ਨਵੀਂ ਦਿੱਲੀ :- ਟੈਸਟ ਕ੍ਰਿਕਟ ਦੇ 138 ਸਾਲਾਂ ਦੇ ਰਵਾਇਤੀ ਫਾਰਮੈਟ ਵਿੱਚ ਅੱਜ ਤੋਂ ਇੱਕ ਇਤਿਹਾਸਕ ਤਬਦੀਲੀ ਦਰਜ ਹੋ ਗਈ ਹੈ। ਭਾਰਤ–ਦੱਖਣੀ ਅਫਰੀਕਾ ਦੇ ਮਿਆਨ ਬਾਰਸਾਪਾਰਾ ਸਟੇਡੀਅਮ ਵਿੱਚ ਸ਼ੁਰੂ ਹੋਏ ਟੈਸਟ ਮੈਚ ਵਿੱਚ ਬ੍ਰੇਕਾਂ ਦੀ ਕ੍ਰਮਵਾਰਤਾ ਪੂਰੀ ਤਰ੍ਹਾਂ ਉਲਟਵਾਧੀ ਦਿੱਤੀ ਗਈ ਹੈ। ਹੁਣ ਪਹਿਲੇ ਸੈਸ਼ਨ ਤੋਂ ਬਾਅਦ ਚਾਹ ਦਾ ਬ੍ਰੇਕ ਅਤੇ ਦੂਜੇ ਸੈਸ਼ਨ ਤੋਂ ਬਾਅਦ ਦੁਪਹਿਰ ਦਾ ਖਾਣਾ ਲਿਆ ਜਾਵੇਗਾ—ਜੋ ਕਿ ਟੈਸਟ ਇਤਿਹਾਸ ਵਿੱਚ ਪਹਿਲਾਂ ਕਦੇ ਵੀ ਨਹੀਂ ਹੋਇਆ।
ਇਹ ਤਬਦੀਲੀ ਕਿਸੇ ਨਵੇਂ ਨਿਯਮ ਕਾਰਨ ਨਹੀਂ, ਸਗੋਂ ਉੱਤਰ–ਪੂਰਬੀ ਭਾਰਤ ਦੇ ਭੌਗੋਲਿਕ ਹਾਲਾਤਾਂ ਕਰਕੇ ਕੀਤੀ ਗਈ ਹੈ। ਗੁਹਾਟੀ ਵਿੱਚ ਸੂਰਜ ਹੋਰ ਹਿੱਸਿਆਂ ਨਾਲੋਂ ਜਲਦੀ ਡੁੱਬਦਾ ਹੈ, ਜਿਸ ਨਾਲ ਸ਼ਾਮ ਨੂੰ ਰੌਸ਼ਨੀ ਘੱਟ ਹੋਣ ਦੀ ਸਮੱਸਿਆ ਵਧ ਜਾਂਦੀ ਹੈ। ਇਸੇ ਕਰਕੇ ਸਮਾਂ ਬਚਾਉਣ ਲਈ ਬੀ.ਸੀ.ਸੀ.ਆਈ. ਨੇ ਬ੍ਰੇਕਾਂ ਦੀ ਨਵੀਂ ਯੋਜਨਾ ਬਣਾਈ ਹੈ।
ਮੈਚ ਦੇ ਸਮੇਂ ’ਚ ਵੀ ਸੁਧਾਰ
ਆਮ ਤੌਰ ’ਤੇ ਭਾਰਤ ਵਿੱਚ ਟੈਸਟ ਮੈਚ 9:30 ਵਜੇ ਸ਼ੁਰੂ ਹੁੰਦੇ ਹਨ, ਪਰ ਗੁਹਾਟੀ ਟੈਸਟ 9 ਵਜੇ ਹੀ ਸ਼ੁਰੂ ਹੋ ਗਿਆ। ਪਹਿਲਾ ਸੈਸ਼ਨ 11 ਵਜੇ ਖ਼ਤਮ, ਫਿਰ 20 ਮਿੰਟ ਚਾਹ ਦਾ ਬ੍ਰੇਕ। 11:20 ਤੋਂ 1:20 ਤੱਕ ਦੂਜਾ ਸੈਸ਼ਨ ਚੱਲੇਗਾ, ਜਿਸ ਤੋਂ ਬਾਅਦ 40 ਮਿੰਟ ਲੰਚ ਬ੍ਰੇਕ ਹੋਵੇਗਾ। ਫਿਰ 2 ਵਜੇ ਤੋਂ 4 ਵਜੇ ਤੱਕ ਖੇਡ ਦਾ ਆਖਰੀ ਹਿੱਸਾ ਨਿਭਾਇਆ ਜਾਵੇਗਾ।
