ਨਵੀਂ ਦਿੱਲੀ :- ਟੀ-20 ਵਿਸ਼ਵ ਕੱਪ ਦੇ ਰੋਮਾਂਚਕ ਮੁਕਾਬਲਿਆਂ ਦਰਮਿਆਨ ਕੋਲੰਬੋ ਦੇ ਆਰ. ਪ੍ਰੇਮਦਾਸਾ ਸਟੇਡੀਅਮ ਵਿੱਚ ਖੇਡੇ ਗਏ ਮੈਚ ਨੇ ਸਾਰਿਆਂ ਨੂੰ ਹੈਰਾਨ ਕਰ ਦਿੱਤਾ। ਜ਼ਿੰਬਾਬਵੇ ਨੇ ਮਜ਼ਬੂਤ ਆਸਟ੍ਰੇਲੀਆਈ ਟੀਮ ਨੂੰ 23 ਦੌੜਾਂ ਨਾਲ ਮਾਤ ਦੇ ਕੇ ਟੂਰਨਾਮੈਂਟ ਦਾ ਸਭ ਤੋਂ ਵੱਡਾ ਉਲਟਫੇਰ ਕਰ ਦਿੱਤਾ। ਇਸ ਜਿੱਤ ਨਾਲ ਜ਼ਿੰਬਾਬਵੇ ਨੇ ਆਪਣੀ ਦੂਜੀ ਕਾਮਯਾਬੀ ਦਰਜ ਕੀਤੀ ਅਤੇ ਪੁਰਾਣੀ ਯਾਦ ਤਾਜ਼ਾ ਕਰ ਦਿੱਤੀ, ਜਦੋਂ ਉਹ 2007 ਵਿੱਚ ਵੀ ਆਸਟ੍ਰੇਲੀਆ ਨੂੰ ਹਰਾ ਚੁੱਕੀ ਸੀ।
ਜ਼ਿੰਬਾਬਵੇ ਦੀ ਸੰਭਲੀ ਹੋਈ ਪਰ ਤੀਖੀ ਬੱਲੇਬਾਜ਼ੀ
ਟਾਸ ਜਿੱਤਣ ਮਗਰੋਂ ਆਸਟ੍ਰੇਲੀਆ ਨੇ ਪਹਿਲਾਂ ਗੇਂਦਬਾਜ਼ੀ ਚੁਣੀ, ਪਰ ਇਹ ਫੈਸਲਾ ਉਸਦੇ ਹੱਕ ਵਿੱਚ ਨਹੀਂ ਗਿਆ। ਜ਼ਿੰਬਾਬਵੇ ਨੇ ਸਿਰਫ਼ ਦੋ ਵਿਕਟਾਂ ਗਵਾ ਕੇ 20 ਓਵਰਾਂ ਵਿੱਚ 169 ਦੌੜਾਂ ਦਾ ਮਜ਼ਬੂਤ ਸਕੋਰ ਖੜ੍ਹਾ ਕੀਤਾ।
ਬ੍ਰਾਇਨ ਬੇਨੇਟ ਨੇ ਨਾਬਾਦ 64 ਦੌੜਾਂ ਦੀ ਸਮਝਦਾਰ ਪਾਰੀ ਖੇਡੀ ਅਤੇ ਟੀਮ ਨੂੰ ਮਜ਼ਬੂਤ ਅਧਾਰ ਦਿੱਤਾ। ਉਸਦੇ ਨਾਲ ਤਦੀਵਾਨਾਸ਼ੇ ਮਾਰੂਮਾਨੀ ਅਤੇ ਰਿਆਨ ਬਰਲ ਨੇ ਵੀ 35-35 ਦੌੜਾਂ ਜੋੜੀਆਂ। ਅਖੀਰ ਵਿੱਚ ਕਪਤਾਨ ਸਿਕੰਦਰ ਰਜ਼ਾ ਨੇ ਤੇਜ਼ਤਰਾਰ 25 ਦੌੜਾਂ ਨਾਲ ਸਕੋਰ ਨੂੰ ਹੋਰ ਉਚਾਈ ਦਿੱਤੀ।
ਆਸਟ੍ਰੇਲੀਆ ਦੀ ਜਵਾਬੀ ਪਾਰੀ ਡਗਮਗਾਈ
170 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਆਸਟ੍ਰੇਲੀਆਈ ਬੱਲੇਬਾਜ਼ ਦਬਾਅ ਹੇਠ ਆ ਗਏ। ਟੀਮ 19.3 ਓਵਰਾਂ ਵਿੱਚ 146 ਦੌੜਾਂ ‘ਤੇ ਆਲ ਆਊਟ ਹੋ ਗਈ।
ਮੈਟ ਰੇਨਸ਼ਾ ਨੇ 65 ਦੌੜਾਂ ਨਾਲ ਕੁਝ ਸਮੇਂ ਲਈ ਉਮੀਦ ਜਗਾਈ, ਪਰ ਹੋਰ ਬੱਲੇਬਾਜ਼ ਲੰਮਾ ਸਾਥ ਨਹੀਂ ਦੇ ਸਕੇ। ਗਲੇਨ ਮੈਕਸਵੈੱਲ 31 ਦੌੜਾਂ ਬਣਾ ਸਕੇ, ਜਦਕਿ ਕਪਤਾਨ ਟ੍ਰੈਵਿਸ ਹੈੱਡ ਅਤੇ ਹੋਰ ਖਿਡਾਰੀ ਜ਼ਲਦੀ ਪੈਵਿਲੀਅਨ ਵਾਪਸ ਮੁੜ ਗਏ। ਟਿਮ ਡੇਵਿਡ ਅਤੇ ਕੈਮਰਨ ਗ੍ਰੀਨ ਖਾਤਾ ਖੋਲ੍ਹਣ ਤੋਂ ਵੀ ਅਸਮਰੱਥ ਰਹੇ।
ਜ਼ਿੰਬਾਬਵੇ ਦੀ ਜਿੱਤ ਨੇ ਬਦਲਿਆ ਟੂਰਨਾਮੈਂਟ ਦਾ ਮਾਹੌਲ
ਇਸ ਨਤੀਜੇ ਨਾਲ ਟੀ-20 ਵਿਸ਼ਵ ਕੱਪ ਦਾ ਰੁਖ ਹੋਰ ਵੀ ਰੁਚਿਕਰ ਹੋ ਗਿਆ ਹੈ। ਜ਼ਿੰਬਾਬਵੇ ਨੇ ਸਾਬਤ ਕਰ ਦਿੱਤਾ ਕਿ ਟੀ-20 ਫਾਰਮੈਟ ਵਿੱਚ ਵੱਡੀ ਜਾਂ ਛੋਟੀ ਟੀਮ ਦੀ ਗਿਣਤੀ ਨਹੀਂ ਹੁੰਦੀ, ਮੈਦਾਨ ਵਿੱਚ ਦਿਨ ਜਿਸਦਾ ਹੋਵੇ, ਜਿੱਤ ਉਸਦੀ ਹੁੰਦੀ ਹੈ।
