਿਆ ਗਿਆ।
ਭਾਰਤੀ ਕੌਂਸਲੇਟ ਨੇ ਪ੍ਰਗਟਾਇਆ ਦੁੱਖ
ਨਾਗਮੱਲਈਆ ਦੀ ਬੇਰਹਿਮੀ ਨਾਲ ਹੋਈ ਹੱਤਿਆ ‘ਤੇ ਅਮਰੀਕਾ ਵਿੱਚ ਭਾਰਤੀ ਕੌਂਸਲੇਟ ਵੱਲੋਂ ਗਹਿਰਾ ਸੋਗ ਪ੍ਰਗਟ ਕੀਤਾ ਗਿਆ ਹੈ। ਕੌਂਸਲੇਟ ਨੇ ਕਿਹਾ ਕਿ ਉਹ ਆਪਣੇ ਕੰਮ ਵਾਲੀ ਥਾਂ ‘ਤੇ ਹੀ ਕਤਲ ਕਰ ਦਿੱਤਾ ਗਿਆ ਜੋ ਬਹੁਤ ਦੁਖਦਾਈ ਹੈ।
ਮੁਲਜ਼ਮ ਦਾ ਅਪਰਾਧਿਕ ਇਤਿਹਾਸ
37 ਸਾਲਾ ਕੋਬੋਸ-ਮਾਰਟੀਨੇਜ਼ ਪਹਿਲਾਂ ਵੀ ਹਿਊਸਟਨ ਸ਼ਹਿਰ ਵਿੱਚ ਕਈ ਅਪਰਾਧਿਕ ਗਤੀਵਿਧੀਆਂ ਵਿੱਚ ਫੜਿਆ ਜਾ ਚੁੱਕਾ ਹੈ। ਉਸ ‘ਤੇ ਕਾਰਜੈਕਿੰਗ ਤੇ ਹਮਲੇ ਦੇ ਕੇਸ ਦਰਜ ਰਹੇ ਹਨ। ਡੱਲਾਸ ਪੁਲਿਸ ਨੇ ਉਸਨੂੰ ਗ੍ਰਿਫ਼ਤਾਰ ਕਰਕੇ ਬਿਨਾਂ ਜ਼ਮਾਨਤ ਹਿਰਾਸਤ ਵਿੱਚ ਭੇਜ ਦਿੱਤਾ ਹੈ। ਜੇ ਦੋਸ਼ ਸਾਬਤ ਹੋਏ ਤਾਂ ਉਸਨੂੰ ਉਮਰ ਕੈਦ ਬਿਨਾਂ ਪੈਰੋਲ ਜਾਂ ਫਿਰ ਮੌਤ ਦੀ ਸਜ਼ਾ ਵੀ ਹੋ ਸਕਦੀ ਹੈ।
