ਚੰਡੀਗੜ੍ਹ :- ਭਾਰਤੀ ਏਜੰਸੀਆਂ ਨੇ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਵਿੱਚ ਨਾਮਜ਼ਦ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਦੇ ਭਰਾ ਅਨਮੋਲ ਬਿਸ਼ਨੋਈ ਨੂੰ ਅਮਰੀਕਾ ਤੋਂ ਹਵਾਲੇ ਕਰਵਾ ਲਿਆ ਹੈ। ਉਹ ਲੰਮੇ ਸਮੇਂ ਤੋਂ ਜਾਅਲੀ ਪਾਸਪੋਰਟ ‘ਤੇ ਵਿਦੇਸ਼ਾਂ ਵਿੱਚ ਭੱਜਦਾ ਫਿਰ ਰਿਹਾ ਸੀ।
ਪੰਜਾਬ ਪੁਲਿਸ ਦੀ ਐਂਟੀ ਗੈਂਗਸਟਰ ਟਾਸਕ ਫੋਰਸ (AGTF) ਨੇ ਉਸਦੀ ਪੂਰੀ ਲੋਕੇਸ਼ਨ ਅਤੇ ਡਾਟਾ ਕੇਂਦਰੀ ਏਜੰਸੀਆਂ ਨਾਲ ਸਾਂਝਾ ਕੀਤਾ, ਜਿਸ ਤੋਂ ਬਾਅਦ ਕਾਰਵਾਈ ਵਿੱਚ ਤੇਜ਼ੀ ਆਈ।
ਜਾਅਲੀ ਪਾਸਪੋਰਟ ਤੋਂ ਖੁਲ੍ਹੀ ਗਿਰਫ਼ਤਾਰੀ ਦੀ ਗੁੰਜਾਈਸ਼
ਤਫ਼ਤੀਸ਼ ਦੌਰਾਨ ਸਾਹਮਣੇ ਆਇਆ ਕਿ ਅਨਮੋਲ ਨੇ ਆਪਣੀ ਪਹਿਚਾਣ ਭਾਨੂ ਪ੍ਰਤਾਪ ਦੇ ਨਾਂ ਤੇ ਦਰਜ ਕਰਵਾਈ ਸੀ ਅਤੇ ਇਸੇ ਨਾਂ ‘ਤੇ ਜਾਅਲੀ ਭਾਰਤੀ ਪਾਸਪੋਰਟ ਬਣਵਾ ਕੇ ਵਿਦੇਸ਼ ਪਲਾਇਨ ਹੋ ਗਿਆ ਸੀ।
ਸਟੇਟ ਕ੍ਰਾਈਮ ਬ੍ਰਾਂਚ ਨੇ ਇਸ ਜਾਅਲੀ ਦਸਤਾਵੇਜ਼ੀ ਦੀ ਪੁਸ਼ਟੀ ਤੋਂ ਬਾਅਦ ਉਸਦੇ ਵਿਰੁੱਧ ਵੱਖਰੀ ਐਫਆਈਆਰ ਦਰਜ ਕੀਤੀ ਅਤੇ ਕੇਂਦਰ ਸਰਕਾਰ ਨੂੰ ਗ੍ਰਿਫ਼ਤਾਰੀ ਦੀ ਕਾਰਵਾਈ ਸ਼ੁਰੂ ਕਰਨ ਲਈ ਕਾਪੀ ਭੇਜੀ।
ਗੰਭੀਰ ਮਾਮਲਿਆਂ ਵਿੱਚ ਵਾਂਟੇਡ — ਮੂਸੇਵਾਲਾ ਕਤਲ ਤੋਂ ਸਲਮਾਨ ਖਾਨ ਦੇ ਘਰ ਤੱਕ
ਅਨਮੋਲ ਦੇ ਵਿਰੁੱਧ ਕੁੱਲ 16 ਗੰਭੀਰ ਧਾਰਾਵਾਂ ਦੇ ਤਹਿਤ ਕੇਸ ਦਰਜ ਹਨ, ਜਿਨ੍ਹਾਂ ਵਿੱਚ —
-
29 ਮਈ 2022 ਨੂੰ ਸਿੱਧੂ ਮੂਸੇਵਾਲਾ ਦਾ ਕਤਲ,
-
ਅਤੇ 14 ਅਪ੍ਰੈਲ 2024 ਨੂੰ ਸਲਮਾਨ ਖਾਨ ਦੇ ਘਰ ਦੇ ਬਾਹਰ ਗੋਲੀਬਾਰੀ ਦਾ ਮਾਮਲਾ ਵੀ ਸ਼ਾਮਲ ਹੈ।
ਇਸਦੇ ਇਲਾਵਾ ਉਸ ‘ਤੇ ਕਤਲ, ਕਤਲ ਦੀ ਕੋਸ਼ਿਸ਼, ਜਬਰੀ ਵਸੂਲੀ, ਗੈਂਗਸਟਰ ਐਕਟ ਤੇ ਅਸਲਾ ਐਕਟ ਦੀਆਂ ਗੰਭੀਰ ਧਾਰਾਵਾਂ ਵੀ ਲੱਗੀਆਂ ਹਨ।
ਫਿਲਮੀ ਸਟਾਇਲ ਚ ਵਿਦੇਸ਼ ਫਰਾਰ
ਮੂਸੇਵਾਲਾ ਕਤਲ ਤੋਂ ਕੁਝ ਦਿਨ ਬਾਅਦ 15 ਜੂਨ 2022 ਨੂੰ ਪੰਜਾਬ ਪੁਲਿਸ ਨੇ ਆਈਬੀ ਨੂੰ ਸੂਚਿਤ ਕੀਤਾ ਕਿ ਅਨਮੋਲ ਜੈਪੁਰ ਏਅਰਪੋਰਟ ਤੋਂ 19–20 ਨਵੰਬਰ 2021 ਨੂੰ ਦੁਬਈ ਭੱਜ ਗਿਆ ਸੀ, ਉਹ ਵੀ ਜਾਅਲੀ ਪਾਸਪੋਰਟ ਵਰਤ ਕੇ।
ਇਸ ਖੁਲਾਸੇ ਤੋਂ ਬਾਅਦ ਮੋਹਾਲੀ ਸਟੇਟ ਕ੍ਰਾਈਮ ਪੁਲਿਸ ਨੇ ਉਸ ਵਿਰੁੱਧ ਜਾਅਲਸਾਜ਼ੀ, ਸਾਜ਼ਿਸ਼ ਅਤੇ ਪਾਸਪੋਰਟ ਐਕਟ ਤਹਿਤ ਮਾਮਲਾ ਦਰਜ ਕੀਤਾ। ਅਦਾਲਤ ਨੇ ਉਸਦੇ ਵਿਰੁੱਧ ਗ੍ਰਿਫ਼ਤਾਰੀ ਵਾਰੰਟ ਵੀ ਜਾਰੀ ਕੀਤਾ ਸੀ।
ਕਈ ਸਾਲਾਂ ਤੋਂ ਵਾਂਟੇਡ — ਲੁੱਕਆਊਟ ਸਰਕੂਲਰ ਵੀ ਜਾਰੀ
ਫਾਜ਼ਿਲਕਾ ਦੇ ਪਿੰਡ ਦੁਤਾਰਾਵਾਲੀ ਦਾ ਰਹਿਣ ਵਾਲਾ ਅਨਮੋਲ 2012 ਤੋਂ 2025 ਦਰਮਿਆਨ 16 ਐਫਆਈਆਰਜ਼ ਵਿੱਚ ਦੋਸ਼ੀ ਹੈ।
24 ਜੂਨ 2022 ਨੂੰ ਇਮੀਗ੍ਰੇਸ਼ਨ ਬਿਊਰੋ ਨੇ LOC ਜਾਰੀ ਕੀਤਾ, ਜਿਸ ਨਾਲ ਉਸਦੀ ਯਾਤਰਾ ‘ਤੇ ਨਜ਼ਰ ਰੱਖਣਾ ਸੰਭਵ ਹੋਇਆ।
20 ਜੁਲਾਈ 2022 ਨੂੰ ਪੰਜਾਬ ਸਰਕਾਰ ਨੇ ਕੇਂਦਰ ਨੂੰ ਉਸਦੀ ਹਵਾਲਗੀ ਅਤੇ ਗ੍ਰਿਫ਼ਤਾਰੀ ਦੀ ਕਾਰਵਾਈ ਸ਼ੁਰੂ ਕਰਨ ਦੀ ਬੇਨਤੀ ਕੀਤੀ ਸੀ — ਜੋ ਹੁਣ ਪੂਰੀ ਹੋ ਚੁੱਕੀ ਹੈ।
