ਨਵੀਂ ਦਿੱਲੀ :- ਦੇਸ਼ ਦੀ ਵੋਟਰ ਸੂਚੀ ਨੂੰ ਸ਼ੁੱਧ ਬਣਾਉਣ ਲਈ ਚੋਣ ਕਮਿਸ਼ਨ ਵੱਲੋਂ 21 ਸਾਲਾਂ ਬਾਅਦ ਇੱਕ ਵੱਡੀ ਕਾਰਵਾਈ ਸ਼ੁਰੂ ਕੀਤੀ ਗਈ ਹੈ। ਇਸ “ਵਿਸ਼ੇਸ਼ ਗਹਿਨ ਸੁਧਾਈ (Special Intensive Revision – SIR)” ਦੇ ਦੂਜੇ ਪੜਾਅ ਹੇਠ 9 ਰਾਜਾਂ ਅਤੇ 3 ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਵਿੱਚ ਅੱਜ ਤੋਂ ਘਰ-ਘਰ ਜਾ ਕੇ ਵੋਟਰਾਂ ਦੀ ਪੁਸ਼ਟੀ ਕੀਤੀ ਜਾਵੇਗੀ।
ਕਿਹੜੇ ਰਾਜਾਂ ਵਿੱਚ ਚੱਲੇਗੀ ਮੁਹਿੰਮ
ਇਹ ਮੁਹਿੰਮ ਉੱਤਰ ਪ੍ਰਦੇਸ਼, ਪੱਛਮੀ ਬੰਗਾਲ, ਮੱਧ ਪ੍ਰਦੇਸ਼, ਰਾਜਸਥਾਨ, ਤਾਮਿਲਨਾਡੂ, ਕੇਰਲ, ਗੁਜਰਾਤ, ਗੋਆ, ਛੱਤੀਸਗੜ੍ਹ, ਪੁਡੂਚੇਰੀ, ਲਕਸ਼ਦੀਪ ਅਤੇ ਅੰਡੇਮਾਨ ਨਿਕੋਬਾਰ ਵਿੱਚ ਚੱਲੇਗੀ।
ਬਿਹਾਰ ਵਿੱਚ ਇਹ ਪ੍ਰਕਿਰਿਆ ਪਹਿਲਾਂ ਹੀ ਪੂਰੀ ਹੋ ਚੁੱਕੀ ਹੈ।
ਹਰ ਵੋਟਰ ਦੀ ਹੋਵੇਗੀ ਨਵੀਂ ਤਸਦੀਕ
ਇਸ ਪ੍ਰਕਿਰਿਆ ਅੰਦਰ ਹਰ ਵੋਟਰ ਦੀ ਜਾਣਕਾਰੀ ਮੁੜ ਜਾਂਚੀ ਜਾਵੇਗੀ। ਪੁਰਾਣੀ ਸੂਚੀ ਦੀ ਥਾਂ ਨਵੀਂ ਵੋਟਰ ਲਿਸਟ ਤਿਆਰ ਹੋਵੇਗੀ।
ਮਕਸਦ ਹੈ — ਫਰਜ਼ੀ ਵੋਟਰਾਂ ਨੂੰ ਹਟਾਉਣਾ, ਮ੍ਰਿਤਕ ਅਤੇ ਦੋਹਰੇ ਨਾਂ ਮਿਟਾਉਣਾ ਤੇ ਗੈਰ-ਕਾਨੂੰਨੀ ਪ੍ਰਵਾਸੀਆਂ ਦੀ ਪਛਾਣ ਕਰਨਾ।
ਘਰ-ਘਰ ਤਸਦੀਕ 4 ਨਵੰਬਰ ਤੋਂ 4 ਦਸੰਬਰ ਤੱਕ
ਇਹ ਵਿਸ਼ੇਸ਼ ਮੁਹਿੰਮ 4 ਨਵੰਬਰ ਤੋਂ 4 ਦਸੰਬਰ ਤੱਕ ਚੱਲੇਗੀ, ਜਦਕਿ ਅੰਤਿਮ ਵੋਟਰ ਸੂਚੀ 7 ਫਰਵਰੀ 2026 ਨੂੰ ਜਾਰੀ ਕੀਤੀ ਜਾਵੇਗੀ।
ਹਰੇਕ ਵੋਟਰ ਨੂੰ ਪ੍ਰੀ-ਫਿਲਡ ਫਾਰਮ ਦਿੱਤਾ ਜਾਵੇਗਾ, ਜਿਸ ਨਾਲ ਉਹ ਆਪਣੀ ਜਾਣਕਾਰੀ ਦੀ ਜਾਂਚ ਅਤੇ ਸੋਧ ਕਰ ਸਕਣਗੇ।
ਵੋਟਰਾਂ ਨੂੰ ਅਪੀਲ
ਚੋਣ ਕਮਿਸ਼ਨ ਨੇ ਵੋਟਰਾਂ ਨੂੰ ਆਪਣੀ ਪਛਾਣ ਪੱਕੀ ਕਰਨ ਲਈ ਜਨਮ ਸਰਟੀਫਿਕੇਟ, ਪਾਸਪੋਰਟ, ਜ਼ਮੀਨੀ ਦਸਤਾਵੇਜ਼ ਜਾਂ ਹੋਰ ਸਰਕਾਰੀ ਪਛਾਣ ਪੱਤਰ ਪੇਸ਼ ਕਰਨ ਦੀ ਅਪੀਲ ਕੀਤੀ ਹੈ।
