ਅੰਮ੍ਰਿਤਸਰ :- ਅੰਮ੍ਰਿਤਸਰ ਦੇ ਪ੍ਰਾਚੀਨ ਤੀਰਥ ਸਥਾਨ ਰਾਮ ਤੀਰਥ ਵਿੱਚ ਵਾਪਰੀ ਘਟਨਾ ਨੇ ਵਾਲਮੀਕਿ ਭਾਈਚਾਰੇ ਵਿੱਚ ਤੀਖ਼ੀ ਨਾਰਾਜ਼ਗੀ ਪੈਦਾ ਕਰ ਦਿੱਤੀ ਹੈ। ਸਮਾਜ ਦੇ ਆਗੂਆਂ ਦਾ ਦੋਸ਼ ਹੈ ਕਿ ਝੰਡਾ ਚੜ੍ਹਾਉਣ ਦੀ ਧਾਰਮਿਕ ਰਸਮ ਦੌਰਾਨ ਕੁਝ ਤੱਤਾਂ ਵੱਲੋਂ ਜ਼ਬਰਦਸਤੀ ਦਖ਼ਲਅੰਦਾਜ਼ੀ ਕਰਕੇ ਪਵਿੱਤਰ ਸਥਾਨ ਦੀ ਬੇਅਦਬੀ ਕੀਤੀ ਗਈ।
“ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਈ ਗਈ” – ਸਮਾਜ ਦਾ ਦਾਅਵਾ
ਆਗੂਆਂ ਅਨੁਸਾਰ ਕੁਝ ਲੋਕ ਤਲਵਾਰਾਂ ਸਮੇਤ ਮੰਦਰ ਪ੍ਰਾਂਗਣ ਵਿੱਚ ਦਾਖਲ ਹੋਏ ਤੇ ਮਾਹੌਲ ਖਰਾਬ ਕਰਨ ਦੀ ਕੋਸ਼ਿਸ਼ ਕੀਤੀ। ਇਲਜ਼ਾਮ ਇਹ ਵੀ ਲਗਾਇਆ ਗਿਆ ਹੈ ਕਿ ਪਾਲਕੀ ਸਾਹਿਬ ਦੀ ਤੋੜਫੋੜ ਅਤੇ ਬੇਅਦਬੀ ਕੀਤੀ ਗਈ, ਜੋ ਭਾਈਚਾਰੇ ਦੀਆਂ ਧਾਰਮਿਕ ਭਾਵਨਾਵਾਂ ’ਤੇ ਸਿੱਧਾ ਵਾਰ ਹੈ।
ਕਾਰਵਾਈ ਦੀ ਮੰਗ, ਬੰਦ ਦੀ ਚੇਤਾਵਨੀ
ਵਾਲਮੀਕਿ ਭਾਈਚਾਰੇ ਵੱਲੋਂ ਦੋਸ਼ੀਆਂ ਖ਼ਿਲਾਫ਼ ਤੁਰੰਤ ਸਖ਼ਤ ਤੋਂ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ ਗਈ ਹੈ। ਆਗੂਆਂ ਨੇ ਐਲਾਨ ਕੀਤਾ ਕਿ ਮਾਮਲੇ ‘ਤੇ ਜੇਕਰ ਫ਼ੌਰੀ ਕਾਰਵਾਈ ਨਾ ਹੋਈ ਤਾਂ ਉਹ ਪੰਜਾਬ ਬੰਦ ਜਾਂ ਭਾਰਤ ਬੰਦ ਦੀ ਕਾਲ ਵੀ ਦੇ ਸਕਦੇ ਹਨ। ਇਸ ਸਮੇਂ ਲਈ ਭੰਡਾਰੀ ਪੁਲ ਨੂੰ ਵੀ ਸ਼ਾਮ 7 ਵਜੇ ਤੱਕ ਬੰਦ ਰੱਖਣ ਦੀ ਘੋਸ਼ਣਾ ਕੀਤੀ ਗਈ ਹੈ।
ਅੰਮ੍ਰਿਤਸਰ ਵਿੱਚ ਟ੍ਰੈਫਿਕ ਪ੍ਰਭਾਵਿਤ
ਰੋਸ ਪ੍ਰਦਰਸ਼ਨ ਕਾਰਨ ਭੰਡਾਰੀ ਪੁਲ ਦੇ ਦੋਵੇਂ ਪਾਸਿਆਂ ਆਵਾਜਾਈ ਰੋਕ ਦਿੱਤੀ ਗਈ, ਜਿਸ ਨਾਲ ਸ਼ਹਿਰ ਦੇ ਕਈ ਹਿਸਿਆਂ ਵਿੱਚ ਭਾਰੀ ਟ੍ਰੈਫਿਕ ਜਾਮ ਦੀ ਸਥਿਤੀ ਬਣ ਗਈ ਹੈ। ਪੁਲਿਸ ਪ੍ਰਸ਼ਾਸਨ ਵੱਲੋਂ ਵੱਡੀ ਗਿਣਤੀ ਵਿੱਚ ਪੁਲਿਸ ਜਥੇ ਤਾਇਨਾਤ ਕੀਤੇ ਗਏ ਹਨ ਤਾਂ ਜੋ ਮਾਹੌਲ ਕਾਬੂ ਵਿੱਚ ਰਹੇ।
