ਨਵੀਂ ਦਿੱਲੀ :- ਇੰਗਲੈਂਡ ਵਿਰੁੱਧ ਟੈਸਟ ਸੀਰੀਜ਼ 4 ਅਗਸਤ ਨੂੰ ਖਤਮ ਹੋਣ ਤੋਂ ਬਾਅਦ, ਭਾਰਤੀ ਟੀਮ ਨੇ ਕੋਈ ਮੈਚ ਨਹੀਂ ਖੇਡਿਆ। ਹੁਣ ਲੰਬੇ ਅੰਤਰਾਲ ਤੋਂ ਬਾਅਦ ਖਿਡਾਰੀ ਏਸ਼ੀਆ ਕੱਪ ਦੇ ਮੰਚ ‘ਤੇ ਉਤਰਣ ਜਾ ਰਹੇ ਹਨ। ਪਹਿਲਾ ਮੁਕਾਬਲਾ ਅੱਜ ਸ਼ਾਮ 8 ਵਜੇ ਦੁਬਈ ਵਿੱਚ ਯੂਏਈ ਦੇ ਖਿਲਾਫ ਖੇਡਿਆ ਜਾਵੇਗਾ।
ਗਰੁੱਪ-ਏ ਦੀਆਂ ਟੀਮਾਂ
ਭਾਰਤ, ਯੂਏਈ, ਪਾਕਿਸਤਾਨ ਅਤੇ ਓਮਾਨ ਗਰੁੱਪ-ਏ ਵਿੱਚ ਸ਼ਾਮਲ ਹਨ। ਹਰ ਟੀਮ ਦੂਜੀਆਂ ਨਾਲ ਇੱਕ-ਇੱਕ ਮੈਚ ਖੇਡੇਗੀ। ਚੋਟੀ ਦੀਆਂ ਦੋ ਟੀਮਾਂ ਸੁਪਰ-4 ਰਾਊਂਡ ਵਿੱਚ ਪਹੁੰਚਣਗੀਆਂ।
ਓਪਨਿੰਗ ਜੋੜੀ ਉੱਤੇ ਵੱਡਾ ਫੈਸਲਾ
ਇਸ ਸਮੇਂ ਸਭ ਤੋਂ ਵੱਡੀ ਚਰਚਾ ਟੀਮ ਇੰਡੀਆ ਦੀ ਓਪਨਿੰਗ ਜੋੜੀ ਨੂੰ ਲੈ ਕੇ ਹੈ। ਅਭਿਸ਼ੇਕ ਸ਼ਰਮਾ ਦਾ ਓਪਨ ਕਰਨਾ ਤੈਅ ਹੈ, ਪਰ ਉਸਦੇ ਸਾਥੀ ਦੇ ਤੌਰ ‘ਤੇ ਸੰਜੂ ਸੈਮਸਨ ਖੇਡੇਗਾ ਜਾਂ ਸ਼ੁਭਮਨ ਗਿੱਲ — ਇਸ ‘ਤੇ ਟੀਮ ਮੈਨੇਜਮੈਂਟ ਦਾ ਫੈਸਲਾ ਰਹੇਗਾ। ਜੇ ਗਿੱਲ ਓਪਨ ਕਰਦਾ ਹੈ ਤਾਂ ਸੰਜੂ ਨੰਬਰ-3 ‘ਤੇ ਉਤਰ ਸਕਦਾ ਹੈ। ਇਸ ਹਾਲਤ ਵਿੱਚ ਤਿਲਕ ਵਰਮਾ ਨੂੰ ਬਾਹਰ ਬੈਠਣਾ ਪਵੇਗਾ। ਕਪਤਾਨ ਸੂਰਿਆਕੁਮਾਰ ਯਾਦਵ ਚੌਥੇ ਨੰਬਰ ‘ਤੇ ਖੇਡੇਗਾ।
ਵਿਕਟਕੀਪਿੰਗ ਦੀ ਗੁੰਜਲ
ਜੇਕਰ ਸੰਜੂ ਸੈਮਸਨ ਪਲੇਇੰਗ-11 ਵਿੱਚ ਸ਼ਾਮਲ ਹੁੰਦਾ ਹੈ ਤਾਂ ਵਿਕਟਕੀਪਿੰਗ ਉਸਦੇ ਹੱਥ ਵਿੱਚ ਹੋਵੇਗੀ। ਜੇ ਉਹ ਬਾਹਰ ਬੈਠਦਾ ਹੈ ਤਾਂ ਇਹ ਜ਼ਿੰਮੇਵਾਰੀ ਜਿਤੇਸ਼ ਸ਼ਰਮਾ ਨਿਭਾਵੇਗਾ।
ਆਲਰਾਊਂਡਰ ਤੇ ਗੇਂਦਬਾਜ਼ੀ ਸੰਭਾਵਨਾਵਾਂ
ਹਾਰਦਿਕ ਪੰਡਿਆ ਅਤੇ ਅਕਸ਼ਰ ਪਟੇਲ ਦਾ ਖੇਡਣਾ ਲਗਭਗ ਪੱਕਾ ਹੈ। ਗੇਂਦਬਾਜ਼ੀ ਵਿਭਾਗ ਵਿੱਚ ਅਕਸ਼ਰ ਦੇ ਨਾਲ ਕੁਲਦੀਪ ਯਾਦਵ ਅਤੇ ਵਰੁਣ ਚੱਕਰਵਰਤੀ ਨੂੰ ਮੌਕਾ ਮਿਲਣ ਦੀ ਉਮੀਦ ਹੈ। ਤੇਜ਼ ਗੇਂਦਬਾਜ਼ਾਂ ਵਿੱਚ ਜਸਪ੍ਰੀਤ ਬੁਮਰਾਹ ਦੀ ਵਾਪਸੀ ਪੱਕੀ ਹੈ, ਜਦਕਿ ਹਰਸ਼ਿਤ ਰਾਣਾ ਵੀ ਪਲੇਇੰਗ-11 ਵਿੱਚ ਆ ਸਕਦਾ ਹੈ।
ਇਤਿਹਾਸਕ ਅੰਕੜੇ
ਟੀ-20 ਫਾਰਮੈਟ ਵਿੱਚ ਭਾਰਤ ਅਤੇ ਯੂਏਈ ਪਹਿਲਾਂ ਸਿਰਫ ਇਕ ਵਾਰ ਟਕਰਾਏ ਹਨ। 2016 ਦੇ ਏਸ਼ੀਆ ਕੱਪ ਵਿੱਚ ਟੀਮ ਇੰਡੀਆ ਨੇ 9 ਵਿਕਟਾਂ ਨਾਲ ਜਿੱਤ ਪ੍ਰਾਪਤ ਕੀਤੀ ਸੀ। ਇੱਕ ਰੋਜ਼ਾ ਫਾਰਮੈਟ ਵਿੱਚ ਦੋਵੇਂ ਟੀਮਾਂ ਤਿੰਨ ਵਾਰ ਭਿੜ ਚੁੱਕੀਆਂ ਹਨ, ਜਿੱਥੇ ਹਰ ਵਾਰ ਭਾਰਤ ਨੇ ਜਿੱਤ ਦਰਜ ਕੀਤੀ।
