ਬਰਨਾਲਾ :- ਬਰਨਾਲਾ ਵਿੱਚ ਭਾਰੀ ਮੀਂਹ ਕਾਰਨ ਲਗਾਤਾਰ ਤੀਜੇ ਦਿਨ ਛੱਤ ਡਿੱਗਣ ਦੀ ਘਟਨਾ ਸਾਹਮਣੇ ਆਈ ਹੈ। ਬੀਤੇ ਦਿਨ ਵੀ ਇਸੇ ਤਰ੍ਹਾਂ ਦੇ ਹਾਦਸੇ ਵਿੱਚ ਇੱਕ ਮਹਿਲਾ ਦੀ ਜਾਨ ਗਈ ਸੀ। ਅੱਜ ਵਾਪਰੀ ਨਵੀਂ ਘਟਨਾ ਵਿੱਚ ਪਰਿਵਾਰ ਦਾ ਮੁਖੀ ਜ਼ਿੰਦਗੀ ਹਾਰ ਬੈਠਾ ਜਦਕਿ ਉਸਦੀ ਪਤਨੀ ਤੇ ਤਿੰਨ ਬੱਚੇ ਜ਼ਖ਼ਮੀ ਹੋ ਗਏ।
ਸੁੱਤੇ ਸਮੇਂ ਵਾਪਰਿਆ ਹਾਦਸਾ
ਮ੍ਰਿਤਕ ਦੀ ਪਹਿਚਾਣ 33 ਸਾਲਾ ਲਖਬੀਰ ਸਿੰਘ ਵਜੋਂ ਹੋਈ ਹੈ। ਉਹ ਆਪਣੀ ਪਤਨੀ, ਦੋ ਧੀਆਂ ਅਤੇ ਇੱਕ ਪੁੱਤਰ ਨਾਲ ਘਰ ਵਿੱਚ ਸੁੱਤਾ ਹੋਇਆ ਸੀ। ਭਾਰੀ ਮੀਂਹ ਕਾਰਨ ਕੱਚੀ ਛੱਤ ਕਮਜ਼ੋਰ ਹੋ ਚੁੱਕੀ ਸੀ, ਜੋ ਅਚਾਨਕ ਡਿੱਗ ਗਈ।
ਲੋਕਾਂ ਨੇ ਰਾਹਤ ਕਾਰਜ ਸ਼ੁਰੂ ਕੀਤੇ, ਪਰ ਜਾਨ ਨਾ ਬਚ ਸਕੀ
ਇਲਾਕਾ ਵਾਸੀਆਂ ਨੇ ਸ਼ੋਰ ਸੁਣਦੇ ਹੀ ਰਾਹਤ ਕਾਰਜ ਅਰੰਭੇ, ਪਰ ਲਖਬੀਰ ਸਿੰਘ ਮਲਬੇ ਹੇਠਾਂ ਦਬਣ ਨਾਲ ਮੌਕੇ ’ਤੇ ਹੀ ਮਰ ਗਿਆ। ਜ਼ਖ਼ਮੀਆਂ ਨੂੰ ਸਿਵਲ ਹਸਪਤਾਲ ਭੇਜਿਆ ਗਿਆ, ਜਿੱਥੇੋਂ ਡਾਕਟਰਾਂ ਨੇ ਤੁਰੰਤ ਫਰੀਦਕੋਟ ਰੈਫਰ ਕਰ ਦਿੱਤਾ।
ਸਰਕਾਰੀ ਮਦਦ ਦੀ ਕਮੀ ’ਤੇ ਰੋਸ
ਪਰਿਵਾਰ ਤੇ ਪਿੰਡ ਵਾਸੀਆਂ ਨੇ ਇਲਜ਼ਾਮ ਲਗਾਇਆ ਕਿ ਲਖਬੀਰ ਸਿੰਘ ਦਿਹਾੜੀਦਾਰ ਮਜ਼ਦੂਰ ਸੀ ਅਤੇ ਕਈ ਵਾਰ ਸਰਕਾਰੀ ਯੋਜਨਾਵਾਂ ਤਹਿਤ ਪੱਕਾ ਘਰ ਬਣਾਉਣ ਲਈ ਅਰਜ਼ੀਆਂ ਭਰੀਆਂ, ਪਰ ਉਸਦੇ ਫਾਰਮ ਮੁੜ-ਮੁੜ ਰੱਦ ਕਰ ਦਿੱਤੇ ਗਏ। ਜੇਕਰ ਸਮੇਂ ਸਿਰ ਮਦਦ ਮਿਲਦੀ, ਤਾਂ ਇਹ ਹਾਦਸਾ ਟਲ ਸਕਦਾ ਸੀ।
ਪਰਿਵਾਰ ਨੇ ਮੁਆਵਜ਼ੇ ਅਤੇ ਇਲਾਜ ਦੀ ਮੰਗ ਕੀਤੀ
ਮ੍ਰਿਤਕ ਦੇ ਪਰਿਵਾਰ ਨੇ ਸਰਕਾਰ ਤੋਂ 50 ਲੱਖ ਰੁਪਏ ਦੇ ਮੁਆਵਜ਼ੇ ਦੀ ਮੰਗ ਕੀਤੀ ਹੈ। ਨਾਲ ਹੀ ਜ਼ਖ਼ਮੀਆਂ ਦੇ ਮੁਫ਼ਤ ਅਤੇ ਵਧੀਆ ਇਲਾਜ ਦੀ ਵੀ ਮੰਗ ਕੀਤੀ ਗਈ ਹੈ।
ਪੁਲਿਸ ਵੱਲੋਂ ਪੁਸ਼ਟੀ
ਥਾਣਾ ਇੰਚਾਰਜ ਗੁਰਤੇਜ ਸਿੰਘ ਨੇ ਦੱਸਿਆ ਕਿ ਛੱਤ ਡਿੱਗਣ ਕਾਰਨ ਇੱਕ ਵਿਅਕਤੀ ਦੀ ਮੌਤ ਹੋਈ ਹੈ ਤੇ ਬਾਕੀ ਚਾਰੇ ਜ਼ਖ਼ਮੀ ਇਲਾਜ ਅਧੀਨ ਹਨ।
