ਧਨੌਲਾ :-ਬਰਨਾਲਾ ਜ਼ਿਲ੍ਹੇ ਦੇ ਧਨੌਲਾ ਸ਼ਹਿਰ ਵਿੱਚ ਸਥਿਤ ਪ੍ਰਾਚੀਨ ਹਨੂਮਾਨ ਮੰਦਰ ‘ਚ ਮੰਗਲਵਾਰ ਦੀ ਸ਼ਾਮ ਇੱਕ ਭਿਆਨਕ ਹਾਦਸਾ ਵਾਪਰਿਆ। ਲੰਗਰ ਦੀ ਤਿਆਰੀ ਦੌਰਾਨ ਰਸੋਈ ਵਿੱਚ ਵਰਤੀ ਜਾ ਰਹੀ ਡੀਜ਼ਲ ਭੱਠੀ ਵਿਚ ਅਚਾਨਕ ਧਮਾਕਾ ਹੋ ਗਿਆ, ਜਿਸ ਕਾਰਨ ਰਸੋਈ ਵਿਚ ਮੌਜੂਦ ਕਈ ਸੇਵਾਦਾਰ ਅੱਗ ਦੀ ਲਪੇਟ ‘ਚ ਆ ਗਏ।
ਲੰਗਰ ਬਣਾਉਣ ਸਮੇਂ ਵਾਪਰਿਆ ਹਾਦਸਾ
ਇਹ ਧਮਾਕਾ ਉਸ ਵੇਲੇ ਹੋਇਆ ਜਦੋਂ ਮੰਦਰ ਵਿਖੇ ਭੰਡਾਰਾ ਲਗਾਇਆ ਜਾ ਰਿਹਾ ਸੀ। ਰਸੋਈ ‘ਚ ਜਦੋਂ ਡੀਜ਼ਲ ਭੱਠੀ ਵਿੱਚ ਇੰਧਨ ਪਾਇਆ ਜਾ ਰਿਹਾ ਸੀ, ਤਦ ਅਚਾਨਕ ਧਮਾਕਾ ਹੋ ਗਿਆ। ਨਤੀਜੇ ਵਜੋਂ ਰਸੋਈ ਵਿੱਚ ਅੱਗ ਲੱਗ ਗਈ ਅਤੇ ਉੱਥੇ ਮੌਜੂਦ ਸੇਵਾ ਕਰ ਰਹੇ ਰਸੋਈਏ, ਔਰਤਾਂ ਅਤੇ ਹੋਰ ਸੰਗਤ ਅੱਗ ਦੀ ਲਪੇਟ ‘ਚ ਆ ਗਏ।
15 ਲੋਕ ਝੁਲਸੇ, ਗੰਭੀਰ ਜ਼ਖ਼ਮੀ, ਫਰੀਦਕੋਟ ਰੈਫਰ
ਇਸ ਹਾਦਸੇ ਵਿੱਚ ਲਗਭਗ 15 ਲੋਕਾਂ ਦੇ ਝੁਲਸਣ ਦੀ ਪੁਸ਼ਟੀ ਹੋਈ ਹੈ। ਉਨ੍ਹਾਂ ਨੂੰ ਤੁਰੰਤ ਧਨੌਲਾ ਦੇ ਸਿਵਲ ਹਸਪਤਾਲ ਲਿਜਾਇਆ ਗਿਆ। ਜਿਨ੍ਹਾਂ ਦੀ ਹਾਲਤ ਗੰਭੀਰ ਦੱਸੀ ਗਈ, ਉਨ੍ਹਾਂ ਨੂੰ ਬਰਨਾਲਾ ਅਤੇ ਫਰੀਦਕੋਟ ਦੇ ਸਰਕਾਰੀ ਹਸਪਤਾਲਾਂ ਵਿੱਚ ਰੈਫਰ ਕੀਤਾ ਗਿਆ ਹੈ। ਜ਼ਖ਼ਮੀਆਂ ਵਿੱਚ ਔਰਤਾਂ ਅਤੇ ਬੱਚੇ ਵੀ ਸ਼ਾਮਲ ਹਨ।
ਮੁੱਖ ਮੰਤਰੀ ਮਾਨ ਵੱਲੋਂ ਦੁੱਖ ਦਾ ਇਜ਼ਹਾਰ
ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਘਟਨਾ ‘ਤੇ ਦੁੱਖ ਪ੍ਰਗਟਾਉਂਦੇ ਹੋਏ ਟਵੀਟ ਕੀਤਾ ਕਿ, “ਧਨੌਲਾ ਵਿਖੇ ਸਥਿਤ ਹਨੂਮਾਨ ਜੀ ਦੇ ਪ੍ਰਸਿੱਧ ਮੰਦਰ ਵਿਖੇ ਲੰਗਰ ਦੌਰਾਨ ਅੱਗ ਲੱਗਣ ਕਾਰਨ ਵਾਪਰੇ ਹਾਦਸੇ ਦੀ ਖ਼ਬਰ ਦੁੱਖਦਾਈ ਹੈ। ਕਈ ਸੰਗਤ ਜ਼ਖ਼ਮੀ ਹੋਈ ਹੈ। ਪਰਮਾਤਮਾ ਅੱਗੇ ਅਰਦਾਸ ਹੈ ਕਿ ਸਭ ਸਹੀ-ਸਲਾਮਤ ਹੋਣ। ਪੰਜਾਬ ਸਰਕਾਰ ਪੀੜਤਾਂ ਦੇ ਨਾਲ ਖੜ੍ਹੀ ਹੈ।”
ਪ੍ਰਸ਼ਾਸਨ ਅਤੇ ਪੁਲਿਸ ਮੌਕੇ ‘ਤੇ, ਜਾਂਚ ਜਾਰੀ
ਧਮਾਕੇ ਦੀ ਜਾਣਕਾਰੀ ਮਿਲਦਿਆਂ ਹੀ ਪੁਲਿਸ ਅਤੇ ਪ੍ਰਸ਼ਾਸਨਿਕ ਟੀਮ ਮੌਕੇ ‘ਤੇ ਪਹੁੰਚ ਗਈ। ਹਾਦਸੇ ਕਾਰਨ ਮੰਦਰ ਵਿਚ ਹਫੜਾ-ਦਫੜੀ ਮਚ ਗਈ। ਮੌਕੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਧਮਾਕਾ ਕਿਸ ਤਰੀਕੇ ਨਾਲ ਹੋਇਆ ਅਤੇ ਕੀ ਕੋਈ ਲਾਪਰਵਾਹੀ ਹੋਈ ਸੀ।
