ਨਵੀਂ ਦਿੱਲੀ :- ਸੁਪਰ-4 ਪੜਾਅ ਵਿੱਚ ਭਾਰਤ ਨੇ ਚੀਨ ਦੇ ਖਿਲਾਫ਼ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ 7-0 ਨਾਲ ਜਿੱਤ ਹਾਸਲ ਕੀਤੀ। ਸ਼ੁਰੂਆਤੀ ਮਿੰਟਾਂ ਤੋਂ ਹੀ ਭਾਰਤੀ ਟੀਮ ਹਾਵੀ ਰਹੀ। ਤੀਜੇ ਮਿੰਟ ਦੇ 38ਵੇਂ ਸਕਿੰਟ ‘ਚ ਸ਼ਿਲਾਨੰਦ ਲਾਕੜਾ ਨੇ ਪਹਿਲਾ ਫੀਲਡ ਗੋਲ ਕੀਤਾ। ਛੇਵੇਂ ਮਿੰਟ ਦੇ 26ਵੇਂ ਸਕਿੰਟ ‘ਚ ਦਿਲਪ੍ਰੀਤ ਸਿੰਘ ਨੇ ਪੈਨਲਟੀ ਕਾਰਨਰ ਨੂੰ ਗੋਲ ਵਿੱਚ ਬਦਲਿਆ।
ਲਗਾਤਾਰ ਗੋਲਾਂ ਨਾਲ ਭਾਰਤ ਅੱਗੇ
17ਵੇਂ ਮਿੰਟ ਦੇ 51ਵੇਂ ਸਕਿੰਟ ‘ਚ ਮਨਦੀਪ ਸਿੰਘ ਨੇ ਪੈਨਲਟੀ ਕਾਰਨਰ ‘ਤੇ ਤੀਜਾ ਗੋਲ ਕਰਕੇ ਭਾਰਤ ਨੂੰ 3-0 ਦੀ ਲੀਡ ਦਿਵਾਈ। ਰਾਜਕੁਮਾਰ ਪਾਲ ਨੇ 36ਵੇਂ ਮਿੰਟ ‘ਚ ਫੀਲਡ ਗੋਲ ਕਰਕੇ ਸਕੋਰ 4-0 ਕੀਤਾ। 38ਵੇਂ ਮਿੰਟ ‘ਚ ਸੁਖਜੀਤ ਨੇ ਪੈਨਲਟੀ ਕਾਰਨਰ ਨੂੰ ਗੋਲ ਵਿੱਚ ਬਦਲ ਕੇ ਲੀਡ 5-0 ਤੱਕ ਵਧਾਈ।
ਅਭਿਸ਼ੇਕ ਦੇ ਦੋ ਗੋਲਾਂ ਨਾਲ ਜਿੱਤ ਪੱਕੀ
ਆਖਰੀ ਕੁਆਰਟਰ ਵਿੱਚ ਅਭਿਸ਼ੇਕ ਨੇ 45ਵੇਂ ਅਤੇ 49ਵੇਂ ਮਿੰਟ ਵਿੱਚ ਦੋ ਫੀਲਡ ਗੋਲ ਕਰਕੇ ਸਕੋਰ 7-0 ਕਰ ਦਿੱਤਾ। ਚੀਨ ਪੂਰੇ ਮੈਚ ਵਿੱਚ ਇੱਕ ਵੀ ਗੋਲ ਨਹੀਂ ਕਰ ਸਕਿਆ ਅਤੇ ਭਾਰਤ ਫਾਈਨਲ ਵਿੱਚ ਦਾਖਲ ਹੋ ਗਿਆ।
ਕੋਰੀਆ ਨਾਲ ਚੌਥੀ ਵਾਰ ਫਾਈਨਲ
ਭਾਰਤ ਨੌਂਵੀ ਵਾਰ ਹਾਕੀ ਏਸ਼ੀਆ ਕੱਪ ਦੇ ਫਾਈਨਲ ਵਿੱਚ ਪਹੁੰਚਿਆ ਹੈ। ਇਸ ਤੋਂ ਪਹਿਲਾਂ ਉਹ ਤਿੰਨ ਵਾਰ ਚੈਂਪਿਅਨ ਬਣ ਚੁੱਕਾ ਹੈ ਤੇ ਪੰਜ ਵਾਰ ਹਾਰ ਚੁੱਕਾ ਹੈ। ਕੋਰੀਆ ਨਾਲ ਇਹ ਚੌਥੀ ਵਾਰ ਫਾਈਨਲ ਮੁਕਾਬਲਾ ਹੋਵੇਗਾ। ਪਹਿਲਾਂ 1994, 2007 ਅਤੇ 2013 ਵਿੱਚ ਦੋਹਾਂ ਟੀਮਾਂ ਵਿਚਕਾਰ ਫਾਈਨਲ ਹੋਏ ਸਨ। ਭਾਰਤ ਨੇ 2007 ਵਿੱਚ ਚੇਨਈ ‘ਚ ਕੋਰੀਆ ਨੂੰ ਹਰਾਇਆ ਸੀ।
ਐਤਵਾਰ ਨੂੰ ਹੋਵੇਗਾ ਨਿਰਣਾਇਕ ਮੁਕਾਬਲਾ
ਫਾਈਨਲ ਭਾਰਤ ਅਤੇ ਕੋਰੀਆ ਵਿਚਕਾਰ ਐਤਵਾਰ ਸ਼ਾਮ 7:30 ਵਜੇ ਖੇਡਿਆ ਜਾਵੇਗਾ। ਇਸ ਮੈਚ ਦੇ ਨਤੀਜੇ ਨਾਲ ਹੀ ਅਗਲੇ ਸਾਲ ਹੋਣ ਵਾਲੇ ਹਾਕੀ ਵਿਸ਼ਵ ਕੱਪ ਲਈ ਟਿਕਟ ਤੈਅ ਹੋਵੇਗੀ।
